महे नो अद्य बोधयोषो राये दिवित्मती । यथा चिन्नो अबोधयः सत्यश्रवसि वाय्ये सुजाते अश्वसूनृते ॥
mahe no adya bodhayoṣo rāye divitmatī । yathā cinno abodhayaḥ satyaśravasi vāyye sujāte aśvasūnṛte ॥
भद्रं नो अपि वातय मनो दक्षमुत क्रतुम् । अथा ते सख्ये अन्धसो वि वो मदे रणा गावो न यवसे विवक्षसे ॥
bhadraṃ no api vātaya mano dakṣamuta kratum । athā te sakhye andhaso vi vo made raṇā gāvo na yavase vivakṣase ॥
क्रत्वा महाँ अनुष्वधं भीम आ वावृते शवः । श्रिय ऋष्व उपाकयोर्नि शिप्री हरिवां दधे हस्तयोर्वज्रमायसम् ॥
kratvā mahām̐ anuṣvadhaṃ bhīma ā vāvṛte śavaḥ । śriya ṛṣva upākayorni śiprī harivāṃ dadhe hastayorvajramāyasam ॥
स घा तं वृषणँ रथमधि तिष्ठाति गोविदम् । यः पात्रँ हारियोजनं पूर्णमिन्द्रा चिकेतति योजा न्विन्द्र ते हरी ॥
sa ghā taṃ vṛṣaṇam̐ rathamadhi tiṣṭhāti govidam । yaḥ pātram̐ hāriyojanaṃ pūrṇamindrā ciketati yojā nvindra te harī ॥
अग्निं तं मन्ये यो वसुरस्तं यं यन्ति धेनवः । अस्तमर्वन्त आशवोऽस्तं नित्यासो वाजिन इषँ स्तोतृभ्य आ भर ॥
agniṃ taṃ manye yo vasurastaṃ yaṃ yanti dhenavaḥ । astamarvanta āśavo'staṃ nityāso vājina iṣam̐ stotṛbhya ā bhara ॥
न तमँहो न दुरितं देवासो अष्ट मर्त्यम् । सजोषसो यमर्यमा मित्रो नयति वरुणो अति द्विषः ॥
na tamam̐ho na duritaṃ devāso aṣṭa martyam । sajoṣaso yamaryamā mitro nayati varuṇo ati dviṣaḥ ॥
परि प्र धन्वेन्द्राय सोम स्वादुर्मित्राय पूष्णे भगाय ॥
pari pra dhanvendrāya soma svādurmitrāya pūṣṇe bhagāya ॥
पर्यू षु प्र धन्व वाजसातये परि वृत्राणि सक्षणिः । द्विषस्तरध्या ऋणया न ईरसे ॥
paryū ṣu pra dhanva vājasātaye pari vṛtrāṇi sakṣaṇiḥ । dviṣastaradhyā ṛṇayā na īrase ॥
पवस्व सोम महान्त्समुद्रः पिता देवानां विश्वाभि धाम ॥
pavasva soma mahāntsamudraḥ pitā devānāṃ viśvābhi dhāma ॥
पवस्व सोम महे दक्षायाश्वो न निक्तो वाजी धनाय ॥
pavasva soma mahe dakṣāyāśvo na nikto vājī dhanāya ॥
इन्दुः पविष्ट चारुर्मदायापामुपस्थे कविर्भगाय ॥
induḥ paviṣṭa cārurmadāyāpāmupasthe kavirbhagāya ॥
अनु हि त्वा सुतँ सोम मदामसि महे समर्यराज्ये । वाजाँ अभि पवमान प्र गाहसे ॥
anu hi tvā sutam̐ soma madāmasi mahe samaryarājye । vājām̐ abhi pavamāna pra gāhase ॥
