गृणे तदिन्द्र ते शव उपमां देवतातये । यद्धँसि वृत्रमोजसा शचीपते ॥
gṛṇe tadindra te śava upamāṃ devatātaye । yaddham̐si vṛtramojasā śacīpate ॥
यस्य त्यच्छम्बरं मदे दिवोदासाय रन्धयन् । अयँ स सोम इन्द्र ते सुतः पिब ॥
yasya tyacchambaraṃ made divodāsāya randhayan । ayam̐ sa soma indra te sutaḥ piba ॥
एन्द्र नो गधि प्रिय सत्राजिदगोह्य । गिरिर्न विश्वतः पृथुः पतिर्दिवः ॥
endra no gadhi priya satrājidagohya । girirna viśvataḥ pṛthuḥ patirdivaḥ ॥
य इन्द्र सोमपातमो मदः शविष्ठ चेतति । येना हँसि न्या३त्रिणं तमीमहे ॥
ya indra somapātamo madaḥ śaviṣṭha cetati । yenā ham̐si nyā३triṇaṃ tamīmahe ॥
तुचे तुनाय तत्सु नो द्राधीय आयुर्जीवसे । आदित्यासः समहसः कृणोतन ॥
tuce tunāya tatsu no drādhīya āyurjīvase । ādityāsaḥ samahasaḥ kṛṇotana ॥
वेत्था हि निरृतीनां वज्रहस्त परिवृजम् । अहरहः शुन्ध्युः परिपदामिव ॥
vetthā hi nirṛtīnāṃ vajrahasta parivṛjam । aharahaḥ śundhyuḥ paripadāmiva ॥
अपामीवामप स्त्रिधमप सेधत दुर्मतिम् । आदित्यासो युयोतना नो अँहसः ॥
apāmīvāmapa stridhamapa sedhata durmatim । ādityāso yuyotanā no am̐hasaḥ ॥
पिबा सोममिन्द्र मन्दतु त्वा यं ते सुषाव हर्यश्वाद्रिः । सोतुर्बाहुभ्याँ सुयतो नार्वा ॥
pibā somamindra mandatu tvā yaṃ te suṣāva haryaśvādriḥ । soturbāhubhyām̐ suyato nārvā ॥
अभ्रातृव्यो अना त्वमनापिरिन्द्र जनुषा सनादसि । युधेदापित्वमिच्छसे ॥
abhrātṛvyo anā tvamanāpirindra januṣā sanādasi । yudhedāpitvamicchase ॥
यो न इदमिदं पुरा प्र वस्य आनिनाय तमु व स्तुषे । सखाय इन्द्रमूतये ॥
yo na idamidaṃ purā pra vasya ānināya tamu va stuṣe । sakhāya indramūtaye ॥
आ गन्ता मा रिषण्यत प्रस्थावानो माप स्थात समन्यवः । दृढा चिद्यमयिष्णवः ॥
ā gantā mā riṣaṇyata prasthāvāno māpa sthāta samanyavaḥ । dṛḍhā cidyamayiṣṇavaḥ ॥
आ याह्ययमिन्दवेऽश्वपते गोपत उर्वरापते । सोमँ सोमपते पिब ॥
ā yāhyayamindave'śvapate gopata urvarāpate । somam̐ somapate piba ॥
त्वया ह स्विद्युजा वयं प्रति श्वसन्तं वृषभ ब्रुवीमहि । सँस्थे जनस्य गोमतः ॥
tvayā ha svidyujā vayaṃ prati śvasantaṃ vṛṣabha bruvīmahi । sam̐sthe janasya gomataḥ ॥
गावश्चिद्धा समन्यवः सजात्येन मरुतः सबन्धवः । रिहते ककुभो मिथः ॥
gāvaściddhā samanyavaḥ sajātyena marutaḥ sabandhavaḥ । rihate kakubho mithaḥ ॥
त्वं न इन्द्रा भर ओजो नृम्णँ शतक्रतो विचर्षणे । आ वीरं पृतनासहम् ॥
tvaṃ na indrā bhara ojo nṛmṇam̐ śatakrato vicarṣaṇe । ā vīraṃ pṛtanāsaham ॥
अधा हीन्द्र गिर्वण उप त्वा काम ईमहे ससृग्महे । उदेव ग्मन्त उदभिः ॥
adhā hīndra girvaṇa upa tvā kāma īmahe sasṛgmahe । udeva gmanta udabhiḥ ॥
सीदन्तस्ते वयो यथा गोश्रीते मधौ मदिरे विवक्षणे । अभि त्वामिन्द्र नोनुमः ॥
sīdantaste vayo yathā gośrīte madhau madire vivakṣaṇe । abhi tvāmindra nonumaḥ ॥
वयमु त्वामपूर्व्य स्थूरं न कच्चिद्भरन्तोऽवस्यवः । वज्रिञ्चित्रँ हवामहे ॥
