पुरु त्वा दाशिवाँ वोचेऽरिरग्ने तव स्विदा । तोदस्येव शरण आ महस्य ॥
puru tvā dāśivām̐ voce'riragne tava svidā । todasyeva śaraṇa ā mahasya ॥
प्र होत्रे पूर्व्यं वचोऽग्नये भरता बृहत् । विपां ज्योतीँषि बिभ्रते न वेधसे ॥
pra hotre pūrvyaṃ vaco'gnaye bharatā bṛhat । vipāṃ jyotīm̐ṣi bibhrate na vedhase ॥
अग्ने वाजस्य गोमत ईशानः सहसो यहो । अस्मे धेहि जातवेदो महि श्रवः ॥
agne vājasya gomata īśānaḥ sahaso yaho । asme dhehi jātavedo mahi śravaḥ ॥
अग्ने यजिष्ठो अध्वरे देवां देवयते यज । होता मन्द्रो वि राजस्यति स्रिधः ॥
agne yajiṣṭho adhvare devāṃ devayate yaja । hotā mandro vi rājasyati sridhaḥ ॥
जज्ञानः सप्त मातृभिर्मेधामाशासत श्रिये । अयं ध्रुवो रयीणां चिकेतदा ॥
jajñānaḥ sapta mātṛbhirmedhāmāśāsata śriye । ayaṃ dhruvo rayīṇāṃ ciketadā ॥
उत स्या नो दिवा मतिरदितिरूत्यागमत् । सा शन्ताता मयस्करदप स्रिधः ॥
uta syā no divā matiraditirūtyāgamat । sā śantātā mayaskaradapa sridhaḥ ॥
ईडिष्वा हि प्रतीव्या३ं यजस्व जातवेदसम् । चरिष्णुधूममगृभीतशोचिषम् ॥
īḍiṣvā hi pratīvyā३ṃ yajasva jātavedasam । cariṣṇudhūmamagṛbhītaśociṣam ॥
न तस्य मायया च न रिपुरीशीत मर्त्यः । यो अग्नये ददाश हव्यदातये ॥
na tasya māyayā ca na ripurīśīta martyaḥ । yo agnaye dadāśa havyadātaye ॥
अप त्यं वृजिनँ रिपुँ स्तेनमग्ने दुराध्यम् । दविष्ठमस्य सत्पते कृधी सुगम् ॥
apa tyaṃ vṛjinam̐ ripum̐ stenamagne durādhyam । daviṣṭhamasya satpate kṛdhī sugam ॥
श्रुष्ट्यग्ने नवस्य मे स्तोमस्य वीर विश्पते । नि मायिनस्तपसा रक्षसो दह ॥
śruṣṭyagne navasya me stomasya vīra viśpate । ni māyinastapasā rakṣaso daha ॥
प्र मँहिष्ठाय गायत ऋताव्ने बृहते शुक्रशोचिषे । उपस्तुतासो अग्नये ॥
pra mam̐hiṣṭhāya gāyata ṛtāvne bṛhate śukraśociṣe । upastutāso agnaye ॥
प्र सो अग्ने तवोतिभिः सुवीराभिस्तरति वाजकर्मभिः । यस्य त्वँ सख्यमाविथ ॥
pra so agne tavotibhiḥ suvīrābhistarati vājakarmabhiḥ । yasya tvam̐ sakhyamāvitha ॥
तं गूर्धया स्वर्णरं देवासो देवमरतिं दधन्विरे । देवत्रा हव्यमूहिषे ॥
taṃ gūrdhayā svarṇaraṃ devāso devamaratiṃ dadhanvire । devatrā havyamūhiṣe ॥
मा नो हृणीथा अतिथिं वसुरग्निः पुरुप्रशस्त एशः । यः सुहोता स्वध्वरः ॥
mā no hṛṇīthā atithiṃ vasuragniḥ purupraśasta eśaḥ । yaḥ suhotā svadhvaraḥ ॥
भद्रो नो अग्निराहुतो भद्रा रातिः सुभग भद्रो अध्वरः । भद्रा उत प्रशस्तयः ॥
