अव द्रप्सो अँशुमतीमतिष्ठदीयानः कृष्णो दशभिः सहस्रैः । आवत्तमिन्द्रः शच्या धमन्तमप स्नीहितिं नृमणा अधद्राः ॥
ava drapso am̐śumatīmatiṣṭhadīyānaḥ kṛṣṇo daśabhiḥ sahasraiḥ । āvattamindraḥ śacyā dhamantamapa snīhitiṃ nṛmaṇā adhadrāḥ ॥
वृत्रस्य त्वा श्वसथादीषमाणा विश्वे देवा अजहुर्ये सखायः । मरुद्भिरिन्द्र सख्यं ते अस्त्वथेमा विश्वाः पृतना जयासि ॥
vṛtrasya tvā śvasathādīṣamāṇā viśve devā ajahurye sakhāyaḥ । marudbhirindra sakhyaṃ te astvathemā viśvāḥ pṛtanā jayāsi ॥
विधुं दद्राणँ समने बहूनाँ युवानँ सन्तं पलितो जगार । देवस्य पश्य काव्यं महित्वाद्या ममार स ह्यः समान ॥
vidhuṃ dadrāṇam̐ samane bahūnām̐ yuvānam̐ santaṃ palito jagāra । devasya paśya kāvyaṃ mahitvādyā mamāra sa hyaḥ samāna ॥
त्वँ ह त्यत्सप्तभ्यो जायमानोऽशत्रुभ्यो अभवः शत्रुरिन्द्र । गूढे द्यावापृथिवी अन्वविन्दो विभुमद्भ्यो भुवनेभ्यो रणं धाः ॥
tvam̐ ha tyatsaptabhyo jāyamāno'śatrubhyo abhavaḥ śatrurindra । gūḍhe dyāvāpṛthivī anvavindo vibhumadbhyo bhuvanebhyo raṇaṃ dhāḥ ॥
मेडिं न त्वा वज्रिणं भृष्टिमन्तं पुरुधस्मानं वृषभँ स्थिरप्स्नुम् । करोष्यर्यस्तरुषीर्दुवस्युरिन्द्र द्युक्षं वृत्रहणं गृणीषे ॥
meḍiṃ na tvā vajriṇaṃ bhṛṣṭimantaṃ purudhasmānaṃ vṛṣabham̐ sthirapsnum । karoṣyaryastaruṣīrduvasyurindra dyukṣaṃ vṛtrahaṇaṃ gṛṇīṣe ॥
प्र वो महे महेवृधे भरध्वं प्रचेतसे प्र सुमतिं कृणुध्वम् । विशः पूर्वीः प्र चर चर्षणिप्राः ॥
pra vo mahe mahevṛdhe bharadhvaṃ pracetase pra sumatiṃ kṛṇudhvam । viśaḥ pūrvīḥ pra cara carṣaṇiprāḥ ॥
शुनँ हुवेम मघवानमिन्द्रमस्मिन्भरे नृतमं वाजसातौ । शृण्वन्तमुग्रमूतये समत्सु ध्नन्तं वृत्राणि सञ्जितं धनानि ॥
śunam̐ huvema maghavānamindramasminbhare nṛtamaṃ vājasātau । śaṛṇvantamugramūtaye samatsu dhnantaṃ vṛtrāṇi sañjitaṃ dhanāni ॥
उदु ब्रह्माण्यैरत श्रवस्येन्द्रँ समर्ये महया वसिष्ठ । आ यो विश्वानि श्रवसा ततानोपश्रोता म ईवतो वचाँसि ॥
udu brahmāṇyairata śravasyendram̐ samarye mahayā vasiṣṭha । ā yo viśvāni śravasā tatānopaśrotā ma īvato vacām̐si ॥
चक्रं यदस्याप्स्वा निषत्तमुतो तदस्मै मध्विच्चच्छद्यात् । पृथिव्यामतिषितं यदूधः पयो गोष्वदधा ओषधीषु ॥
cakraṃ yadasyāpsvā niṣattamuto tadasmai madhviccacchadyāt । pṛthivyāmatiṣitaṃ yadūdhaḥ payo goṣvadadhā oṣadhīṣu ॥
त्यमू षु वाजिनं देवजूतँ सहोवानं तरुतारँ रथानाम् । अरिष्टनेमिं पृतनाजमाशुँ स्वस्तये तार्क्ष्यमिहा हुवेम ॥
