वार्ण त्वा यव्याभिर्वर्धन्ति शूर ब्रह्माणि । ववृध्वाँसं चिदद्रिवो दिवेदिवे ॥
vārṇa tvā yavyābhirvardhanti śūra brahmāṇi । vavṛdhvām̐saṃ cidadrivo divedive ॥
युञ्जन्ति हरी इषिरस्य गाथयोरौ रथ उरुयुगे वचोयुजा । इन्द्रवाहा स्वर्विदा ॥
yuñjanti harī iṣirasya gāthayorau ratha uruyuge vacoyujā । indravāhā svarvidā ॥
पान्तमा वो अन्धस इन्द्रमभि प्र गायत । विश्वासाहँ शत्क्रतुं मँहिष्ठं चर्षणीनाम् ॥
pāntamā vo andhasa indramabhi pra gāyata । viśvāsāham̐ śatkratuṃ mam̐hiṣṭhaṃ carṣaṇīnām ॥
पुरुहूतं पुरुष्टुतं गाथान्या३ँ सनश्रुतम् । इन्द्र इति ब्रवीतन ॥
puruhūtaṃ puruṣṭutaṃ gāthānyā३m̐ sanaśrutam । indra iti bravītana ॥
इन्द्र इन्नो महोनां दाता वाजानां नृतुः । महाँ अभिज्ञ्वा यमत् ॥
indra inno mahonāṃ dātā vājānāṃ nṛtuḥ । mahām̐ abhijñvā yamat ॥
प्र व इन्द्राय मादनँ हर्यश्वाय गायत । सखायः सोमपाव्ने ॥
pra va indrāya mādanam̐ haryaśvāya gāyata । sakhāyaḥ somapāvne ॥
शँसेदुक्थँ सुदानव उत द्युक्षं यथ नरः । चकृमा सत्यराधसे ॥
śam̐seduktham̐ sudānava uta dyukṣaṃ yatha naraḥ । cakṛmā satyarādhase ॥
त्वं न इन्द्र वाजयुस्त्वं गव्युः शतक्रतो । त्वँ हिरण्ययुर्वसो ॥
tvaṃ na indra vājayustvaṃ gavyuḥ śatakrato । tvam̐ hiraṇyayurvaso ॥
वयमु त्वा तदिदर्था इन्द्र त्वायन्तः सखायः । कण्वा उक्थेभिर्जरन्ते ॥
vayamu tvā tadidarthā indra tvāyantaḥ sakhāyaḥ । kaṇvā ukthebhirjarante ॥
न घेमन्यदा पपन वज्रिन्नपसो नविष्टौ । तवेदु स्तोमैश्चिकेत ॥
na ghemanyadā papana vajrinnapaso naviṣṭau । tavedu stomaiściketa ॥
इच्छन्ति देवाः सुन्वन्तं न स्वप्नाय स्पृहयन्ति । यन्ति प्रमादमतन्द्राः ॥
icchanti devāḥ sunvantaṃ na svapnāya spṛhayanti । yanti pramādamatandrāḥ ॥
इन्द्राय मद्व्ने सुतं परि ष्टोभन्तु नो गिरः । अर्कमर्च्चन्तु कारवः ॥
indrāya madvne sutaṃ pari ṣṭobhantu no giraḥ । arkamarccantu kāravaḥ ॥
यस्मिन्विश्वा अधि श्रियो रणन्ति सप्त सँसदः । इन्द्रँ सुते हवामहे ॥
yasminviśvā adhi śriyo raṇanti sapta sam̐sadaḥ । indram̐ sute havāmahe ॥
त्रिकद्रुकेषु चेतनं देवासो यज्ञमत्नत । तमिद्वर्धन्तु नो गिरः ॥
trikadrukeṣu cetanaṃ devāso yajñamatnata । tamidvardhantu no giraḥ ॥
अयं त इन्द्र सोमो निपूतो अधि बर्हिषि । एहीमस्य द्रवा पिब ॥