bhadro no agnirāhuto bhadrā rātiḥ subhaga bhadro adhvaraḥ । bhadrā uta praśastayaḥ ॥
यजिष्ठं त्वा ववृमहे देवं देवत्रा होतारममर्त्यम् । अस्य यज्ञस्य सुक्रतुम् ॥
yajiṣṭhaṃ tvā vavṛmahe devaṃ devatrā hotāramamartyam । asya yajñasya sukratum ॥
तदग्ने द्युम्नमा भर यत्सासाहा सदने कं चिदत्रिणम् । मन्युं जनस्य दूढ्यम् ॥
tadagne dyumnamā bhara yatsāsāhā sadane kaṃ cidatriṇam । manyuṃ janasya dūḍhyam ॥
यद्वा उ विश्पतिः शितः सुप्रीतो मनुषो विशे । विश्वेदग्निः प्रति रक्षाँसि सेधति ॥
yadvā u viśpatiḥ śitaḥ suprīto manuṣo viśe । viśvedagniḥ prati rakṣām̐si sedhati ॥
तद्वो गाय सुते सचा पुरुहूताय सत्वने । शं यद्गवे न शाकिने ॥
tadvo gāya sute sacā puruhūtāya satvane । śaṃ yadgave na śākine ॥
यस्ते नूनँ शतक्रतविन्द्र द्युम्नितमो मदः । तेन नूनं मदे मदेः ॥
yaste nūnam̐ śatakratavindra dyumnitamo madaḥ । tena nūnaṃ made madeḥ ॥
गाव उप वदावटे महि यज्ञस्य रप्सुदा । उभा कर्णा हिरण्यया ॥
gāva upa vadāvaṭe mahi yajñasya rapsudā । ubhā karṇā hiraṇyayā ॥
अरमश्वाय गायत श्रुतकक्षारं गवे । अरमिन्द्रस्य धाम्ने ॥
aramaśvāya gāyata śrutakakṣāraṃ gave । aramindrasya dhāmne ॥
तमिन्द्रं वाजयामसि महे वृत्राय हन्तवे । स वृषा वृषभो भुवत् ॥
tamindraṃ vājayāmasi mahe vṛtrāya hantave । sa vṛṣā vṛṣabho bhuvat ॥
त्वमिन्द्र बलादधि सहसो जात ओजसः । त्वँ सन्वृषन्वृषेदसि ॥
tvamindra balādadhi sahaso jāta ojasaḥ । tvam̐ sanvṛṣanvṛṣedasi ॥
यज्ञ इन्द्रमवर्धयद्यद्भूमिं व्यवर्तयत् । चक्राण ओपशं दिवि ॥
yajña indramavardhayadyadbhūmiṃ vyavartayat । cakrāṇa opaśaṃ divi ॥
यदिन्द्राहं तथा त्वमीशीय वस्व एक इत् । स्तोता मे गोसखा स्यात् ॥
yadindrāhaṃ tathā tvamīśīya vasva eka it । stotā me gosakhā syāt ॥
पन्यंपन्यमित्सोतार आ धावत मद्याय । सोमं वीराय शूराय ॥
panyaṃpanyamitsotāra ā dhāvata madyāya । somaṃ vīrāya śūrāya ॥
इदं वसो सुतमन्धः पिबा सुपूर्णमुदरम् । अनाभयिन्ररिमा ते ॥
idaṃ vaso sutamandhaḥ pibā supūrṇamudaram । anābhayinrarimā te ॥
उद्धेदभि श्रुतामघं वृषभं नर्यापसम् । अस्तारमेषि सूर्य ॥
uddhedabhi śrutāmaghaṃ vṛṣabhaṃ naryāpasam । astārameṣi sūrya ॥
यदद्य कच्च वृत्रहन्नुदगा अभि सूर्य । सर्वं तदिन्द्र ते वशे ॥
yadadya kacca vṛtrahannudagā abhi sūrya । sarvaṃ tadindra te vaśe ॥