tyamū ṣu vājinaṃ devajūtam̐ sahovānaṃ tarutāram̐ rathānām । ariṣṭanemiṃ pṛtanājamāśum̐ svastaye tārkṣyamihā huvema ॥
त्रातारमिन्द्रमवितारमिन्द्रँ हवेहवे सुहवँ शूरमिन्द्रम् । हुवे नु शक्रं पुरुहूतमिन्द्रमिदँ हविर्मघवा वेत्विन्द्रः ॥
trātāramindramavitāramindram̐ havehave suhavam̐ śūramindram । huve nu śakraṃ puruhūtamindramidam̐ havirmaghavā vetvindraḥ ॥
यजामह इन्द्रं वज्रदक्षिणँ हरीणाँ रथ्य३ं विव्रतानाम् । प्र श्मश्रुभिर्दोधुवदूर्ध्वधा भुवद्वि सेनाभिर्भयमानो वि राधसा ॥
yajāmaha indraṃ vajradakṣiṇam̐ harīṇām̐ rathya३ṃ vivratānām । pra śmaśrubhirdodhuvadūrdhvadhā bhuvadvi senābhirbhayamāno vi rādhasā ॥
सत्राहणं दाधृषिं तुम्रमिन्द्रं महामपारं वृशभँ सुवज्रम् । हन्ता यो वृत्रँ सनितोत वाजं दाता मघानि मघवा सुराधाः ॥
satrāhaṇaṃ dādhṛṣiṃ tumramindraṃ mahāmapāraṃ vṛśabham̐ suvajram । hantā yo vṛtram̐ sanitota vājaṃ dātā maghāni maghavā surādhāḥ ॥
यो नो वनुष्यन्नभिदाति मर्त उगणा वा मन्यमानस्तुरो वा । क्षिधी युधा शवसा वा तमिन्द्राभी ष्याम वृषमणस्त्वोताः ॥
yo no vanuṣyannabhidāti marta ugaṇā vā manyamānasturo vā । kṣidhī yudhā śavasā vā tamindrābhī ṣyāma vṛṣamaṇastvotāḥ ॥
यं वृत्रेषु क्षितय स्पर्धमाना यं युक्तेषु तुरयन्तो हवन्ते । यँ शूरसातौ यमपामुपज्मन्यं विप्रासो वाजयन्ते स इन्द्रः ॥
yaṃ vṛtreṣu kṣitaya spardhamānā yaṃ yukteṣu turayanto havante । yam̐ śūrasātau yamapāmupajmanyaṃ viprāso vājayante sa indraḥ ॥
इन्द्रापर्वता बृहता रथेन वामीरिष आ वहतँ सुवीराः । वीतँ हव्यान्यध्वरेषु देवा वर्धेथां गीर्भीरिडया मदन्ता ॥
indrāparvatā bṛhatā rathena vāmīriṣa ā vahatam̐ suvīrāḥ । vītam̐ havyānyadhvareṣu devā vardhethāṃ gīrbhīriḍayā madantā ॥
इन्द्राय गिरो अनिशितसर्गा अपः प्रैरयत्सगरस्य बुध्नात् । यो अक्षेणेव चक्रियौ शचीभिर्विष्वक्तस्तम्भ पृथिवीमुत द्याम् ॥
indrāya giro aniśitasargā apaḥ prairayatsagarasya budhnāt । yo akṣeṇeva cakriyau śacībhirviṣvaktastambha pṛthivīmuta dyām ॥
आ त्वा सखायः सख्या ववृत्युस्तिरः पुरू चिदर्णवां जगम्याः । पितुर्नपातमा दधित वेधा अस्मिन्क्षये प्रतरां दीद्यानः ॥
ā tvā sakhāyaḥ sakhyā vavṛtyustiraḥ purū cidarṇavāṃ jagamyāḥ । piturnapātamā dadhita vedhā asminkṣaye pratarāṃ dīdyānaḥ ॥
