Special Call Prof. Jay L. Garfield Commemorative Volume · Submissions Open
Announcements Newsletters About Us Contact
Search
VR
Vālmīki Rāmāyaṇam • Kāṇḍa 2 (Ayodhyākāṇḍa) • Sarga 7

Ayodhyākāṇḍa Sarga 7

अयोध्याकाण्डम् • सर्गः 7

Ayodhyākāṇḍa Sarga 7 of the classical Vālmīki Rāmāyaṇa with 31 verses.

Total: 31 Verses • Citations: VR 2.7.1–31 • 175 Lexicon Terms
VR 2.7.1 अनुष्टुप्
ज्ञातिदासी यतो जाता कैकेय्यास्तु सहोषिता । प्रासादं चन्द्रसंकाशमारुरोह यदृच्छया ॥
jñātidāsī yato jātā kaikeyyāstu sahoṣitā | prāsādaṃ candrasaṃkāśamāruroha yadṛcchayā ||
English Translation
The family maid (Manthara) of Kaikeyi who had been living with her since her (Kaikeyi's) birth casually ascended the palace gleaming white like the Moon.
VR 2.7.2 अनुष्टुप्
सिक्तराजपथां कृत्स्नां प्रकीर्णकमलोत्पलाम् । अयोध्यां मन्थरा तस्मात्प्रासादादन्ववैक्षत ॥
siktarājapathāṃ kṛtsnāṃ prakīrṇakamalotpalām | ayodhyāṃ mantharā tasmātprāsādādanvavaikṣata ||
English Translation
Manthara beheld from that palace the whole of Ayodhya with its highways sprinkled with water and strewn with a lot of flowers.
VR 2.7.3 अनुष्टुप्
पताकाभिर्वरार्हाभिर्ध्वजैश्च समलंकृताम् । सिक्तां चन्दनतोयैश्च शिरःस्नातजनैर्वृताम् ॥
patākābhirvarārhābhirdhvajaiśca samalaṃkṛtām | siktāṃ candanatoyaiśca śiraḥsnātajanairvṛtām ||
VR 2.7.4 अनुष्टुप्
अविदूरे स्थितां दृष्ट्वा धात्रीं पप्रच्छ मन्थरा । उत्तमेनाभिसंयुक्ता हर्षेणार्थपरा सती ॥
avidūre sthitāṃ dṛṣṭvā dhātrīṃ papraccha mantharā | uttamenābhisaṃyuktā harṣeṇārthaparā satī ||
VR 2.7.5 उपजातिः
राममाता धनं किं नु जनेभ्यः संप्रयच्छति । अतिमात्रं प्रहर्षोऽयं किं जनस्य च शंस मे । कारयिष्यति किं वापि संप्रहृष्टो महीपतिः ॥
rāmamātā dhanaṃ kiṃ nu janebhyaḥ saṃprayacchati | atimātraṃ praharṣo'yaṃ kiṃ janasya ca śaṃsa me | kārayiṣyati kiṃ vāpi saṃprahṛṣṭo mahīpatiḥ ||
English Translation
Why do the people look exceedingly happy? Tell me, what the king with great delight is proposing to do?
VR 2.7.6 अनुष्टुप्
विदीर्यमाणा हर्षेण धात्री परमया मुदा । आचचक्षेऽथ कुब्जायै भूयसीं राघवे श्रियम् ॥
vidīryamāṇā harṣeṇa dhātrī paramayā mudā | ācacakṣe'tha kubjāyai bhūyasīṃ rāghave śriyam ||
English Translation
Bursting with great joy, the royal maid related to the hunchback the great fortune awaiting the son of the Raghus (Rama).
VR 2.7.7 अनुष्टुप्
श्वः पुष्येण जितक्रोधं यौवराज्येन राघवम् । राजा दशरथो राममभिषेचयितानघम् ॥
śvaḥ puṣyeṇa jitakrodhaṃ yauvarājyena rāghavam | rājā daśaratho rāmamabhiṣecayitānagham ||
English Translation
Tomorrow under the spell of the Pushya star, king Dasaratha will consecrate blameless Rama born in the race of Raghu as heirapparent (the maid said).
