अग्न आ याहि वीतये गृणानो हव्यदातये । नि होता सत्सि बर्हिषि ॥
agna ā yāhi vītaye gṛṇāno havyadātaye । ni hotā satsi barhiṣi ॥
त्वमग्ने यज्ञानाँ होता विश्वेषाँ हितः । देवेभिर्मानुषे जने ॥
tvamagne yajñānām̐ hotā viśveṣām̐ hitaḥ । devebhirmānuṣe jane ॥
अग्निं दूतं वृणीमहे होतारं विश्ववेदसम् । अस्य यज्ञस्य सुक्रतुम् ॥
agniṃ dūtaṃ vṛṇīmahe hotāraṃ viśvavedasam । asya yajñasya sukratum ॥
अग्निर्वृत्राणि जङ्घनद्द्रविणस्युर्विपन्यया । समिद्धः शुक्र आहुतः ॥
agnirvṛtrāṇi jaṅghanaddraviṇasyurvipanyayā । samiddhaḥ śukra āhutaḥ ॥
प्रेष्ठं वो अतिथिँ स्तुषे मित्रमिव प्रियम् । अग्ने रथं न वेद्यम् ॥
preṣṭhaṃ vo atithim̐ stuṣe mitramiva priyam । agne rathaṃ na vedyam ॥
त्वं नो अग्ने महोभिः पाहि विश्वस्या अरातेः । उत द्विषो मर्त्यस्य ॥
tvaṃ no agne mahobhiḥ pāhi viśvasyā arāteḥ । uta dviṣo martyasya ॥
एह्यू षु ब्रवाणि तेऽग्न इत्थेतरा गिरः । एभिर्वर्धास इन्दुभिः ॥
ehyū ṣu bravāṇi te'gna itthetarā giraḥ । ebhirvardhāsa indubhiḥ ॥
आ ते वत्सो मनो यमत्परमाच्चित्सधस्थात् । अग्ने त्वां कामये गिरा ॥
ā te vatso mano yamatparamāccitsadhasthāt । agne tvāṃ kāmaye girā ॥
त्वामग्ने पुष्करादध्यथर्वा निरमन्थत । मूर्ध्नो विश्वस्य वाघतः ॥
tvāmagne puṣkarādadhyatharvā niramanthata । mūrdhno viśvasya vāghataḥ ॥
अग्ने विवस्वदा भरास्मभ्यमूतये महे । देवो ह्यसि नो दृशे ॥
agne vivasvadā bharāsmabhyamūtaye mahe । devo hyasi no dṛśe ॥
नमस्ते अग्न ओजसे गृणन्ति देव कृष्टयः । अमैरमित्रमर्दय ॥
namaste agna ojase gṛṇanti deva kṛṣṭayaḥ । amairamitramardaya ॥
दूतं वो विश्ववेदसँ हव्यवाहममर्त्यम् । यजिष्ठमृञ्जसे गिरा ॥
dūtaṃ vo viśvavedasam̐ havyavāhamamartyam । yajiṣṭhamṛñjase girā ॥
उप त्वा जामयो गिरो देदिशतीर्हविष्कृतः । वायोरनीके अस्थिरन् ॥
upa tvā jāmayo giro dediśatīrhaviṣkṛtaḥ । vāyoranīke asthiran ॥
उप त्वाग्ने दिवेदिवे दोषावस्तर्धिया वयम् । नमो भरन्त एमसि ॥
upa tvāgne divedive doṣāvastardhiyā vayam । namo bharanta emasi ॥
जराबोध तद्विविड्ढि विशेविशे यज्ञियाय । स्तोमँ रुद्राय दृशीकम् ॥
jarābodha tadviviḍḍhi viśeviśe yajñiyāya । stomam̐ rudrāya dṛśīkam ॥
प्रति त्यं चारुमध्वरं गोपीथाय प्र हूयसे । मरुद्भिरग्न आ गहि ॥
prati tyaṃ cārumadhvaraṃ gopīthāya pra hūyase । marudbhiragna ā gahi ॥
अश्वं न त्वा वारवन्तं वन्दध्या अग्निं नमोभिः । सम्राजन्तमध्वराणाम् ॥
aśvaṃ na tvā vāravantaṃ vandadhyā agniṃ namobhiḥ । samrājantamadhvarāṇām ॥
और्वभृगुवच्छुचिमप्नवानवदा हुवे । अग्निँ समुद्रवाससम् ॥
aurvabhṛguvacchucimapnavānavadā huve । agnim̐ samudravāsasam ॥
अग्निमिन्धानो मनसा धियँ सचेत मर्त्यः । अग्निमिन्धे विवस्वभिः ॥
agnimindhāno manasā dhiyam̐ saceta martyaḥ । agnimindhe vivasvabhiḥ ॥
आदित्प्रत्नस्य रेतसो ज्योतिः पश्यन्ति वासरम् । परो यदिध्यते दिवि ॥
āditpratnasya retaso jyotiḥ paśyanti vāsaram । paro yadidhyate divi ॥
अग्निं वो वृधन्तमध्वराणां पुरूतमम् । अच्छा नप्त्रे सहस्वते ॥
agniṃ vo vṛdhantamadhvarāṇāṃ purūtamam । acchā naptre sahasvate ॥
अग्निस्तिग्मेन शोचिषा यँसद्विश्वं न्या३त्रिणम् । अग्निर्नो वँसते रयिम् ॥
agnistigmena śociṣā yam̐sadviśvaṃ nyā३triṇam । agnirno vam̐sate rayim ॥
अग्ने मृड महाँ अस्यय आ देवयुं जनम् । इयेथ बर्हिरासदम् ॥
agne mṛḍa mahām̐ asyaya ā devayuṃ janam । iyetha barhirāsadam ॥
अग्ने रक्षा णो अँहसः प्रति स्म देव रीषतः । तपिष्ठैरजरो दह ॥
agne rakṣā ṇo am̐hasaḥ prati sma deva rīṣataḥ । tapiṣṭhairajaro daha ॥
अग्ने युङ्क्ष्वा हि ये तवाश्वासो देव साधवः । अरं वहन्त्याशवः ॥
agne yuṅkṣvā hi ye tavāśvāso deva sādhavaḥ । araṃ vahantyāśavaḥ ॥
नि त्वा नक्ष्य विश्पते द्युमन्तं धीमहे वयम् । सुवीरमग्न आहुत ॥
ni tvā nakṣya viśpate dyumantaṃ dhīmahe vayam । suvīramagna āhuta ॥
अग्निर्मूर्धा दिवः ककुत्पतिः पृथिव्या अयम् । अपाँ रेताँसि जिन्वति ॥
agnirmūrdhā divaḥ kakutpatiḥ pṛthivyā ayam । apām̐ retām̐si jinvati ॥
इममू षु त्वमस्माकँ सनिं गायत्रं नव्याँसम् । अग्ने देवेषु प्र वोचः ॥
imamū ṣu tvamasmākam̐ saniṃ gāyatraṃ navyām̐sam । agne deveṣu pra vocaḥ ॥
तं त्वा गोपवनो गिरा जनिष्ठदग्ने अङ्गरः । स पावक श्रुधी हवम् ॥
taṃ tvā gopavano girā janiṣṭhadagne aṅgaraḥ । sa pāvaka śrudhī havam ॥
परि वाजपतिः कविरग्निर्हव्यान्यक्रमीत् । दधद्रत्नानि दाशुषे ॥
pari vājapatiḥ kaviragnirhavyānyakramīt । dadhadratnāni dāśuṣe ॥
