य आनयत्परावतः सुनीती तुर्वशं यदुम् । इन्द्रः स नो युवा सखा ॥
ya ānayatparāvataḥ sunītī turvaśaṃ yadum । indraḥ sa no yuvā sakhā ॥
मा न इन्द्राभ्याऽऽ३ दिशः सूरो अक्तुष्वा यमत । त्वा युजा वनेम तत् ॥
mā na indrābhyā''३ diśaḥ sūro aktuṣvā yamata । tvā yujā vanema tat ॥
एन्द्र सानसिँ रयिँ सजित्वानँ सदासहम् । वर्षिष्ठमूतये भर ॥
endra sānasim̐ rayim̐ sajitvānam̐ sadāsaham । varṣiṣṭhamūtaye bhara ॥
इन्द्रं वयं महाधन इन्द्रमर्भे हवामहे । युजं वृत्रेषु वज्रिणम् ॥
indraṃ vayaṃ mahādhana indramarbhe havāmahe । yujaṃ vṛtreṣu vajriṇam ॥
अपिबत्कद्रुवः सुतमिन्द्रः सहस्रबाह्वे । तत्राददिष्ट पौँस्यम् ॥
apibatkadruvaḥ sutamindraḥ sahasrabāhve । tatrādadiṣṭa paum̐syam ॥
वयमिन्द्र त्वायवोऽभि प्र नोनुमो वृषन् । विद्धी त्वा३स्य नो वसो ॥
vayamindra tvāyavo'bhi pra nonumo vṛṣan । viddhī tvā३sya no vaso ॥
आ घा ये अग्निमिन्धते स्तृणन्ति बर्हिरानुषक् । येषामिन्द्रो युवा सखा ॥
ā ghā ye agnimindhate stṛṇanti barhirānuṣak । yeṣāmindro yuvā sakhā ॥
भिन्धि विश्वा अप द्विषः परि बाधो जही मृधः । वसु स्पार्हं तदा भर ॥
bhindhi viśvā apa dviṣaḥ pari bādho jahī mṛdhaḥ । vasu spārhaṃ tadā bhara ॥
इहेव शृण्व एषां कशा हस्तेषु यद्वदान् । नि यामं चित्रमृञ्जते ॥
iheva śaṛṇva eṣāṃ kaśā hasteṣu yadvadān । ni yāmaṃ citramṛñjate ॥
इम उ त्वा वि चक्षते सखाय इन्द्र सोमिनः । पुष्टावन्तो यथा पशुम् ॥
ima u tvā vi cakṣate sakhāya indra sominaḥ । puṣṭāvanto yathā paśum ॥
समस्य मन्यवे विशो विश्वा नमन्त कृष्टयः । समुद्रायेव सिन्धवः ॥
samasya manyave viśo viśvā namanta kṛṣṭayaḥ । samudrāyeva sindhavaḥ ॥
देवानामिदवो महत्तदा वृणीमहे वयम् । वृष्णामस्मभ्यमूतये ॥
devānāmidavo mahattadā vṛṇīmahe vayam । vṛṣṇāmasmabhyamūtaye ॥
सोमानाँ स्वरणं कृणुहि ब्रह्मणस्पते । कक्षीवन्तं य औशिजः ॥
somānām̐ svaraṇaṃ kṛṇuhi brahmaṇaspate । kakṣīvantaṃ ya auśijaḥ ॥
बोधन्मना इदस्तु नो वृत्रहा भूर्यासुतिः । शृणोतु शक्र आशिषम् ॥
bodhanmanā idastu no vṛtrahā bhūryāsutiḥ । śaṛṇotu śakra āśiṣam ॥
अद्य नो देव सवितः प्रजावत्सावीः सौभगम् । परा दुःष्वप्न्यँ सुव ॥
adya no deva savitaḥ prajāvatsāvīḥ saubhagam । parā duḥṣvapnyam̐ suva ॥