VR 2.7.8 अनुष्टुप्
धात्र्यास्तु वचनं श्रुत्वा कुब्जा क्षिप्रममर्षिता । कैलास शिखराकारात्प्रासादादवरोहत ॥
dhātryāstu vacanaṃ śrutvā kubjā kṣipramamarṣitā | kailāsa śikharākārātprāsādādavarohata ||
English Translation
Having heard these words of the royal maid, the hunchback became furious and speedily descended from that palace resembling the peak of mount Kailasa.
VR 2.7.9 अनुष्टुप्
सा दह्यमाना कोपेन मन्थरा पापदर्शिनी । शयानामेत्य कैकेयीमिदं वचनमब्रवीत् ॥
sā dahyamānā kopena mantharā pāpadarśinī | śayānāmetya kaikeyīmidaṃ vacanamabravīt ||
English Translation
The malevolent Manthara on fire with fury reached Kaikeyi lying upon her couch and said:
VR 2.7.10 अनुष्टुप्
उत्तिष्ठ मूढे किं शेषे भयं त्वामभिवर्तते । उपप्लुतमहौघेन किमात्मानं न बुध्यसे ॥
uttiṣṭha mūḍhe kiṃ śeṣe bhayaṃ tvāmabhivartate | upaplutamahaughena kimātmānaṃ na budhyase ||
English Translation
O senseless one, why are you lying down? Get up A great fear is gripping you. Why don't you realise that you are floating in a sea of perils.
VR 2.7.11 अनुष्टुप्
अनिष्टे सुभगाकारे सौभाग्येन विकत्थसे । चलं हि तव सौभाग्यं नद्यः स्रोत इवोष्णगे ॥
aniṣṭe subhagākāre saubhāgyena vikatthase | calaṃ hi tava saubhāgyaṃ nadyaḥ srota ivoṣṇage ||
English Translation
Though you appear to be your husband's darling, in reality he dislikes you. The good fortune you boast of indeed is unstable like the stream of a river in summer.
VR 2.7.12 अनुष्टुप्
एवमुक्ता तु कैकेयी रुष्टया परुषं वचः । कुब्जया पापदर्शिन्या विषादमगमत्परम् ॥
evamuktā tu kaikeyī ruṣṭayā paruṣaṃ vacaḥ | kubjayā pāpadarśinyā viṣādamagamatparam ||
English Translation
At these harsh words of the furious, evileyed hunchback Kaikeyi fell into great despondency.
VR 2.7.13 अनुष्टुप्
कैकेयी त्वब्रवीत्कुब्जां कच्चित्क्षेमं न मन्थरे । विषण्णवदनां हि त्वां लक्षये भृशदुःखिताम् ॥
kaikeyī tvabravītkubjāṃ kaccitkṣemaṃ na manthare | viṣaṇṇavadanāṃ hi tvāṃ lakṣaye bhṛśaduḥkhitām ||
English Translation
Kaikeyi said to the hunchback, O Manthara isn't all well with you? I can mark it from your dejected face how greatly distressed you feel, indeed.
VR 2.7.14 अनुष्टुप्
मन्थरा तु वचः श्रुत्वा कैकेय्या मधुराक्षरम् । उवाच क्रोधसंयुक्ता वाक्यं वाक्यविशारदा ॥
mantharā tu vacaḥ śrutvā kaikeyyā madhurākṣaram | uvāca krodhasaṃyuktā vākyaṃ vākyaviśāradā ||
English Translation
Hearing the words of Kaikeyi uttered in a gentle voice, wrathful Manthara skilled in speech, said:
VR 2.7.15 अनुष्टुप्
सा विषण्णतरा भूत्वा कुब्जा तस्या हितैषिणी । विषादयन्ती प्रोवाच भेदयन्ती च राघवम् ॥
sā viṣaṇṇatarā bhūtvā kubjā tasyā hitaiṣiṇī | viṣādayantī provāca bhedayantī ca rāghavam ||
English Translation
That hunchback feeling still more depressed in her (Kaikeyi's) interest and intending to cause in her despondency and distance Rama from her spoke out:
VR 2.7.16 अनुष्टुप्
अक्षेमं सुमहद्देवि प्रवृत्तं त्वद्विनाशनम् । रामं दशरथो राजा यौवराज्येऽभिषेक्ष्यति ॥
akṣemaṃ sumahaddevi pravṛttaṃ tvadvināśanam | rāmaṃ daśaratho rājā yauvarājye'bhiṣekṣyati ||
English Translation
O queen, your end is approaching, and it has no end and it is overwhelming. King Dasaratha is crowning Rama as heirapparent.
