Special Call Prof. Jay L. Garfield Commemorative Volume · Submissions Open
Announcements Newsletters About Us Contact
Search
MBh
Mahābhārata • Parva 4 (Virāṭaparva) • Adhyāya 63

Virāṭaparva Adhyāya 63

विराटपर्व • अध्यायः 63

Virāṭaparva Adhyāya 63 of the classical Mahābhārata with 55 verses.

Total: 55 Verses • Citations: MBh 4.63.1–55 • 250 Lexicon Terms • Page 2 of 2 (Verses 25 shown)
तं तथा वादिनं दृष्ट्वा पाण्डवः प्रत्यभाषत । न देवितव्यं हृष्टेन कितवेनेति नः श्रुतम् ॥
न त्वामद्य मुदा युक्तमहं देवितुमुत्सहे । प्रियं तु ते चिकीर्षामि वर्ततां यदि मन्यसे ॥
स्त्रियो गावो हिरण्यं च यच्चान्यद्वसु किंचन । न मे किंचित्त्वया रक्ष्यमन्तरेणापि देवितुम् ॥
किं ते द्यूतेन राजेन्द्र बहुदोषेण मानद । देवने बहवो दोषास्तस्मात्तत्परिवर्जयेत् ॥
श्रुतस्ते यदि वा दृष्टः पाण्डवो वै युधिष्ठिरः । स राज्यं सुमहत्स्फीतं भ्रातॄंश्च त्रिदशोपमान् ॥
द्यूते हारितवान्सर्वं तस्माद्द्यूतं न रोचये । अथ वा मन्यसे राजन्दीव्याव यदि रोचते ॥
प्रवर्तमाने द्यूते तु मत्स्यः पाण्डवमब्रवीत् । पश्य पुत्रेण मे युद्धे तादृशाः कुरवो जिताः ॥
ततोऽब्रवीन्मत्स्यराजं धर्मपुत्रो युधिष्ठिरः । बृहन्नडा यस्य यन्ता कथं स न विजेष्यति ॥
इत्युक्तः कुपितो राजा मत्स्यः पाण्डवमब्रवीत् । समं पुत्रेण मे षण्ढं ब्रह्मबन्धो प्रशंससि ॥
वाच्यावाच्यं न जानीषे नूनं मामवमन्यसे । भीष्मद्रोणमुखान्सर्वान्कस्मान्न स विजेष्यति ॥
वयस्यत्वात्तु ते ब्रह्मन्नपराधमिमं क्षमे । नेदृशं ते पुनर्वाच्यं यदि जीवितुमिच्छसि ॥
यत्र द्रोणस्तथा भीष्मो द्रौणिर्वैकर्तनः कृपः । दुर्योधनश्च राजेन्द्र तथान्ये च महारथाः ॥
मरुद्गणैः परिवृतः साक्षादपि शतक्रतुः । कोऽन्यो बृहन्नडायास्तान्प्रतियुध्येत संगतान् ॥
बहुशः प्रतिषिद्धोऽसि न च वाचं नियच्छसि । नियन्ता चेन्न विद्येत न कश्चिद्धर्ममाचरेत् ॥
ततः प्रकुपितो राजा तमक्षेणाहनद्भृशम् । मुखे युधिष्ठिरं कोपान्नैवमित्येव भर्त्सयन् ॥
बलवत्प्रतिविद्धस्य नस्तः शोणितमागमत् । तदप्राप्तं महीं पार्थः पाणिभ्यां प्रत्यगृह्णत ॥
अवैक्षत च धर्मात्मा द्रौपदीं पार्श्वतः स्थिताम् । सा वेद तमभिप्रायं भर्तुश्चित्तवशानुगा ॥
पूरयित्वा च सौवर्णं पात्रं कांस्यमनिन्दिता । तच्छोणितं प्रत्यगृह्णाद्यत्प्रसुस्राव पाण्डवात् ॥
अथोत्तरः शुभैर्गन्धैर्माल्यैश्च विविधैस्तथा । अवकीर्यमाणः संहृष्टो नगरं स्वैरमागमत् ॥
सभाज्यमानः पौरैश्च स्त्रीभिर्जानपदैस्तथा । आसाद्य भवनद्वारं पित्रे स प्रत्यहारयत् ॥
ततो द्वाःस्थः प्रविश्यैव विराटमिदमब्रवीत् । बृहन्नडासहायस्ते पुत्रो द्वार्युत्तरः स्थितः ॥
ततो हृष्टो मत्स्यराजः क्षत्तारमिदमब्रवीत् । प्रवेश्यतामुभौ तूर्णं दर्शनेप्सुरहं तयोः ॥
क्षत्तारं कुरुराजस्तु शनैः कर्ण उपाजपत् । उत्तरः प्रविशत्वेको न प्रवेश्या बृहन्नडा ॥
एतस्य हि महाबाहो व्रतमेतत्समाहितम् । यो ममाङ्गे व्रणं कुर्याच्छोणितं वापि दर्शयेत् । अन्यत्र संग्रामगतान्न स जीवेदसंशयम् ॥
न मृष्याद्भृशसंक्रुद्धो मां दृष्ट्वैव सशोणितम् । विराटमिह सामात्यं हन्यात्सबलवाहनम् ॥
← Previous (Ch. 658) Full Table of Contents Next (Ch. 660) →