क्वा३स्य वृषभो युवा तुविग्रीवो अनानतः । ब्रह्मा कस्तँ सपर्यति ॥
kvā३sya vṛṣabho yuvā tuvigrīvo anānataḥ । brahmā kastam̐ saparyati ॥
उपह्वरे गिरीणाँ सङ्गमे च नदीनाम् । धिया विप्रो अजायत ॥
upahvare girīṇām̐ saṅgame ca nadīnām । dhiyā vipro ajāyata ॥
प्र सम्राजं चर्षणीनामिन्द्रँ स्तोता नव्यं गीर्भिः । नरं नृषाहं मँहिष्ठम् ॥
pra samrājaṃ carṣaṇīnāmindram̐ stotā navyaṃ gīrbhiḥ । naraṃ nṛṣāhaṃ mam̐hiṣṭham ॥
अपादु शिप्रयन्धसः सुदक्षस्य प्रहोषिणः । इन्द्रोरिन्द्रो यवाशिरः ॥
apādu śiprayandhasaḥ sudakṣasya prahoṣiṇaḥ । indrorindro yavāśiraḥ ॥
इमा उ त्वा पुरुवसोऽभि प्र नोनवुर्गिरः । गावो वत्सं न धेनवः ॥
imā u tvā puruvaso'bhi pra nonavurgiraḥ । gāvo vatsaṃ na dhenavaḥ ॥
अत्राह गोरमन्वत नाम त्वष्टुरपीच्यम् । इत्था चन्द्रमसो गृहे ॥
atrāha goramanvata nāma tvaṣṭurapīcyam । itthā candramaso gṛhe ॥
यदिन्द्रो अनयद्रितो महीरपो वृषन्तमः । तत्र पूषाभुवत्सचा ॥
yadindro anayadrito mahīrapo vṛṣantamaḥ । tatra pūṣābhuvatsacā ॥
गौर्धयति मरुताँ श्रवस्युर्माता मघोनाम् युक्ता वह्नी रथानाम् ॥
gaurdhayati marutām̐ śravasyurmātā maghonām yuktā vahnī rathānām ॥
उप नो हरिभिः सुतं याहि मदानां पते । उप नो हरिभिः सुतम् ॥
upa no haribhiḥ sutaṃ yāhi madānāṃ pate । upa no haribhiḥ sutam ॥
इष्टा होत्रा असृक्षतेन्द्रं वृधन्तो अध्वरे । अच्छावभृथमोजसा ॥
iṣṭā hotrā asṛkṣatendraṃ vṛdhanto adhvare । acchāvabhṛthamojasā ॥
अहमिद्धि पितुष्परि मेधामृतस्य जग्रह । अहँ सूर्य इवाजनि ॥
ahamiddhi pituṣpari medhāmṛtasya jagraha । aham̐ sūrya ivājani ॥
रेवतीर्नः सधमाद इन्द्रे सन्तु तुविवाजाः । क्षुमन्तो याभिर्मदेम ॥
revatīrnaḥ sadhamāda indre santu tuvivājāḥ । kṣumanto yābhirmadema ॥
सोमः पूषा च चेततुर्विश्वासाँ सुक्षितीनाम् । देवत्रा रथ्योर्हिता ॥
somaḥ pūṣā ca cetaturviśvāsām̐ sukṣitīnām । devatrā rathyorhitā ॥
पान्तमा वो अन्धस इन्द्रमभि प्र गायत । विश्वासाहँ शतक्रतुं मँहिष्ठं चर्षणीनाम् ॥
pāntamā vo andhasa indramabhi pra gāyata । viśvāsāham̐ śatakratuṃ mam̐hiṣṭhaṃ carṣaṇīnām ॥
प्र व इन्द्राय मादनँ हर्यश्वाय गायत । सखायः सोमपाव्ने ॥
pra va indrāya mādanam̐ haryaśvāya gāyata । sakhāyaḥ somapāvne ॥