VR 2.7.17 अनुष्टुप्
सास्म्यगाधे भये मग्ना दुःखशोकसमन्विता । दह्यमानानलेनेव त्वद्धितार्थमिहागता ॥
sāsmyagādhe bhaye magnā duḥkhaśokasamanvitā | dahyamānānaleneva tvaddhitārthamihāgatā ||
English Translation
Plunged in unfathomable fear and stricken with grief and tears I am here seeking your wellbeing and yet consumed as though by fire.
VR 2.7.18 अनुष्टुप्
तव दुःखेन कैकेयि मम दुःखं महद्भवेत् । त्वद्वृद्धौ मम वृद्धिश्च भवेदत्र न संशयः ॥
tava duḥkhena kaikeyi mama duḥkhaṃ mahadbhavet | tvadvṛddhau mama vṛddhiśca bhavedatra na saṃśayaḥ ||
English Translation
O Kaikeyi, your sorrow will augment my sorrow. Your prosperity would mean my prosperity. There is no doubt about this.
VR 2.7.19 अनुष्टुप्
नराधिपकुले जाता महिषी त्वं महीपतेः । उग्रत्वं राजधर्माणां कथं देवि न बुध्यसे ॥
narādhipakule jātā mahiṣī tvaṃ mahīpateḥ | ugratvaṃ rājadharmāṇāṃ kathaṃ devi na budhyase ||
English Translation
O queen, born in the royal family and being a king's consort why don't you realise the ruthless ways of statecraft?
VR 2.7.20 अनुष्टुप्
धर्मवादी शठो भर्ता श्लक्ष्णवादी च दारुणः । शुद्धभावे न जानीषे तेनैवमतिसंधिता ॥
dharmavādī śaṭho bhartā ślakṣṇavādī ca dāruṇaḥ | śuddhabhāve na jānīṣe tenaivamatisaṃdhitā ||
English Translation
Your husband speaks morals publicly but in private he is deceitful. He speaks gently but acts cruelly. Because of your innocent nature you are beguiled by him. You do not understand this.
VR 2.7.21 अनुष्टुप्
उपस्थितं प्रयुञ्जानस्त्वयि सान्त्वमनर्थकम् । अर्थेनैवाद्य ते भर्ता कौसल्यां योजयिष्यति ॥
upasthitaṃ prayuñjānastvayi sāntvamanarthakam | arthenaivādya te bhartā kausalyāṃ yojayiṣyati ||
English Translation
When your husband approaches you he swears in meaningless, appeasing words. But today he is going to bestow benefit on Kausalya only.
VR 2.7.22 अनुष्टुप्
अपवाह्य स दुष्टात्मा भरतं तव बन्धुषु । काल्यं स्थापयिता रामं राज्ये निहतकण्टके ॥
apavāhya sa duṣṭātmā bharataṃ tava bandhuṣu | kālyaṃ sthāpayitā rāmaṃ rājye nihatakaṇṭake ||
English Translation
That evilminded one, having sent Bharata away to your relations house, is going to install Rama unhindered in the kingdom at dawn tomorrow.
VR 2.7.23 अनुष्टुप्
शत्रुः पतिप्रवादेन मात्रेव हितकाम्यया । आशीविष इवाङ्केन बाले परिधृतस्त्वया ॥
śatruḥ patipravādena mātreva hitakāmyayā | āśīviṣa ivāṅkena bāle paridhṛtastvayā ||
English Translation
O innocent lady with the intention of doing good like a mother to your husband who is your enemy, you are holding on your lap a venomous serpent.
VR 2.7.24 अनुष्टुप्
यथा हि कुर्यात्सर्पो वा शत्रुर्वा प्रत्युपेक्षितः । राज्ञा दशरथेनाद्य सपुत्रा त्वं तथा कृता ॥
yathā hi kuryātsarpo vā śatrurvā pratyupekṣitaḥ | rājñā daśarathenādya saputrā tvaṃ tathā kṛtā ||
English Translation
King Dasaratha has done to you and to your son the same thing as a snake or an enemy would do when ignored.