ayaṃ ta indra somo nipūto adhi barhiṣi । ehīmasya dravā piba ॥
शाचिगो शाचिपूजनायँ रणाय ते सुतः । आखण्डल प्र हूयसे ॥
śācigo śācipūjanāyam̐ raṇāya te sutaḥ । ākhaṇḍala pra hūyase ॥
यस्ते शृङ्गवृषो णपात्प्रणपात्कुण्डपाय्यः । न्यस्मिं दध्र आ मनः ॥
yaste śaṛṅgavṛṣo ṇapātpraṇapātkuṇḍapāyyaḥ । nyasmiṃ dadhra ā manaḥ ॥
आ तू न इन्द्र क्षुमन्तं चित्रं ग्राभँ सं गृभाय । महाहस्ति दक्षिणेन ॥
ā tū na indra kṣumantaṃ citraṃ grābham̐ saṃ gṛbhāya । mahāhasti dakṣiṇena ॥
विद्मा हि त्वा तुविकूर्मिं तुविदेष्णं तुवीमघम् । तुविमात्रमवोभिः ॥
vidmā hi tvā tuvikūrmiṃ tuvideṣṇaṃ tuvīmagham । tuvimātramavobhiḥ ॥
न हि त्वा शूर देवा न मर्तासो दित्सन्तम् । भीमं न गां वारयन्ते ॥
na hi tvā śūra devā na martāso ditsantam । bhīmaṃ na gāṃ vārayante ॥
अभि त्वा वृषभा सुते सुतँ सृजामि पीतये । तृम्पा व्यश्नुही मदम् ॥
abhi tvā vṛṣabhā sute sutam̐ sṛjāmi pītaye । tṛmpā vyaśnuhī madam ॥
मा त्वा मूरा अविष्यवो मोपहस्वान आ दभन् । मा कीं ब्रह्मद्विषं वनः ॥
mā tvā mūrā aviṣyavo mopahasvāna ā dabhan । mā kīṃ brahmadviṣaṃ vanaḥ ॥
इह त्वा गोपरीणसं महे मन्दन्तु राधसे । सरो गौरो यथा पिब ॥
iha tvā goparīṇasaṃ mahe mandantu rādhase । saro gauro yathā piba ॥
इदम् वसो सुतमन्धः पिबा सुपूर्णमुदरम् । अनाभयिन्ररिमा ते ॥
idam vaso sutamandhaḥ pibā supūrṇamudaram । anābhayinrarimā te ॥
नृभिर्धौतः सुतो अश्नैरव्या वारैः परिपूतः । अश्वो न निक्तो नदीषु ॥
nṛbhirdhautaḥ suto aśnairavyā vāraiḥ paripūtaḥ । aśvo na nikto nadīṣu ॥
तं ते यवं यथा गोभिः स्वादुमकर्म श्रीणन्तः । इन्द्र त्वास्मिन्त्सधमादे ॥
taṃ te yavaṃ yathā gobhiḥ svādumakarma śrīṇantaḥ । indra tvāsmintsadhamāde ॥
इदँ ह्यन्वोजसा सुतँ राधानां पते । पिबा त्वा३स्य गिर्वणः ॥
idam̐ hyanvojasā sutam̐ rādhānāṃ pate । pibā tvā३sya girvaṇaḥ ॥
यस्ते अनु स्वधामसत्सुते नि यच्छ तन्वम् । स त्वा ममत्तु सोम्यम् ॥
yaste anu svadhāmasatsute ni yaccha tanvam । sa tvā mamattu somyam ॥
प्र ते अश्नोतु कुक्ष्योः प्रेन्द्र ब्रह्मणा शिरः । प्र बाहू शूर राधसा ॥
pra te aśnotu kukṣyoḥ prendra brahmaṇā śiraḥ । pra bāhū śūra rādhasā ॥
आ त्वेता नि षीदतेन्द्रमभि प्र गायत । सखाय स्तोमवाहसः ॥
ā tvetā ni ṣīdatendramabhi pra gāyata । sakhāya stomavāhasaḥ ॥
