उषा अप स्वसुष्टमः सं वर्त्तयति वर्त्तनिँ सुजातता ॥
uṣā apa svasuṣṭamaḥ saṃ varttayati varttanim̐ sujātatā ॥
इमा नु कं भुवना सीषधेमेन्द्रश्च विश्वे च देवाः ॥
imā nu kaṃ bhuvanā sīṣadhemendraśca viśve ca devāḥ ॥
वि स्रुतयो यथा पथ इन्द्र त्वद्यन्तु रातयः ॥
vi srutayo yathā patha indra tvadyantu rātayaḥ ॥
अया वाजं देवहितँ सनेम मदेम शतहिमाः सुवीराः ॥
ayā vājaṃ devahitam̐ sanema madema śatahimāḥ suvīrāḥ ॥
ऊर्जा मित्रो वरुणः पिन्वतेडाः पीवरीमिषं कृणुही न इन्द्र ॥
ūrjā mitro varuṇaḥ pinvateḍāḥ pīvarīmiṣaṃ kṛṇuhī na indra ॥
इन्द्रो विश्वस्य राजति ॥
indro viśvasya rājati ॥
त्रिकद्रुकेषु महिषो यवाशिरं तुविशुष्मस्तृम्पत्सोममपिबद्विष्णुना सुतं यथावशम् । स ईं ममाद महि कर्म कर्त्तवे महामुरुँ सैनँ सश्चद्देवो देवँ सत्य इन्दुः सत्यमिन्द्रम् ॥
trikadrukeṣu mahiṣo yavāśiraṃ tuviśuṣmastṛmpatsomamapibadviṣṇunā sutaṃ yathāvaśam । sa īṃ mamāda mahi karma karttave mahāmurum̐ sainam̐ saścaddevo devam̐ satya induḥ satyamindram ॥
अयँ सहस्रमानवो दृशः कवीनां मतिर्ज्योतिर्विधर्म । ब्रध्नः समीचीरुषसः समैरयदरेपसः सोचेतसः स्वसरे मन्युमन्तश्चिता गोः ॥
ayam̐ sahasramānavo dṛśaḥ kavīnāṃ matirjyotirvidharma । bradhnaḥ samīcīruṣasaḥ samairayadarepasaḥ socetasaḥ svasare manyumantaścitā goḥ ॥
एन्द्र याह्युप नः परावतो नायमच्छा विदथानीव सत्पतिरस्ता राजेव सत्पतिः । हवामहे त्वा प्रयस्वन्तः सुतेष्वा पुत्रासो न पितरं वाजसातये मँहिष्ठं वाजसातये ॥
endra yāhyupa naḥ parāvato nāyamacchā vidathānīva satpatirastā rājeva satpatiḥ । havāmahe tvā prayasvantaḥ suteṣvā putrāso na pitaraṃ vājasātaye mam̐hiṣṭhaṃ vājasātaye ॥
तमिन्द्रं जोहवीमि मघवानमुग्रँ सत्रा दधानमप्रतिष्कुतँ श्रवाँसि भूरिः । मँहिष्ठो गीर्भिरा च यज्ञियो ववर्त्त राये नो विश्वा सुपथा कृणोतु वज्री ॥
tamindraṃ johavīmi maghavānamugram̐ satrā dadhānamapratiṣkutam̐ śravām̐si bhūriḥ । mam̐hiṣṭho gīrbhirā ca yajñiyo vavartta rāye no viśvā supathā kṛṇotu vajrī ॥
अस्तु श्रौष्ट्पुरो अग्निं धिया दध आ नु त्यच्छर्धो दिव्यं वृणीमह इन्द्रवायू वृणीमहे । यद्ध क्राणा विवस्वते नाभा सन्दाय नव्यसे । अध प्र नूनमुप यन्ति धीतयो देवाँअच्छा न धीतयः ॥
astu śrauṣṭpuro agniṃ dhiyā dadha ā nu tyacchardho divyaṃ vṛṇīmaha indravāyū vṛṇīmahe । yaddha krāṇā vivasvate nābhā sandāya navyase । adha pra nūnamupa yanti dhītayo devām̐acchā na dhītayaḥ ॥
प्र वो महे मतयो यन्तु विष्णवे मरुत्वते गिरिजा एवयामरुत् । प्र शर्धाय प्र यज्यवे सुखादये तवसे भन्ददिष्टये धुनिव्रताय शवसे ॥
pra vo mahe matayo yantu viṣṇave marutvate girijā evayāmarut । pra śardhāya pra yajyave sukhādaye tavase bhandadiṣṭaye dhunivratāya śavase ॥
अया रुचा हरिण्या पुनानो विश्वा द्वेषाँसि तरति सयुग्वभिः सूरो न सयुग्वभिः । धारा पृष्ठस्य रोचते पुनानो अरुषो हरिः । विश्वा यद्रूपा परियास्यृक्वभिः सप्तास्येभिरृक्वभिः ॥
ayā rucā hariṇyā punāno viśvā dveṣām̐si tarati sayugvabhiḥ sūro na sayugvabhiḥ । dhārā pṛṣṭhasya rocate punāno aruṣo hariḥ । viśvā yadrūpā pariyāsyṛkvabhiḥ saptāsyebhirṛkvabhiḥ ॥