VR 2.7.25 अनुष्टुप्
पापेनानृतसान्त्वेन बाले नित्यं सुखोचिते । रामं स्थापयता राज्ये सानुबन्धा हता ह्यसि ॥
pāpenānṛtasāntvena bāle nityaṃ sukhocite | rāmaṃ sthāpayatā rājye sānubandhā hatā hyasi ||
English Translation
O senseless lady, you are always accustomed to comfort. With deceitful words of appeasement that vicious one (King Dasaratha) is going to install Rama in the kingdom. You along with your son have been surely ruined.
VR 2.7.26 अनुष्टुप्
सा प्राप्तकालं कैकेयि क्षिप्रं कुरु हितं तव । त्रायस्व पुत्रमात्मानं मां च विस्मयदर्शने ॥
sā prāptakālaṃ kaikeyi kṣipraṃ kuru hitaṃ tava | trāyasva putramātmānaṃ māṃ ca vismayadarśane ||
English Translation
O enchantingeyed Kaikeyi, that appropriate time has come. Act quickly for your own wellbeing. Save yourself, your son and me too.
VR 2.7.27 अनुष्टुप्
मन्थराया वचः श्रुत्वा शयनात्सा शुभानना । एकमाभरणं तस्यै कुब्जायै प्रददौ शुभम् ॥
mantharāyā vacaḥ śrutvā śayanātsā śubhānanā | ekamābharaṇaṃ tasyai kubjāyai pradadau śubham ||
English Translation
Hearing the words of Manthara, Kaikeyi of charming countenance lying in her couch rose, full of joy, like the autumnal streak of the Moon's crescent.
VR 2.7.28 अनुष्टुप्
दत्त्वा त्वाभरणं तस्यै कुब्जायै प्रमदोत्तमा । कैकेयी मन्थरां हृष्टा पुनरेवाब्रवीदिदम् ॥
dattvā tvābharaṇaṃ tasyai kubjāyai pramadottamā | kaikeyī mantharāṃ hṛṣṭā punarevābravīdidam ||
English Translation
Kaikeyi, the best among the beauties, having given the ornament to Manthara, the hunchback, looked at her and said these words again:
VR 2.7.29 अनुष्टुप्
इदं तु मन्थरे मह्यमाख्यासि परमं प्रियम् । एतन्मे प्रियमाख्यातुः किं वा भूयः करोमि ते ॥
idaṃ tu manthare mahyamākhyāsi paramaṃ priyam | etanme priyamākhyātuḥ kiṃ vā bhūyaḥ karomi te ||
English Translation
O Manthara, the news you have brought me is exceedingly pleasant. What more can I do for you? Here is the gift for one who brings good tidings.
VR 2.7.30 अनुष्टुप्
रामे वा भरते वाहं विशेषं नोपलक्षये । तस्मात्तुष्टास्मि यद्राजा रामं राज्येऽभिषेक्ष्यति ॥
rāme vā bharate vāhaṃ viśeṣaṃ nopalakṣaye | tasmāttuṣṭāsmi yadrājā rāmaṃ rājye'bhiṣekṣyati ||
English Translation
I do not see any distinction between Rama and Bharata as such. I am contented with Rama's consecration in the kingdom.
VR 2.7.31 वंशस्थम्
न मे परं किंचिदितस्त्वया पुनः; प्रियं प्रियार्हे सुवचं वचो वरम् । तथा ह्यवोचस्त्वमतः प्रियोत्तरं; वरं परं ते प्रददामि तं वृणु ॥
na me paraṃ kiṃciditastvayā punaḥ; priyaṃ priyārhe suvacaṃ vaco varam | tathā hyavocastvamataḥ priyottaraṃ; varaṃ paraṃ te pradadāmi taṃ vṛṇu ||
English Translation
O woman worthy of affection for me there is nothing greater and dearer than this news. I will grant you another reward better than this. Just ask for it.इत्यार्षे श्रीमद्रामायणे वाल्मीकीय आदिकाव्ये अयोध्याकाण्डे सप्तमस्सर्गः॥Thus ends the seventh sarga of Ayodhyakanda of the holy Ramayana, the first epic composed by sage Valmiki.
← Previous (Ch. 82) Full Table of Contents Next (Ch. 84) →