विदा मघवन् विदा गातुमनुशँसिषो दिशः । शिक्षा शचीनां पते पूर्वीणां पुरूवसो ॥
vidā maghavan vidā gātumanuśam̐siṣo diśaḥ । śikṣā śacīnāṃ pate pūrvīṇāṃ purūvaso ॥
आभिष्ट्वमभिष्टिभिः स्वाऽ३र्न्नाँशुः । प्रचेतन प्रचेतयेन्द्र द्युम्नाय न इषे ॥
ābhiṣṭvamabhiṣṭibhiḥ svā'३rnnām̐śuḥ । pracetana pracetayendra dyumnāya na iṣe ॥
एवा हि शक्रो राये वाजाय वज्रिवः । शविष्ठ वज्रिन्नृञ्जसे मँहिष्ठ वज्रिन्नृञ्जस । आ याहि पिब मत्स्व ॥
evā hi śakro rāye vājāya vajrivaḥ । śaviṣṭha vajrinnṛñjase mam̐hiṣṭha vajrinnṛñjasa । ā yāhi piba matsva ॥
विदा राये सुवीर्यं भवो वाजानां पतिर्वशाँ अनु । मँहिष्ठ वज्रिन्नृञ्जसे यः शविष्ठः शूराणाम् ॥
vidā rāye suvīryaṃ bhavo vājānāṃ patirvaśām̐ anu । mam̐hiṣṭha vajrinnṛñjase yaḥ śaviṣṭhaḥ śūrāṇām ॥
यो मँहिष्ठो मघोनाम्ँशुर्न्न शोचिः । चिकित्वो अभि नो नयेन्द्रो विदे तमु स्तुहि ॥
yo mam̐hiṣṭho maghonāmm̐śurnna śociḥ । cikitvo abhi no nayendro vide tamu stuhi ॥
ईशे हि शक्रस्तमूतये हवामहे जेतारमपराजितम् । स नः स्वर्षदति द्विषः क्रतुश्छन्द ऋतं बृहत् ॥
īśe hi śakrastamūtaye havāmahe jetāramaparājitam । sa naḥ svarṣadati dviṣaḥ kratuśchanda ṛtaṃ bṛhat ॥
इन्द्रं धनस्य सातये हवामहे जेतारमपराजितम् । स नः स्वर्षदति द्विषः स नः स्वर्षदति द्विषः ॥
indraṃ dhanasya sātaye havāmahe jetāramaparājitam । sa naḥ svarṣadati dviṣaḥ sa naḥ svarṣadati dviṣaḥ ॥
पूर्वस्य यत्ते अद्रिवोँऽशुर्मदाय । सुम्न आ धेहि नो वसो पूर्तिः शविष्ठ शस्यते । वशी हि शक्रो नूनं तन्नव्यँ संन्यसे ॥
pūrvasya yatte adrivom̐'śurmadāya । sumna ā dhehi no vaso pūrtiḥ śaviṣṭha śasyate । vaśī hi śakro nūnaṃ tannavyam̐ saṃnyase ॥
प्रभो जनस्य वृत्रहन्त्समर्येषु ब्रवावहै । शूरो यो गोषु गच्छति सखा सुशेवो अद्वयुः ॥
prabho janasya vṛtrahantsamaryeṣu bravāvahai । śūro yo goṣu gacchati sakhā suśevo advayuḥ ॥
एवाह्योऽ३ऽ३ऽ३वा । एवा ह्यग्ने । एवाहीन्द्र । एवा हि पूषन् । एवा हि देवाः ॐ एवाहि देवाः ॥
evāhyo'३'३'३vā । evā hyagne । evāhīndra । evā hi pūṣan । evā hi devāḥ ॐ evāhi devāḥ ॥
