उपास्मै गायता नरः पवमानायेन्दवे । अभि देवाँ इयक्षते ॥
upāsmai gāyatā naraḥ pavamānāyendave । abhi devām̐ iyakṣate ॥
अभि ते मधुना पयोऽथर्वाणो अशिश्रयुः । देवं देवाय देवयु ॥
abhi te madhunā payo'tharvāṇo aśiśrayuḥ । devaṃ devāya devayu ॥
स नः पवस्व शं गवे शं जनाय शमर्वते । शँ राजन्नोषधीभ्यः ॥
sa naḥ pavasva śaṃ gave śaṃ janāya śamarvate । śam̐ rājannoṣadhībhyaḥ ॥
दविद्युतत्या रुचा परिष्टोभन्त्या कृपा । सोमाः शुक्रा गवाशिरः ॥
davidyutatyā rucā pariṣṭobhantyā kṛpā । somāḥ śukrā gavāśiraḥ ॥
हिन्वानो हेतृभिर्हित आ वाजं वाज्यक्रमीत् । सीदन्तो वनुषो यथा ॥
hinvāno hetṛbhirhita ā vājaṃ vājyakramīt । sīdanto vanuṣo yathā ॥
ऋधक्सोम स्वस्तये सञ्जग्मानो दिवा कवे । पवस्व सूर्यो दृशे ॥
ṛdhaksoma svastaye sañjagmāno divā kave । pavasva sūryo dṛśe ॥
पवमानस्य ते कवे वाजिन्त्सर्गा असृक्षते । अर्वन्तो न श्रवस्यवः ॥
pavamānasya te kave vājintsargā asṛkṣate । arvanto na śravasyavaḥ ॥
अच्छा कोशं मधुश्चुतमसृग्रं वारे अव्यये । अवावशन्त धीतयः ॥
acchā kośaṃ madhuścutamasṛgraṃ vāre avyaye । avāvaśanta dhītayaḥ ॥
अच्छा समुद्रमिन्दवोऽस्तं गावो न धेनवः । अग्मन्नृतस्य योनिमा ॥
acchā samudramindavo'staṃ gāvo na dhenavaḥ । agmannṛtasya yonimā ॥
अग्न आ याहि वीतये गृणानो हव्यदातये । नि होता सत्सि बर्हिषि ॥
agna ā yāhi vītaye gṛṇāno havyadātaye । ni hotā satsi barhiṣi ॥
तं त्वा समिद्भिरङ्गिरो घृतेन वर्धयामसि । बृहच्छोचा यविष्ठ्य ॥
taṃ tvā samidbhiraṅgiro ghṛtena vardhayāmasi । bṛhacchocā yaviṣṭhya ॥
स नः पृथु श्रवाय्यमच्छा देव विवाससि । बृहदग्ने सुवीर्यम् ॥
sa naḥ pṛthu śravāyyamacchā deva vivāsasi । bṛhadagne suvīryam ॥
आ नो मित्रावरुणा घृतैर्गव्यूतिमुक्षतम् । मध्वा रजाँसि सुक्रतू ॥
ā no mitrāvaruṇā ghṛtairgavyūtimukṣatam । madhvā rajām̐si sukratū ॥
उरुशँसा नमोवृधा मह्ना दक्षस्य राजथः । द्राघिष्ठाभिः शुचिव्रता ॥
uruśam̐sā namovṛdhā mahnā dakṣasya rājathaḥ । drāghiṣṭhābhiḥ śucivratā ॥
गृणाना जमदग्निना योनावृतस्य सीदतम् । पातँ सोममृतावृधा ॥
gṛṇānā jamadagninā yonāvṛtasya sīdatam । pātam̐ somamṛtāvṛdhā ॥
आ याहि सुषुमा हि त इन्द्र सोमं पिबा इमम् । एदं बर्हिः सदो मम ॥
ā yāhi suṣumā hi ta indra somaṃ pibā imam । edaṃ barhiḥ sado mama ॥
आ त्वा ब्रह्मयुजा हरी वहतामिन्द्र केशिना । उप ब्रह्माणि नः शृणु ॥
ā tvā brahmayujā harī vahatāmindra keśinā । upa brahmāṇi naḥ śaṛṇu ॥
