Special Call Prof. Jay L. Garfield Commemorative Volume · Submissions Open
Announcements Newsletters About Us Contact
Search
KA
Kirātārjunīyam • Chapter 17

Canto 17

सप्तदशः सर्गः

Canto 17 of Kirātārjunīyam.

Total: 64 Verses • Citations: KA 17.1–64 • 1 Lexicon Terms • Page 1 of 3 (Verses 30 shown)
KA 17.1 उपजातिः
अथापदामुद्धरणक्षमेषु मित्रेष्विवास्त्रेषु तिरोहितेषु । धृतिं गुरुश्रीर्गुरुणाभिपुष्यन्स्वपौरुषेणेव शरासनेन ॥
KA 17.2 इन्द्रवज्रा
भूरिप्रभावेण रणाभियोगात्प्रीतो विजिह्मश्च तदीयवृद्ध्या । स्पष्टोऽप्यविस्पष्टवपुःप्रकाशः सर्पन्महाधूम इवाद्रिवह्निः ॥
KA 17.3 उपजातिः
तेजः समाश्रित्य परैरहार्यं निजं महन्मित्रमिवोरुधैर्यम् । आसादयन्नस्खलितस्वभावं भीमे भुजालम्बमिवारिदुर्गे ॥
KA 17.4 उपजातिः
वंशोचितत्वादभिमानवत्या सम्प्राप्तया सम्प्रियतामसुभ्यः । समक्षमादित्सितया परेण वध्वेव कीर्त्या परितप्यमानः ॥
KA 17.5 उपजातिः
पतिं नगानामिव बद्धमूलमुन्मूलयिष्यंस्तरसा विपक्षम् । लघुप्रयत्नं निगृहीतवीर्यस्त्रिमार्गगावेग इवेश्वरेण ॥
KA 17.6 उपजातिः
संस्कारवत्त्वाद्रमयत्सु चेतः प्रयोगशिक्षागुणभूषणेषु । जयं यथार्थेषु शरेषु पार्थः शब्देषु भावार्थमिवाशशंसे ॥
KA 17.7 उपजातिः
भूयः समाधानविवृद्धतेजा नैवं पुरा युद्धमिति व्यथावान् । स निर्ववामास्रममर्षनुन्नं विषं महानाग इवेक्षणाभ्याम् ॥
KA 17.8 इन्द्रवज्रा
तस्याहवायासविलोलमौलेः संरम्भताम्रायतलोचनस्य । निर्वापयिष्यन्निव रोषतप्तं प्रस्नापयामास मुखं निदाघः ॥
KA 17.9 उपजातिः
क्रोधान्धकारान्तरितो रणाय भ्रूभेदरेखाः स बभार तिस्रः । घनोपरुद्धः प्रभवाय वृष्टेरूर्ध्वांशुराजीरिव तिग्मरश्मिः ॥
KA 17.10 उपजातिः
स प्रध्वनय्याम्बुदनादि चापं हस्तेन दिङ्नाग इवाद्रिशृङ्गम् । बलानि शम्भोरिषुभिस्तताप चेतांसि चिन्ताभिरिवाशरीरः ॥
KA 17.11 उपजातिः
सद्वादितेवाभिनिविष्टबुद्धौ गुणाभ्यसूयेव विपक्षपाते । अगोचरे वागिव चोपरेमे शक्तिः शराणां शितिकण्ठकाये ॥
KA 17.12 उपजातिः
उमापतिं पाण्डुसुतप्रणुन्नाः शिलीमुखा न व्यथयांबभूवुः । अभ्युत्थितस्याद्रिपतेर्नितम्बमर्कस्य पादा इव हैमनस्य ॥
KA 17.13 उपजातिः
सम्प्रीयमाणोऽनुबभूव तीव्रं पराक्रमं तस्य पतिर्गणानाम् । विषाणभेदं हिमवानसह्यं वप्रानतस्येव सुरद्विपस्य ॥
KA 17.14 उपजातिः
तस्मै हि भारोद्धरणे समर्थं प्रदास्यता बाहुमिव प्रतापम् । चिरं विषेहेऽभिभवस्तदानीं स कारणानामपि कारणेन ॥
KA 17.15 उपजातिः
