आ नो वयोवयःशयं महान्तं गह्वरेष्ठां महान्तं पूर्विनेष्ठाम् । उग्रं वचो अपावधीः ॥
ā no vayovayaḥśayaṃ mahāntaṃ gahvareṣṭhāṃ mahāntaṃ pūrvineṣṭhām । ugraṃ vaco apāvadhīḥ ॥
आ त्वा रथं यथोतये सुम्नाय वर्तयामसि । तुविकूर्मिमृतीषहमिन्द्रँ शविष्ठ सत्पतिम् ॥
ā tvā rathaṃ yathotaye sumnāya vartayāmasi । tuvikūrmimṛtīṣahamindram̐ śaviṣṭha satpatim ॥
स पूर्व्यो महोनां वेनः क्रतुभिरानजे । यस्य द्वारा मनुः पिता देवेषु धिय आनजे ॥
sa pūrvyo mahonāṃ venaḥ kratubhirānaje । yasya dvārā manuḥ pitā deveṣu dhiya ānaje ॥
यदी वहन्त्याशवो भ्राजमाना रथेष्वा । पिबन्तो मदिरं मधु तत्र श्रवाँसि कृण्वते ॥
yadī vahantyāśavo bhrājamānā ratheṣvā । pibanto madiraṃ madhu tatra śravām̐si kṛṇvate ॥
त्यमु वो अप्रहणं गृणीषे शवसस्पतिम् । इन्द्रं विश्वासाहं नरँ शचिष्ठं विश्ववेदसम् ॥
tyamu vo aprahaṇaṃ gṛṇīṣe śavasaspatim । indraṃ viśvāsāhaṃ naram̐ śaciṣṭhaṃ viśvavedasam ॥
दधिक्राव्णो अकारिषं जिष्णोरश्वस्य वाजिनः । सुरभि नो मुखा करत्प्र न आयूँषि तारिषत् ॥
dadhikrāvṇo akāriṣaṃ jiṣṇoraśvasya vājinaḥ । surabhi no mukhā karatpra na āyūm̐ṣi tāriṣat ॥
पुरां भिन्दुर्युवा कविरमितौजा अजायत । इन्द्रो विश्वस्य कर्मणो धर्त्ता वज्री पुरुष्टुतः ॥
purāṃ bhinduryuvā kaviramitaujā ajāyata । indro viśvasya karmaṇo dharttā vajrī puruṣṭutaḥ ॥
प्रप्र वस्त्रिष्टुभमिषं वन्दद्वीरायेन्दवे । धिया वो मेधसातये पुरन्ध्या विवासति ॥
prapra vastriṣṭubhamiṣaṃ vandadvīrāyendave । dhiyā vo medhasātaye purandhyā vivāsati ॥
कश्यपस्य स्वर्विदो यावाहुः सयुजाविति । ययोर्विश्वमपि व्रतं यज्ञं धीरा निचाय्य ॥
kaśyapasya svarvido yāvāhuḥ sayujāviti । yayorviśvamapi vrataṃ yajñaṃ dhīrā nicāyya ॥
अर्चत प्रार्चता नरः प्रियमेधासो अर्चत । अर्चन्तु पुत्रका उत पुरमिद्धृष्ण्वर्चत ॥
arcata prārcatā naraḥ priyamedhāso arcata । arcantu putrakā uta puramiddhṛṣṇvarcata ॥
उक्थमिन्द्राय शँस्यं वर्धनं पुरुनिःषिधे । शक्रो यथा सुतेषु नो रारणत्सख्येषु च ॥
ukthamindrāya śam̐syaṃ vardhanaṃ puruniḥṣidhe । śakro yathā suteṣu no rāraṇatsakhyeṣu ca ॥
विश्वानरस्य वस्पतिमनानतस्य शवसः । एवैश्च चर्षणीनामूती हुवे रथानाम् ॥
viśvānarasya vaspatimanānatasya śavasaḥ । evaiśca carṣaṇīnāmūtī huve rathānām ॥
स घा यस्ते दिवो नरो धिया मर्तस्य शमतः । ऊती स बृहतो दिवो द्विषो अँहो न तरति ॥
sa ghā yaste divo naro dhiyā martasya śamataḥ । ūtī sa bṛhato divo dviṣo am̐ho na tarati ॥
विभोष्ट इन्द्र राधसो विभ्वी रातिः शतक्रतो । अथा नो विश्वचर्षणे द्युम्नँ सुदत्र मँहय ॥
vibhoṣṭa indra rādhaso vibhvī rātiḥ śatakrato । athā no viśvacarṣaṇe dyumnam̐ sudatra mam̐haya ॥
वयश्चित्ते पतत्रिणो द्विपाच्चतुष्पादर्जुनि । उषः प्रारन्नृतूँरनु दिवो अन्तेभ्यस्परि ॥