ब्रह्माणस्त्वा युजा वयँ सोमपामिन्द्र सोमिनः । सुतावन्तो हवामहे ॥
brahmāṇastvā yujā vayam̐ somapāmindra sominaḥ । sutāvanto havāmahe ॥
इन्द्राग्नी आ गतँ सुतं गीर्भिर्नभो वरेण्यम् । अस्य पातं धियेषिता ॥
indrāgnī ā gatam̐ sutaṃ gīrbhirnabho vareṇyam । asya pātaṃ dhiyeṣitā ॥
इन्द्राग्नी जरितुः सचा यज्ञो जिगाति चेतनः । अया पातमिमँ सुतम् ॥
indrāgnī jarituḥ sacā yajño jigāti cetanaḥ । ayā pātamimam̐ sutam ॥
इन्द्रमग्निं कविच्छदा यज्ञस्य जूत्या वृणे । ता सोमस्येह तृम्पताम् ॥
indramagniṃ kavicchadā yajñasya jūtyā vṛṇe । tā somasyeha tṛmpatām ॥
उच्चा ते जातमन्धसो दिवि सद्भूम्या ददे । उग्रँ शर्म महि श्रवः ॥
uccā te jātamandhaso divi sadbhūmyā dade । ugram̐ śarma mahi śravaḥ ॥
स न इन्द्राय यज्यवे वरुणाय मरुद्भ्यः । वरिवोवित्परि स्रव ॥
sa na indrāya yajyave varuṇāya marudbhyaḥ । varivovitpari srava ॥
एना विश्वान्यर्य आ द्युम्नानि मानुषाणाम् । सिषासन्तो वनामहे ॥
enā viśvānyarya ā dyumnāni mānuṣāṇām । siṣāsanto vanāmahe ॥
पुनानः सोम धारयापो वसानो अर्षसि । आ रत्नधा योनिमृतस्य सीदस्युत्सो देवो हिरण्ययः ॥
punānaḥ soma dhārayāpo vasāno arṣasi । ā ratnadhā yonimṛtasya sīdasyutso devo hiraṇyayaḥ ॥
दुहान ऊधर्दिव्यं मधु प्रियं प्रत्नँ सधस्थमासदत् । आपृच्छ्यं धरुणं वाज्यर्षसि नृभिर्धौतो विचक्षणः ॥
duhāna ūdhardivyaṃ madhu priyaṃ pratnam̐ sadhasthamāsadat । āpṛcchyaṃ dharuṇaṃ vājyarṣasi nṛbhirdhauto vicakṣaṇaḥ ॥
प्र तु द्रव परि कोशं नि षीद नृभिः पुनानो अभि वाजमर्ष । अश्वं न त्वा वाजिनं मर्जयन्तोऽच्छा बर्ही रशनाभिर्नयन्ति ॥
pra tu drava pari kośaṃ ni ṣīda nṛbhiḥ punāno abhi vājamarṣa । aśvaṃ na tvā vājinaṃ marjayanto'cchā barhī raśanābhirnayanti ॥
स्वायुधः पवते देव इन्दुरशस्तिहा वृजना रक्षमाणः । पिता देवानां जनिता सुदक्षो विष्टम्भो दिवो धरुणः पृथिव्याः ॥
svāyudhaḥ pavate deva induraśastihā vṛjanā rakṣamāṇaḥ । pitā devānāṃ janitā sudakṣo viṣṭambho divo dharuṇaḥ pṛthivyāḥ ॥
ऋषिर्विप्रः पुरएता जनानामृभुर्धीर उशना काव्येन । स चिद्विवेद निहितं यदासामपीच्या३ं गुह्यं नाम गोनाम् ॥
ṛṣirvipraḥ puraetā janānāmṛbhurdhīra uśanā kāvyena । sa cidviveda nihitaṃ yadāsāmapīcyā३ṃ guhyaṃ nāma gonām ॥
अभि त्वा शूर नोनुमोऽदुग्धा इव धेनवः । ईशानमस्य जगतः स्वर्दृशमीशानमिन्द्र तस्थुषः ॥
abhi tvā śūra nonumo'dugdhā iva dhenavaḥ । īśānamasya jagataḥ svardṛśamīśānamindra tasthuṣaḥ ॥