प्रत्याहतौजाः कृतसत्त्ववेगः पराक्रमं ज्यायसि यस्तनोति । तेजांसि भानोरिव निष्पतन्ति यशांसि वीर्यज्वलितानि तस्य ॥
KA 17.16 इन्द्रवज्रा
दृष्टावदानाद्व्यथतेऽरिलोकः प्रध्वंसमेति व्यथिताच्च तेजः । तेजोविहीनं विजहाति दर्पः शान्तार्चिषं दीपमिव प्रकाशः ॥
KA 17.17 उपजातिः
ततः प्रयात्यस्तमदावलेपः स जय्यतायाः पदवीं जिगीषोः । गन्धेन जेतुः प्रमुखागतस्य प्रतिद्विपस्येव मतङ्गजौघः ॥
KA 17.18 उपजातिः
एवं प्रतिद्वन्द्विषु तस्य कीर्तिं मौलीन्दुलेखाविशदां विधास्यन् । इयेष पर्यायजयावसादां रणक्रियां शम्भुरनुक्रमेण ॥
KA 17.19 उपजातिः
मुनेर्विचित्रैरिषुभिः स भूयान्निन्ये वशं भूतपतेर्बलौघः । सहात्मलाभेन समुत्पतद्भिर्जातिस्वभावैरिव जीवलोकः ॥
KA 17.20 उपजातिः
वितन्वतस्तस्य शरान्धकारं त्रस्तानि सैन्यानि रवं निशेमुः । प्रवर्षतः संततवेपथूनि क्षपाघनस्येव गवां कुलानि ॥
KA 17.21 उपेन्द्रवज्रा
स सायकान्साध्वसविप्लुतानां क्षिपन्परेषामतिसौष्ठवेन । शशीव दोषावृतलोचनानां विभिद्यमानः पृथगाबभासे ॥
KA 17.22 उपजातिः
क्षोभेण तेनाथ गणाधिपानां भेदं ययवाकृतिरीश्वरस्य । तरङ्गकम्पेन महाह्रदानां छायामयस्येव दिनस्य कर्तुः ॥
KA 17.23 उपजातिः
प्रसेदिवांसं न तमाप कोपः कुतः परस्मिन्पुरुषे विकारः । आकारवैषम्यमिदं च भेजे दुर्लक्ष्यचिह्ना महतां हि वृत्तिः ॥
KA 17.24 इन्द्रवज्रा
विस्फार्यमाणस्य ततो भुजाभ्यां भूतानि भर्त्रा धनुरन्तकस्य । भिन्नाकृतिं ज्यां ददृशुः स्फुरन्तीं क्रुद्धस्य जिह्वामिव तक्षकस्य ॥
KA 17.25 इन्द्रवज्रा
स्व्यापसव्यध्वनितोग्रचापं पार्थः किराताधिपमाशशङ्के । पर्यायसम्पादितकर्णतालं यन्ता गजं व्यालमिवापराद्धः ॥
KA 17.26 उपजातिः
निजघ्निरे तस्य हरेषुजालैः पतन्ति वृन्दानि शिलीमुखानाम् । ऊर्जस्विभिः सिन्धुमुखागतानि यादांसि यादोभिरिवाम्बुराशेः ॥
KA 17.27 उपजातिः
विभेदमन्तः पदवीनिरोधं विध्वंसनं चाविदितप्रयोगः । नेतारिलोकेषु करोति यद्यत्तत्तच्चकारास्य शरेषु शम्भुः ॥
KA 17.28 इन्द्रवज्रा
सोढावगीतप्रथमायुधस्य क्रोधोज्झितैर्वेगितया पतद्भिः । छिन्नैरपि त्रासितवाहिनीकैः पेते कृतार्थैरिव तस्य बाणैः ॥
KA 17.29 उपजातिः
अलंकृतानाम् ऋजुतागुणेन गुरूपदिष्टां गतिमास्थितानाम् । सतामिवापर्वणि मार्गणानां भङ्गः स जिष्णोर्धृतिमुन्ममाथ ॥
KA 17.30 उपजातिः
बाणच्छिदस्ते विशिखाः स्मरारेरवाङ्मुखीभूतफलाः पतन्तः । अखण्डितं पाण्डवसायकेभ्यः कृतस्य सद्यः प्रतिकारमापुः ॥
← Previous (Ch. 16) Full Table of Contents Next (Ch. 18) →