पुरूतमं पुरूणामीशानं वार्याणाम् । इन्द्रँ सोमे सचा सुते ॥
purūtamaṃ purūṇāmīśānaṃ vāryāṇām । indram̐ some sacā sute ॥
स घा नो योग आ भुवत्स राये स पुरन्ध्या । गमद्वाजेभिरा स नः ॥
sa ghā no yoga ā bhuvatsa rāye sa purandhyā । gamadvājebhirā sa naḥ ॥
योगेयोगे तवस्तरं वाजेवाजे हवामहे । सखाय इन्द्रमूतये ॥
yogeyoge tavastaraṃ vājevāje havāmahe । sakhāya indramūtaye ॥
अनु प्रत्नस्यौकसो हुवे तुविप्रतिं नरम् । यं ते पूर्वं पिता हुवे ॥
anu pratnasyaukaso huve tuvipratiṃ naram । yaṃ te pūrvaṃ pitā huve ॥
आ घा गमद्यदि श्रवत्सहस्रिणीभिरूतिभिः । वाजेभिरुप नो हवम् ॥
ā ghā gamadyadi śravatsahasriṇībhirūtibhiḥ । vājebhirupa no havam ॥
इन्द्र सुतेषु सोमेषु क्रतुं पुनीष उक्थ्यम् । विदे वृधस्य दक्षस्य महाँ हि षः ॥
indra suteṣu someṣu kratuṃ punīṣa ukthyam । vide vṛdhasya dakṣasya mahām̐ hi ṣaḥ ॥
स प्रथमे व्योमनि देवानाँ सदने वृधः । सुपारः सुश्रवस्तमः समप्सुजित् ॥
sa prathame vyomani devānām̐ sadane vṛdhaḥ । supāraḥ suśravastamaḥ samapsujit ॥
तमु हुवे वाजसातय इन्द्रं भराय शुष्मिणम् । भवा नः सुम्ने अन्तमः सखा वृधे ॥
tamu huve vājasātaya indraṃ bharāya śuṣmiṇam । bhavā naḥ sumne antamaḥ sakhā vṛdhe ॥
एना वो अग्निं नमसोर्जो नपातमा हुवे । प्रियं चेतिष्ठमरतिँ स्वध्वरं विश्वस्य दूतममृतम् ॥
enā vo agniṃ namasorjo napātamā huve । priyaṃ cetiṣṭhamaratim̐ svadhvaraṃ viśvasya dūtamamṛtam ॥
स योजते अरुषा विश्वभोजसा स दुद्रवत्स्वाहुतः । सुब्रह्मा यज्ञः सुशमी वसूनां देवँ राधो जनानाम् ॥
sa yojate aruṣā viśvabhojasā sa dudravatsvāhutaḥ । subrahmā yajñaḥ suśamī vasūnāṃ devam̐ rādho janānām ॥
प्रत्यु अदर्श्यायत्यू३च्छन्ती दुहिता दिवः । अपो मही वृणुते चक्षुषा तमो ज्योतिष्कृणोति सूनरी ॥
pratyu adarśyāyatyū३cchantī duhitā divaḥ । apo mahī vṛṇute cakṣuṣā tamo jyotiṣkṛṇoti sūnarī ॥
उदुस्रियाः सृजते सूर्यः सचा उद्यन्नक्षत्रमर्चिवत् । तवेदुषो व्युषि सूर्यस्य च सं भक्तेन गमेमहि ॥
udusriyāḥ sṛjate sūryaḥ sacā udyannakṣatramarcivat । taveduṣo vyuṣi sūryasya ca saṃ bhaktena gamemahi ॥
इमा उ वां दिविष्टय उस्रा हवन्ते अश्विना । अयं वामह्वेऽवसे शचीवसू विशंविशँ हि गच्छथः ॥
imā u vāṃ diviṣṭaya usrā havante aśvinā । ayaṃ vāmahve'vase śacīvasū viśaṃviśam̐ hi gacchathaḥ ॥
युवं चित्रं ददथुर्भोजनं नरा चोदेथाँ सूनृतावते । अर्वाग्रथँ समनसा नि यच्छतं पिबतँ सोम्यं मधु ॥
yuvaṃ citraṃ dadathurbhojanaṃ narā codethām̐ sūnṛtāvate । arvāgratham̐ samanasā ni yacchataṃ pibatam̐ somyaṃ madhu ॥
