Special Call Prof. Jay L. Garfield Commemorative Volume · Submissions Open
Announcements Newsletters About Us Contact
Search
VR
Vālmīki Rāmāyaṇam • Kāṇḍa 2 (Ayodhyākāṇḍa) • Sarga 107

Ayodhyākāṇḍa Sarga 107

अयोध्याकाण्डम् • सर्गः 107

Ayodhyākāṇḍa Sarga 107 of the classical Vālmīki Rāmāyaṇa with 22 verses.

Total: 22 Verses • Citations: VR 2.107.1–22 • 175 Lexicon Terms
VR 2.107.1 अनुष्टुप्
ततो निक्षिप्य मातॄः स अयोध्यायां दृढव्रतः । भरतः शोकसंतप्तो गुरूनिदमथाब्रवीत् ॥
tato nikṣipya mātṝḥ sa ayodhyāyāṃ dṛḍhavrataḥ | bharataḥ śokasaṃtapto gurūnidamathābravīt ||
English Translation
After keeping his mothers in Ayodhya, the griefstricken Bharata who was firm in his vows, said to the elders:
VR 2.107.2 अनुष्टुप्
नन्दिग्रामं गमिष्यामि सर्वानामन्त्रयेऽद्य वः । तत्र दुःखमिदं सर्वं सहिष्ये राघवं विना ॥
nandigrāmaṃ gamiṣyāmi sarvānāmantraye'dya vaḥ | tatra duḥkhamidaṃ sarvaṃ sahiṣye rāghavaṃ vinā ||
English Translation
I take leave of all of you. I am going to Nandigrama where I shall keep company with grief on account of Rama's absence.
VR 2.107.3 अनुष्टुप्
गतश्च हि दिवं राजा वनस्थश्च गुरुर्मम । रामं प्रतीक्षे राज्याय स हि राजा महायशाः ॥
gataśca hi divaṃ rājā vanasthaśca gururmama | rāmaṃ pratīkṣe rājyāya sa hi rājā mahāyaśāḥ ||
English Translation
King Dasaratha has gone to heaven. My elder brother and guru is in the forest. I shall await his return for ruling the kingdom since he alone is the illustrious king of Ayodhya.
VR 2.107.4 अनुष्टुप्
एतच्छ्रुत्वा शुभं वाक्यं भरतस्य महात्मनः । अब्रुवन्मन्त्रिणः सर्वे वसिष्ठश्च पुरोहितः ॥
etacchrutvā śubhaṃ vākyaṃ bharatasya mahātmanaḥ | abruvanmantriṇaḥ sarve vasiṣṭhaśca purohitaḥ ||
English Translation
Hearing the auspicious words of the magnanimous Bharata, sage Bharadwaja said to him in words still more auspicious.
VR 2.107.5 अनुष्टुप्
सदृशं श्लाघनीयं च यदुक्तं भरत त्वया । वचनं भ्रातृवात्सल्यादनुरूपं तवैव तत् ॥
sadṛśaṃ ślāghanīyaṃ ca yaduktaṃ bharata tvayā | vacanaṃ bhrātṛvātsalyādanurūpaṃ tavaiva tat ||
English Translation
O Bharata, the words you have uttered out of devotion to your brother which befit you alone are highly praiseworthy.
VR 2.107.6 अनुष्टुप्
नित्यं ते बन्धुलुब्धस्य तिष्ठतो भ्रातृसौहृदे । आर्यमार्गं प्रपन्नस्य नानुमन्येत कः पुमान् ॥
nityaṃ te bandhulubdhasya tiṣṭhato bhrātṛsauhṛde | āryamārgaṃ prapannasya nānumanyeta kaḥ pumān ||
English Translation
You are always attached to your relations, firmly established in the welfare of your brothers and are pursuing a noble path. Who would not approve of this?
VR 2.107.7 अनुष्टुप्
मन्त्रिणां वचनं श्रुत्वा यथाभिलषितं प्रियम् । अब्रवीत्सारथिं वाक्यं रथो मे युज्यतामिति ॥
mantriṇāṃ vacanaṃ śrutvā yathābhilaṣitaṃ priyam | abravītsārathiṃ vākyaṃ ratho me yujyatāmiti ||
English Translation
On hearing the pleasing words of the counsellors which were in conformity with his desire, Bharata said to his charioteer, 'Harness my chariot'.