को अद्य युङ्क्ते धुरि गा ऋतस्य शिमीवतो भामिनो दुर्हृणायून् । आसन्नेषामप्सुवाहो मयोभून्य एषां भृत्यामृणधत्स जीवात् ॥
ko adya yuṅkte dhuri gā ṛtasya śimīvato bhāmino durhṛṇāyūn । āsanneṣāmapsuvāho mayobhūnya eṣāṃ bhṛtyāmṛṇadhatsa jīvāt ॥
गायन्ति त्वा गायत्रिणोऽर्चन्त्यर्कमर्किणः । ब्रह्माणस्त्वा शतक्रत उद्वँशमिव येमिरे ॥
gāyanti tvā gāyatriṇo'rcantyarkamarkiṇaḥ । brahmāṇastvā śatakrata udvam̐śamiva yemire ॥
इन्द्रं विश्वा अवीवृधन्त्समुद्रव्यचसं गिरः । रथीतमँ रथीनां वाजानाँ सत्पतिं पतिम् ॥
indraṃ viśvā avīvṛdhantsamudravyacasaṃ giraḥ । rathītamam̐ rathīnāṃ vājānām̐ satpatiṃ patim ॥
इममिन्द्र सुतं पिब ज्येष्ठममर्त्यं मदम् । शुक्रस्य त्वाभ्यक्षरन्धारा ऋतस्य सादने ॥
imamindra sutaṃ piba jyeṣṭhamamartyaṃ madam । śukrasya tvābhyakṣarandhārā ṛtasya sādane ॥
यदिन्द्र चित्र म इह नास्ति त्वादातमद्रिवः । राधस्तन्नो विदद्वस उभयाहस्त्या भर ॥
yadindra citra ma iha nāsti tvādātamadrivaḥ । rādhastanno vidadvasa ubhayāhastyā bhara ॥
श्रुदी हवं तिरश्च्या इन्द्र यस्त्वा सपर्यति । सुवीर्यस्य गोमतो रायस्पूर्धि महाँ असि ॥
śrudī havaṃ tiraścyā indra yastvā saparyati । suvīryasya gomato rāyaspūrdhi mahām̐ asi ॥
असावि सोम इन्द्र ते शविष्ठ धृष्णवा गहि । आ त्वा पृणक्त्विन्द्रियँ रजः सूर्यो न रश्मिभिः ॥
asāvi soma indra te śaviṣṭha dhṛṣṇavā gahi । ā tvā pṛṇaktvindriyam̐ rajaḥ sūryo na raśmibhiḥ ॥
एन्द्र याहि हरिभिरुप कण्वस्य सुष्टुतिम् । दिवो अमुष्य शासतो दिवं यय दिवावसो ॥
endra yāhi haribhirupa kaṇvasya suṣṭutim । divo amuṣya śāsato divaṃ yaya divāvaso ॥
आ त्वा गिरो रथीरिवास्थुः सुतेषु गिर्वणः । अभि त्वा समनूषत गावो वत्सं न धेनवः ॥
ā tvā giro rathīrivāsthuḥ suteṣu girvaṇaḥ । abhi tvā samanūṣata gāvo vatsaṃ na dhenavaḥ ॥
एतो न्विन्द्रँ स्तवाम शुद्धँ शुद्धेन साम्ना । शुद्धैरुक्थैर्वावृध्वाँसँ शुद्धैराशीर्वान्ममत्तु ॥
eto nvindram̐ stavāma śuddham̐ śuddhena sāmnā । śuddhairukthairvāvṛdhvām̐sam̐ śuddhairāśīrvānmamattu ॥
यो रयिं वो रयिन्तमो यो द्युम्नैर्द्युम्नवत्तमः । सोमः सुतः स इन्द्र तेऽस्ति स्वधापते मदः ॥
yo rayiṃ vo rayintamo yo dyumnairdyumnavattamaḥ । somaḥ sutaḥ sa indra te'sti svadhāpate madaḥ ॥
प्रत्यस्मै पिपीषते विश्वानि विदुषे भर । अरङ्गमाय जग्मयेऽपश्चादध्वने नरः ॥
pratyasmai pipīṣate viśvāni viduṣe bhara । araṅgamāya jagmaye'paścādadhvane naraḥ ॥
