न त्वावाँ अन्यो दिव्यो न पार्थिवो न जातो न जनिष्यते । अश्वायन्तो मघवन्निन्द्र वाजिनो गव्यन्तस्त्वा हवामहे ॥
na tvāvām̐ anyo divyo na pārthivo na jāto na janiṣyate । aśvāyanto maghavannindra vājino gavyantastvā havāmahe ॥
कया नश्चित्र आ भुवदूती सदावृधः सखा । कया शचिष्ठया वृता ॥
kayā naścitra ā bhuvadūtī sadāvṛdhaḥ sakhā । kayā śaciṣṭhayā vṛtā ॥
कस्त्वा सत्यो मदानां मँहिष्ठो मत्सदन्धसः । दृढा चिदारुजे वसु ॥
kastvā satyo madānāṃ mam̐hiṣṭho matsadandhasaḥ । dṛḍhā cidāruje vasu ॥
अभी षु णः सखीनामविता जरितॄणाम् । शतं भवास्यूतये ॥
abhī ṣu ṇaḥ sakhīnāmavitā jaritṝṇām । śataṃ bhavāsyūtaye ॥
तं वो दस्ममृतीषहं वसोर्मन्दानमन्धसः । अभि वत्सं न स्वसरेषु धेनव इन्द्रं गीर्भिर्नवामहे ॥
taṃ vo dasmamṛtīṣahaṃ vasormandānamandhasaḥ । abhi vatsaṃ na svasareṣu dhenava indraṃ gīrbhirnavāmahe ॥
द्युक्षँ सुदानुं तविषीभिरावृतं गिरिं न पुरुभोजसम् । क्षुमन्तं वाजँ शतिनँ सहस्रिणं मक्षू गोमन्तमीमहे ॥
dyukṣam̐ sudānuṃ taviṣībhirāvṛtaṃ giriṃ na purubhojasam । kṣumantaṃ vājam̐ śatinam̐ sahasriṇaṃ makṣū gomantamīmahe ॥
तरोभिर्वो विदद्वसुमिन्द्रँ सबाध ऊतये । बृहद्गायन्तः सुतसोमे अध्वरे हुवे भरं न कारिणम् ॥
tarobhirvo vidadvasumindram̐ sabādha ūtaye । bṛhadgāyantaḥ sutasome adhvare huve bharaṃ na kāriṇam ॥
न यं दुध्रा वरन्ते न स्थिरा मुरो मदेषु शिप्रमन्धसः । य आदृत्या शशमानाय सुन्वते दाता जरित्र उक्थ्यम् ॥
na yaṃ dudhrā varante na sthirā muro madeṣu śipramandhasaḥ । ya ādṛtyā śaśamānāya sunvate dātā jaritra ukthyam ॥
स्वादिष्ठया मदिष्ठया पवस्व सोम धारया । इन्द्राय पातवे सुतः ॥
svādiṣṭhayā madiṣṭhayā pavasva soma dhārayā । indrāya pātave sutaḥ ॥
रक्षोहा विश्वचर्षणिरभि योनिमयोहते । द्रोणे सधस्थमासदत् ॥
rakṣohā viśvacarṣaṇirabhi yonimayohate । droṇe sadhasthamāsadat ॥
वरिवोधातमो भुवो मँहिष्ठो वृत्रहन्तमः । पर्षि राधो मघोनाम् ॥
varivodhātamo bhuvo mam̐hiṣṭho vṛtrahantamaḥ । parṣi rādho maghonām ॥
पवस्व मधुमत्तम इन्द्राय सोम क्रतुवित्तमो मदः । महि द्युक्षतमो मदः ॥
pavasva madhumattama indrāya soma kratuvittamo madaḥ । mahi dyukṣatamo madaḥ ॥
यस्य ते पीत्वा वृषभो वृषायतेऽस्य पीत्वा स्वर्विदः । स सुप्रकेतो अभ्यक्रमीदिषोऽच्छा वाजं नैतशः ॥
yasya te pītvā vṛṣabho vṛṣāyate'sya pītvā svarvidaḥ । sa supraketo abhyakramīdiṣo'cchā vājaṃ naitaśaḥ ॥
इन्द्रमच्छ सुता इमे वृषणं यन्तु हरयः । श्रुष्टे जातास इन्दवः स्वर्विदः ॥
indramaccha sutā ime vṛṣaṇaṃ yantu harayaḥ । śruṣṭe jātāsa indavaḥ svarvidaḥ ॥
अयं भराय सानसिरिन्द्राय पवते सुतः । सोमो जैत्रस्य चेतति यथा विदे ॥
ayaṃ bharāya sānasirindrāya pavate sutaḥ । somo jaitrasya cetati yathā vide ॥
अस्येदिन्द्रो मदेष्वा ग्राभं गृभ्णाति सानसिम् । वज्रं च वृषणं भरत्समप्सुजित् ॥