VR 2.107.8 अनुष्टुप्
प्रहृष्टवदनः सर्वा मातॄः समभिवाद्य सः । आरुरोह रथं श्रीमाञ्शत्रुघ्नेन समन्वितः ॥
prahṛṣṭavadanaḥ sarvā mātṝḥ samabhivādya saḥ | āruroha rathaṃ śrīmāñśatrughnena samanvitaḥ ||
English Translation
Then Bharata accompanied by Satrughna, placing the sandals on his head in delight, boarded the chariot.
VR 2.107.9 अनुष्टुप्
आरुह्य तु रथं शीघ्रं शत्रुघ्नभरतावुभौ । ययतुः परमप्रीतौ वृतौ मन्त्रिपुरोहितैः ॥
āruhya tu rathaṃ śīghraṃ śatrughnabharatāvubhau | yayatuḥ paramaprītau vṛtau mantripurohitaiḥ ||
English Translation
Highly pleased, Bharata and Satrughna ascended the chariot and, surrounded by counsellors and priests, set out speedily.
VR 2.107.10 अनुष्टुप्
अग्रतो पुरवस्तत्र वसिष्ठ प्रमुखा द्विजाः । प्रययुः प्राङ्मुखाः सर्वे नन्दिग्रामो यतोऽभवत् ॥
agrato puravastatra vasiṣṭha pramukhā dvijāḥ | prayayuḥ prāṅmukhāḥ sarve nandigrāmo yato'bhavat ||
English Translation
Preceded by preceptors, like Vasistha and other brahmins, all of them proceeded eastward in the direction of Nandigrama.
VR 2.107.11 अनुष्टुप्
बलं च तदनाहूतं गजाश्वरथसंकुलम् । प्रययौ भरते याते सर्वे च पुरवासिनः ॥
balaṃ ca tadanāhūtaṃ gajāśvarathasaṃkulam | prayayau bharate yāte sarve ca puravāsinaḥ ||
English Translation
When Bharata left, the army with hordes of elephants, horses and chariots and inhabitants of Ayodhya followed him unbidden.
VR 2.107.12 अनुष्टुप्
रथस्थः स तु धर्मात्मा भरतो भ्रातृवत्सलः । नन्दिग्रामं ययौ तूर्णं शिरस्याधाय पादुके ॥
rathasthaḥ sa tu dharmātmā bharato bhrātṛvatsalaḥ | nandigrāmaṃ yayau tūrṇaṃ śirasyādhāya pāduke ||
English Translation
Righteous Bharata who was deeply attached to his brother proceeded speedily towards Nandigrama on the chariot bearing the sandals of Rama on his head.
VR 2.107.13 अनुष्टुप्
ततस्तु भरतः क्षिप्रं नन्दिग्रामं प्रविश्य सः । अवतीर्य रथात्तूर्णं गुरूनिदमुवाच ह ॥
tatastu bharataḥ kṣipraṃ nandigrāmaṃ praviśya saḥ | avatīrya rathāttūrṇaṃ gurūnidamuvāca ha ||
English Translation
Bharata entered Nandigrama quickly, alighted from the chariot and then, addressing, the preceptors, said:
VR 2.107.14 उपजातिः
एतद्राज्यं मम भ्रात्रा दत्तं संन्यासवत्स्वयम् । योगक्षेमवहे चेमे पादुके हेमभूषिते । तमिमं पालयिष्यामि राघवागमनं प्रति ॥
etadrājyaṃ mama bhrātrā dattaṃ saṃnyāsavatsvayam | yogakṣemavahe ceme pāduke hemabhūṣite | tamimaṃ pālayiṣyāmi rāghavāgamanaṃ prati ||
English Translation
My brother gave me this kingdom as a trust. He gave me the sandals decorated with gold for securing the prosperity and security (of the kingdom).