क ईं व्यक्ता नरः सनीडा रुद्रस्य मर्या अथ स्वश्वाः ॥
ka īṃ vyaktā naraḥ sanīḍā rudrasya maryā atha svaśvāḥ ॥
अग्ने तमद्याश्वं न स्तोमैः क्रतुं न भद्रँ हृदिस्पृशम् । ऋध्यामा त ओहैः ॥
agne tamadyāśvaṃ na stomaiḥ kratuṃ na bhadram̐ hṛdispṛśam । ṛdhyāmā ta ohaiḥ ॥
आविर्मर्या आ वाजं वाजिनो अग्मं देवस्य सवितुः सवम् । स्वर्गाँ अर्वन्तो जयत ॥
āvirmaryā ā vājaṃ vājino agmaṃ devasya savituḥ savam । svargām̐ arvanto jayata ॥
पवस्व सोम द्युम्नी सुधारो महाँ अवीनामनुपूर्व्यः ॥
pavasva soma dyumnī sudhāro mahām̐ avīnāmanupūrvyaḥ ॥
विश्वतोदावन्विश्वतो न आ भर यं त्वा शविष्ठमीमहे ॥
viśvatodāvanviśvato na ā bhara yaṃ tvā śaviṣṭhamīmahe ॥
एष ब्रह्मा य ऋत्विय इन्द्रो नाम श्रुतो गृणे ॥
eṣa brahmā ya ṛtviya indro nāma śruto gṛṇe ॥
ब्रह्माण इन्द्रं महयन्तो अर्कैरवर्धयन्नहये हन्तवा उ ॥
brahmāṇa indraṃ mahayanto arkairavardhayannahaye hantavā u ॥
अनवस्ते रथमश्वाय तक्षुस्त्वष्टा वज्रं पुरुहूत द्युमन्तम् ॥
anavaste rathamaśvāya takṣustvaṣṭā vajraṃ puruhūta dyumantam ॥
शं पदं मघँ रयीषिणो न काममव्रतो हिनोति न स्पृशद्रयिम् ॥
śaṃ padaṃ magham̐ rayīṣiṇo na kāmamavrato hinoti na spṛśadrayim ॥
सदा गावः शुचयो विश्वधायसः सदा देवा अरेपसः ॥
sadā gāvaḥ śucayo viśvadhāyasaḥ sadā devā arepasaḥ ॥
आ याहि वनसा सह गावः सचन्त वर्त्तनिं यदूधभिः ॥
ā yāhi vanasā saha gāvaḥ sacanta varttaniṃ yadūdhabhiḥ ॥
उप प्रक्षे मधुमति क्षियन्तः पुष्येम रयिं धीमहे त इन्द्र ॥
upa prakṣe madhumati kṣiyantaḥ puṣyema rayiṃ dhīmahe ta indra ॥
अर्चन्त्यर्कं मरुतः स्वर्क्का आ स्तोभति श्रुतो युवा स इन्द्रः ॥
arcantyarkaṃ marutaḥ svarkkā ā stobhati śruto yuvā sa indraḥ ॥
प्र व इन्द्राय वृत्रहन्तमाय विप्राय गाथं गायत यं जुजोषते ॥
pra va indrāya vṛtrahantamāya viprāya gāthaṃ gāyata yaṃ jujoṣate ॥
अचेत्यग्निश्चिकितिर्हव्यवाड्न सुमद्रथः ॥
acetyagniścikitirhavyavāḍna sumadrathaḥ ॥
अग्ने त्वं नो अन्तम उत त्राता शिवो भुवो वरूथ्यः ॥
agne tvaṃ no antama uta trātā śivo bhuvo varūthyaḥ ॥
भगो न चित्रो अग्निर्महोनां दधाति रत्नम् ॥
bhago na citro agnirmahonāṃ dadhāti ratnam ॥
विश्वस्य प्र स्तोभ पुरो वा सन्यदि वेह नूनम् ॥
viśvasya pra stobha puro vā sanyadi veha nūnam ॥