अस्य प्रत्नामनु द्युतँ शुक्रं दुदुह्रे अह्रयः । पयः सहस्रसामृषिम् ॥
asya pratnāmanu dyutam̐ śukraṃ duduhre ahrayaḥ । payaḥ sahasrasāmṛṣim ॥
अयँ सूर्य इवोपदृगयँ सराँसि धावति । सप्त प्रवत आ दिवम् ॥
ayam̐ sūrya ivopadṛgayam̐ sarām̐si dhāvati । sapta pravata ā divam ॥
अयं विश्वानि तिष्ठति पुनानो भुवनोपरि । सोमो देवो न सूर्यः ॥
ayaṃ viśvāni tiṣṭhati punāno bhuvanopari । somo devo na sūryaḥ ॥
एष प्रत्नेन जन्मना देवो देवेभ्यः सुतः । हरिः पवित्रे अर्षति ॥
eṣa pratnena janmanā devo devebhyaḥ sutaḥ । hariḥ pavitre arṣati ॥
एष प्रत्नेन मन्मना देवो देवेभ्यस्परि । कविर्विप्रेण वावृधे ॥
eṣa pratnena manmanā devo devebhyaspari । kavirvipreṇa vāvṛdhe ॥
दुहानः प्रत्नमित्पयः पवित्रे परि षिच्यसे । क्रन्दं देवाँ अजीजनः ॥
duhānaḥ pratnamitpayaḥ pavitre pari ṣicyase । krandaṃ devām̐ ajījanaḥ ॥
उप शिक्षापतस्थुषो भियसमा धेहि शत्रवे । पवमान विदा रयिम् ॥
upa śikṣāpatasthuṣo bhiyasamā dhehi śatrave । pavamāna vidā rayim ॥
उषो षु जातमप्तुरं गोभिर्भङ्गं परिष्कृतम् । इन्दुं देवा अयासिषुः ॥
uṣo ṣu jātamapturaṃ gobhirbhaṅgaṃ pariṣkṛtam । induṃ devā ayāsiṣuḥ ॥
उपास्मै गायता नरः पवमानायेन्दवे । अभि देवाँ इयक्षते ॥
upāsmai gāyatā naraḥ pavamānāyendave । abhi devām̐ iyakṣate ॥
प्र सोमासो विपश्चितोऽपो नयन्त ऊर्मयः । वनानि महिषा इव ॥
pra somāso vipaścito'po nayanta ūrmayaḥ । vanāni mahiṣā iva ॥
अभि द्रोणानि बभ्रवः शुक्रा ऋतस्य धारया । वाजं गोमन्तमक्षरन् ॥
abhi droṇāni babhravaḥ śukrā ṛtasya dhārayā । vājaṃ gomantamakṣaran ॥
सुता इन्द्राय वायवे वरुणाय मरुद्भ्यः । सोमा अर्षन्तु विष्णवे ॥
sutā indrāya vāyave varuṇāya marudbhyaḥ । somā arṣantu viṣṇave ॥
प्र सोम देववीतये सिन्धुर्न पिप्ये अर्णसा । अँशोः पयसा मदिरो न जागृविरच्छा कोशं मधुश्चुतम् ॥
pra soma devavītaye sindhurna pipye arṇasā । am̐śoḥ payasā madiro na jāgṛviracchā kośaṃ madhuścutam ॥
आ हर्यतो अर्जुनो अत्के अव्यत प्रियः सूनुर्न मर्ज्यः । तमीँ हिन्वन्त्यपसो यथा रथं नदीष्वा गभस्त्योः ॥
ā haryato arjuno atke avyata priyaḥ sūnurna marjyaḥ । tamīm̐ hinvantyapaso yathā rathaṃ nadīṣvā gabhastyoḥ ॥
प्र सोमासो मदच्युतः श्रवसे नो मघोनाम् । सुता विदथे अक्रमुः ॥
pra somāso madacyutaḥ śravase no maghonām । sutā vidathe akramuḥ ॥
आदीँ हँसो यथा गणं विश्वस्यावीवशन्मतिम् । अत्यो न गोभिरज्यते ॥
ādīm̐ ham̐so yathā gaṇaṃ viśvasyāvīvaśanmatim । atyo na gobhirajyate ॥