vayamu tvāmapūrvya sthūraṃ na kaccidbharanto'vasyavaḥ । vajriñcitram̐ havāmahe ॥
स्वादोरित्था विषूवतो मधोः पिबन्ति गौर्यः । या इन्द्रेण सयावरीर्वृष्णा मदन्ति शोभथा वस्वीरनु स्वराज्यम् ॥
svādoritthā viṣūvato madhoḥ pibanti gauryaḥ । yā indreṇa sayāvarīrvṛṣṇā madanti śobhathā vasvīranu svarājyam ॥
इत्था हि सोम इन्मदो ब्रह्म चकार वर्धनम् । शविष्ठ वज्रिन्नोजसा पृथिव्या निः शशा अहिमर्चन्ननु स्वराज्यम् ॥
itthā hi soma inmado brahma cakāra vardhanam । śaviṣṭha vajrinnojasā pṛthivyā niḥ śaśā ahimarcannanu svarājyam ॥
इन्द्रो मदाय वावृधे शवसे वृत्रहा नृभिः । तमिन्महत्स्वाजिषूतिमर्भे हवामहे स वाजेषु प्र नोऽविषत् ॥
indro madāya vāvṛdhe śavase vṛtrahā nṛbhiḥ । taminmahatsvājiṣūtimarbhe havāmahe sa vājeṣu pra no'viṣat ॥
इन्द्र तुभ्यमिदद्रिवोऽनुत्तं वज्रिन्वीर्यम् । यद्ध त्यं मायिनं मृगं तव त्यन्माययावधीरर्चन्ननु स्वराज्यम् ॥
indra tubhyamidadrivo'nuttaṃ vajrinvīryam । yaddha tyaṃ māyinaṃ mṛgaṃ tava tyanmāyayāvadhīrarcannanu svarājyam ॥
प्रेह्यभीहि धृष्णुहि न ते वज्रो नि यँसते । इन्द्र नृम्णँ हि ते शवो हनो वृत्रं जया अपोऽर्चन्ननु स्वराज्यम् ॥
prehyabhīhi dhṛṣṇuhi na te vajro ni yam̐sate । indra nṛmṇam̐ hi te śavo hano vṛtraṃ jayā apo'rcannanu svarājyam ॥
यदुदीरत आजयो धृष्णवे धीयते धनम् । युङ्क्ष्वा मदच्युता हरी कँ हनः कं वसौ दधोऽस्माँ इन्द्र वसौ दधः ॥
yadudīrata ājayo dhṛṣṇave dhīyate dhanam । yuṅkṣvā madacyutā harī kam̐ hanaḥ kaṃ vasau dadho'smām̐ indra vasau dadhaḥ ॥
अक्षन्नमीमदन्त ह्यव प्रिया अधूषत । अस्तोषत स्वभानवो विप्रा नविष्ठया मती योजा न्विन्द्र ते हरी ॥
akṣannamīmadanta hyava priyā adhūṣata । astoṣata svabhānavo viprā naviṣṭhayā matī yojā nvindra te harī ॥
उपो षु शृणुही गिरो मघवन्मातथा इव । कदा नः सूनृतावतः कर इदर्थयास इद्योजा न्विन्द्र ते हरी ॥
upo ṣu śaṛṇuhī giro maghavanmātathā iva । kadā naḥ sūnṛtāvataḥ kara idarthayāsa idyojā nvindra te harī ॥
चन्द्रमा अप्स्वा३न्तरा सुपर्णो धावते दिवि । न वो हिरण्यनेमयः पदं विन्दन्ति विद्युतो वित्तं मे अस्य रोदसी ॥
candramā apsvā३ntarā suparṇo dhāvate divi । na vo hiraṇyanemayaḥ padaṃ vindanti vidyuto vittaṃ me asya rodasī ॥
प्रति प्रियतमँ रथं वृषणं वसुवाहनम् । स्तोता वामश्विनावृशि स्तोमेभिर्भूषति प्रति माध्वी मम श्रुतँ हवम् ॥
prati priyatamam̐ rathaṃ vṛṣaṇaṃ vasuvāhanam । stotā vāmaśvināvṛśi stomebhirbhūṣati prati mādhvī mama śrutam̐ havam ॥
आ ते अग्न इधीमहि द्युमन्तं देवाजरम् । युद्ध स्या ते पनीयसी समिद्दीदयति द्यवीषँ स्तोतृभ्य आ भर ॥
ā te agna idhīmahi dyumantaṃ devājaram । yuddha syā te panīyasī samiddīdayati dyavīṣam̐ stotṛbhya ā bhara ॥
आग्निं न स्ववृक्तिभिर्होतारं त्वा वृणीमहे । शीरं पावकशोचिषं वि वो मदे यज्ञेषु स्तीर्णबर्हिषं विवक्षसे ॥
āgniṃ na svavṛktibhirhotāraṃ tvā vṛṇīmahe । śīraṃ pāvakaśociṣaṃ vi vo made yajñeṣu stīrṇabarhiṣaṃ vivakṣase ॥