asyedindro madeṣvā grābhaṃ gṛbhṇāti sānasim । vajraṃ ca vṛṣaṇaṃ bharatsamapsujit ॥
पुरोजिती वो अन्धसः सुताय मादयित्नवे । अप श्वानँ श्नथिष्टन सखायो दीर्घजिह्व्यम् ॥
purojitī vo andhasaḥ sutāya mādayitnave । apa śvānam̐ śnathiṣṭana sakhāyo dīrghajihvyam ॥
यो धारया पावकया परिप्रस्यन्दते सुतः । इन्दुरश्वो न कृत्व्यः ॥
yo dhārayā pāvakayā pariprasyandate sutaḥ । induraśvo na kṛtvyaḥ ॥
तं दुरोषमभी नरः सोमं विश्वाच्या धिया । यज्ञाय सन्त्वद्रयः ॥
taṃ duroṣamabhī naraḥ somaṃ viśvācyā dhiyā । yajñāya santvadrayaḥ ॥
अभि प्रियाणि पवते चनोहितो नामानि यह्वो अधि येषु वर्धते । आ सूर्यस्य बृहतो बृहन्नधि रथं विष्वञ्चमरुहद्विचक्षणः ॥
abhi priyāṇi pavate canohito nāmāni yahvo adhi yeṣu vardhate । ā sūryasya bṛhato bṛhannadhi rathaṃ viṣvañcamaruhadvicakṣaṇaḥ ॥
ऋतस्य जिह्वा पवते मधु प्रियं वक्ता पतिर्धियो अस्या अदाभ्यः । दधाति पुत्रः पित्रोरपीच्या३ं नाम तृतीयमधि रोचनं दिवः ॥
ṛtasya jihvā pavate madhu priyaṃ vaktā patirdhiyo asyā adābhyaḥ । dadhāti putraḥ pitrorapīcyā३ṃ nāma tṛtīyamadhi rocanaṃ divaḥ ॥
अव द्युतानः कलशाँ अचिक्रदन्नृभिर्येमाणः कोश आ हिरण्यये । अभी ऋतस्य दोहना अनूषताधि त्रिपृष्ठ उषसो वि राजसि ॥
ava dyutānaḥ kalaśām̐ acikradannṛbhiryemāṇaḥ kośa ā hiraṇyaye । abhī ṛtasya dohanā anūṣatādhi tripṛṣṭha uṣaso vi rājasi ॥
यज्ञायज्ञा वो अग्नये गिरागिरा च दक्षसे । प्रप्र वयममृतं जातवेदसं प्रियं मित्रं न शँसिषम् ॥
yajñāyajñā vo agnaye girāgirā ca dakṣase । prapra vayamamṛtaṃ jātavedasaṃ priyaṃ mitraṃ na śam̐siṣam ॥
ऊर्जो नपातँ स हिनायमस्मयुर्दाशेम हव्यदातये । भुवद्वाजेष्वविता भुवद्वृध उत त्राता तनूनाम् ॥
ūrjo napātam̐ sa hināyamasmayurdāśema havyadātaye । bhuvadvājeṣvavitā bhuvadvṛdha uta trātā tanūnām ॥
एह्यू षु ब्रवाणि तेऽग्न इत्थेतरा गिरः । एभिर्वर्धास इन्दुभिः ॥
ehyū ṣu bravāṇi te'gna itthetarā giraḥ । ebhirvardhāsa indubhiḥ ॥
यत्र क्व च ते मनो दक्षं दधस उत्तरम् । तत्रा योनिं कृणवसे ॥
yatra kva ca te mano dakṣaṃ dadhasa uttaram । tatrā yoniṃ kṛṇavase ॥
न हि ते पूर्तमक्षिपद्भुवन्नेमानां पते । अथा दुवो वनवसे ॥
na hi te pūrtamakṣipadbhuvannemānāṃ pate । athā duvo vanavase ॥
वयमु त्वामपूर्व्य स्थूरं न कच्चिद्भरन्तोऽवस्यवः । वज्रिञ्चित्रँ हवामहे ॥
vayamu tvāmapūrvya sthūraṃ na kaccidbharanto'vasyavaḥ । vajriñcitram̐ havāmahe ॥
उप त्वा कर्मन्नूतये स नो युवोग्रश्चक्राम यो धृषत् । त्वामिध्यवितारं ववृमहे सखाय इन्द्र सानसिम् ॥
upa tvā karmannūtaye sa no yuvograścakrāma yo dhṛṣat । tvāmidhyavitāraṃ vavṛmahe sakhāya indra sānasim ॥
अधा हीन्द्र गिर्वण उप त्वा काम ईमहे ससृग्महे । उदेव ग्मन्त उदभिः ॥
adhā hīndra girvaṇa upa tvā kāma īmahe sasṛgmahe । udeva gmanta udabhiḥ ॥