VR 2.107.15 अनुष्टुप्
क्षिप्रं संयोजयित्वा तु राघवस्य पुनः स्वयम् । चरणौ तौ तु रामस्य द्रक्ष्यामि सहपादुकौ ॥
kṣipraṃ saṃyojayitvā tu rāghavasya punaḥ svayam | caraṇau tau tu rāmasya drakṣyāmi sahapādukau ||
English Translation
'I myself shall see soon Rama's feet reunited with these sandals.
VR 2.107.16 अनुष्टुप्
ततो निक्षिप्तभारोऽहं राघवेण समागतः । निवेद्य गुरवे राज्यं भजिष्ये गुरुवृत्तिताम् ॥
tato nikṣiptabhāro'haṃ rāghaveṇa samāgataḥ | nivedya gurave rājyaṃ bhajiṣye guruvṛttitām ||
English Translation
The burden of this kingdom has been cast on me. On reunion with Rama, I shall hand it over to my brother, my guru and shall be engaged in his service.
VR 2.107.17 अनुष्टुप्
राघवाय च संन्यासं दत्त्वेमे वरपादुके । राज्यं चेदमयोध्यां च धूतपापो भवामि च ॥
rāghavāya ca saṃnyāsaṃ dattveme varapāduke | rājyaṃ cedamayodhyāṃ ca dhūtapāpo bhavāmi ca ||
English Translation
Restoring the sacred sandals, the kingdom and this city of Ayodhya held as a trust by me, I shall be cleansed of the sin.
VR 2.107.18 अनुष्टुप्
अभिषिक्ते तु काकुत्स्थे प्रहृष्टमुदिते जने । प्रीतिर्मम यशश्चैव भवेद्राज्याच्चतुर्गुणम् ॥
abhiṣikte tu kākutsthe prahṛṣṭamudite jane | prītirmama yaśaścaiva bhavedrājyāccaturguṇam ||
English Translation
After Rama is coronated and the people are delighted and pleased, the renown and pleasure for me will be fourfold (what is obtained from ruling the kingdom).
VR 2.107.19 अनुष्टुप्
एवं तु विलपन्दीनो भरतः स महायशाः । नन्दिग्रामेऽकरोद्राज्यं दुःखितो मन्त्रिभिः सह ॥
evaṃ tu vilapandīno bharataḥ sa mahāyaśāḥ | nandigrāme'karodrājyaṃ duḥkhito mantribhiḥ saha ||
English Translation
Thus lamenting in desolation and grief, the illustrious Bharata lived in Nandigrama along with his counsellors and started ruling the kingdom.
VR 2.107.20 अनुष्टुप्
स वल्कलजटाधारी मुनिवेषधरः प्रभुः । नन्दिग्रामेऽवसद्वीरः ससैन्यो भरतस्तदा ॥
sa valkalajaṭādhārī muniveṣadharaḥ prabhuḥ | nandigrāme'vasadvīraḥ sasainyo bharatastadā ||
English Translation
Bharata, the warrior and lord, wore bark garments and matted locks and lived the life of an ascetic in Nandigrama along with his army.
VR 2.107.21 अनुष्टुप्
रामागमनमाकाङ्क्षन्भरतो भ्रातृवत्सलः । भ्रातुर्वचनकारी च प्रतिज्ञापारगस्तदा ॥
rāmāgamanamākāṅkṣanbharato bhrātṛvatsalaḥ | bhrāturvacanakārī ca pratijñāpāragastadā ||
English Translation
Bharata who was attached to his brother and ever obedient to him, fulfilled his vow. He coronated the sandals and lived at Nandigrama longing for the return of Rama.
VR 2.107.22 अनुष्टुप्
पादुके त्वभिषिच्याथ नन्दिग्रामेऽवसत्तदा । भरतः शासनं सर्वं पादुकाभ्यां न्यवेदयत् ॥
pāduke tvabhiṣicyātha nandigrāme'vasattadā | bharataḥ śāsanaṃ sarvaṃ pādukābhyāṃ nyavedayat ||
English Translation
Bharata reported everything relating to the kingdom to the sandals first. Waving the chamaras (a fan made of yak tail) himself, he held the royal parasol over them.
← Previous (Ch. 182) Full Table of Contents Next (Ch. 184) →