अभि त्यं देवँ सवितारमोण्योः कविक्रतुमर्चामि सत्यसवँ रत्नधामभि प्रियं मतिम् ऊर्ध्वा यस्यामतिर्भा अदिद्युतत्सवीमनि हिरण्यपाणिरमिमीत सुक्रतुः कृपा स्वः ॥
abhi tyaṃ devam̐ savitāramoṇyoḥ kavikratumarcāmi satyasavam̐ ratnadhāmabhi priyaṃ matim ūrdhvā yasyāmatirbhā adidyutatsavīmani hiraṇyapāṇiramimīta sukratuḥ kṛpā svaḥ ॥
अग्निँ होतारं मन्ये दास्वन्तं वसोः सूनुँ सहसो जातवेदसं विप्रं न जातवेदसम् । य ऊर्ध्वया स्वध्वरो देवो देवाच्या कृपा । घृतस्य विभ्राष्टिमनु शुक्रशोचिष आजुह्वानस्य सर्पिषः ॥
agnim̐ hotāraṃ manye dāsvantaṃ vasoḥ sūnum̐ sahaso jātavedasaṃ vipraṃ na jātavedasam । ya ūrdhvayā svadhvaro devo devācyā kṛpā । ghṛtasya vibhrāṣṭimanu śukraśociṣa ājuhvānasya sarpiṣaḥ ॥
तव त्यन्नर्यं नृतोऽप इन्द्र प्रथमं पूर्व्यं दिवि प्रवाच्यं कृतम् । यो देवस्य शवसा प्रारिणा असु रिणन्नपः । भुवो विश्वमभ्यदेवमोजसा विदेदूर्जँ शतक्रतुर्विदेदिषम् ॥
tava tyannaryaṃ nṛto'pa indra prathamaṃ pūrvyaṃ divi pravācyaṃ kṛtam । yo devasya śavasā prāriṇā asu riṇannapaḥ । bhuvo viśvamabhyadevamojasā videdūrjam̐ śatakraturvidediṣam ॥
उच्चा ते जातमन्धसो दिवि सद्भूम्या ददे । उग्रँ शर्म महि श्रवः ॥
uccā te jātamandhaso divi sadbhūmyā dade । ugram̐ śarma mahi śravaḥ ॥
स्वादिष्ठया मदिष्ठया पवस्व सोम धारया । इन्द्राय पातवे सुतः ॥
svādiṣṭhayā madiṣṭhayā pavasva soma dhārayā । indrāya pātave sutaḥ ॥
वृषा पवस्व धारया मरुत्वते च मत्सरः । विश्वा दधान ओजसा ॥
vṛṣā pavasva dhārayā marutvate ca matsaraḥ । viśvā dadhāna ojasā ॥
यस्ते मदो वरेण्यस्तेना पवस्वान्धसा । देवावीरघशँसहा ॥
yaste mado vareṇyastenā pavasvāndhasā । devāvīraghaśam̐sahā ॥
तिस्रो वाच उदीरते गावो मिमन्ति धेनवः । हरिरेति कनिक्रदत् ॥
tisro vāca udīrate gāvo mimanti dhenavaḥ । harireti kanikradat ॥
इन्द्रायेन्दो मरुत्वते पवस्व मधुमत्तमः । अर्कस्य योनिमासदम् ॥
indrāyendo marutvate pavasva madhumattamaḥ । arkasya yonimāsadam ॥
असाव्यँशुर्मदायाप्सु दक्षो गिरिष्ठाः । श्येनो न योनिमासदत् ॥
asāvyam̐śurmadāyāpsu dakṣo giriṣṭhāḥ । śyeno na yonimāsadat ॥
पवस्व दक्षसाधनो देवेभ्यः पीतये हरे । मरुद्भ्यो वायवे मदः ॥
pavasva dakṣasādhano devebhyaḥ pītaye hare । marudbhyo vāyave madaḥ ॥
परि स्वानो गिरिष्ठाः पवित्रे सोमो अक्षरत् । मदेषु सर्वधा असि ॥
pari svāno giriṣṭhāḥ pavitre somo akṣarat । madeṣu sarvadhā asi ॥
परि प्रिया दिवः कविर्वयाँसि नप्त्योर्हितः । स्वानैर्याति कविक्रतुः ॥
pari priyā divaḥ kavirvayām̐si naptyorhitaḥ । svānairyāti kavikratuḥ ॥
प्र सोमासो मदच्युतः श्रवसे नो मघोनः । सुता विदथे अक्रमुः ॥
pra somāso madacyutaḥ śravase no maghonaḥ । sutā vidathe akramuḥ ॥
प्र सोमासो विपश्चितोऽपो नयन्त ऊर्मयः । वनानि महिषा इव ॥
pra somāso vipaścito'po nayanta ūrmayaḥ । vanāni mahiṣā iva ॥
पवस्वेन्दो वृषा सुतः कृधी नो यशसो जने । विश्वा अप द्विषो जहि ॥
pavasvendo vṛṣā sutaḥ kṛdhī no yaśaso jane । viśvā apa dviṣo jahi ॥
वृषा ह्यसि भानुना द्युमन्तं त्वा हवामहे । पवमान स्वर्दृशम् ॥
vṛṣā hyasi bhānunā dyumantaṃ tvā havāmahe । pavamāna svardṛśam ॥