vayaścitte patatriṇo dvipāccatuṣpādarjuni । uṣaḥ prārannṛtūm̐ranu divo antebhyaspari ॥
अमी ये देवा स्थन मध्य आ रोचने दिवः । कद्व ऋतं कदमृतं का प्रत्ना व आहुतिः ॥
amī ye devā sthana madhya ā rocane divaḥ । kadva ṛtaṃ kadamṛtaṃ kā pratnā va āhutiḥ ॥
ऋचँ साम यजामहे याभ्यां कर्माणि कृण्वते । वि ते सदसि राजतो यज्ञं देवेषु वक्षतः ॥
ṛcam̐ sāma yajāmahe yābhyāṃ karmāṇi kṛṇvate । vi te sadasi rājato yajñaṃ deveṣu vakṣataḥ ॥
विश्वाः पृतना अभिभूतरं नरः सजूस्ततक्षुरिन्द्रं जजनुश्च राजसे । क्रत्वे वरे स्थेमन्यामुरीमुतोग्रमोजिष्ठं तरसं तरस्विनम् ॥
viśvāḥ pṛtanā abhibhūtaraṃ naraḥ sajūstatakṣurindraṃ jajanuśca rājase । kratve vare sthemanyāmurīmutogramojiṣṭhaṃ tarasaṃ tarasvinam ॥
श्रत्ते दधामि प्रथमाय मन्यवेऽहन्यद्दस्युं नर्यं विवेरपः । उभे यत्वा रोदसी धावतामनु भ्यसात्ते शुष्मात्पृथिवी चिदद्रिवः ॥
śratte dadhāmi prathamāya manyave'hanyaddasyuṃ naryaṃ viverapaḥ । ubhe yatvā rodasī dhāvatāmanu bhyasātte śuṣmātpṛthivī cidadrivaḥ ॥
समेत विश्वा ओजसा पतिं दिवो य एक इद्भूरतिथिर्जनानाम् स पूर्व्यो नूतनमाजिगीषं तं वर्त्तनीरनु वावृत एक इत् ॥
sameta viśvā ojasā patiṃ divo ya eka idbhūratithirjanānām sa pūrvyo nūtanamājigīṣaṃ taṃ varttanīranu vāvṛta eka it ॥
इमे त इन्द्र ते वयं पुरुष्टुत ये त्वारभ्य चरामसि प्रभूवसो । न हि त्वदन्यो गिर्वणो गिरः सघत्क्षोणीरिव प्रति तद्धर्य नो वचः ॥
ime ta indra te vayaṃ puruṣṭuta ye tvārabhya carāmasi prabhūvaso । na hi tvadanyo girvaṇo giraḥ saghatkṣoṇīriva prati taddharya no vacaḥ ॥
चर्षणीधृतं मघवानमुक्थ्या३मिन्द्रं गिरो बृहतीरभ्यनूषत । वावृधानं पुरुहूतँ सुवृक्तिभिरमर्त्यं जरमाणं दिवेदिवे ॥
carṣaṇīdhṛtaṃ maghavānamukthyā३mindraṃ giro bṛhatīrabhyanūṣata । vāvṛdhānaṃ puruhūtam̐ suvṛktibhiramartyaṃ jaramāṇaṃ divedive ॥
अच्छा व इन्द्रं मतयः स्वर्युवः सध्रीचीर्विश्वा उशतीरनूषत । परि ष्वजन्त जनयो यथा पतिं मर्यं न शुन्ध्युं मघवानमूतये ॥
acchā va indraṃ matayaḥ svaryuvaḥ sadhrīcīrviśvā uśatīranūṣata । pari ṣvajanta janayo yathā patiṃ maryaṃ na śundhyuṃ maghavānamūtaye ॥
अभि त्यं मेषं पुरुहूतमृग्मियमिन्द्रं गीर्भिर्मदता वस्वो अर्णवम् । यस्य द्यावो न विचरन्ति मानुषं भुजे मँहिष्ठमभि विप्रमर्चत ॥
abhi tyaṃ meṣaṃ puruhūtamṛgmiyamindraṃ gīrbhirmadatā vasvo arṇavam । yasya dyāvo na vicaranti mānuṣaṃ bhuje mam̐hiṣṭhamabhi vipramarcata ॥
त्यँ सु मेषं महया स्वर्विदँ शतं यस्य सुभुवः साकमीरते । अत्यं न वाजँ हवनस्यदँ रथमेन्द्रं ववृत्यामवसे सुवृक्तिभिः ॥
tyam̐ su meṣaṃ mahayā svarvidam̐ śataṃ yasya subhuvaḥ sākamīrate । atyaṃ na vājam̐ havanasyadam̐ rathamendraṃ vavṛtyāmavase suvṛktibhiḥ ॥
घृतवती भुवनानामभिश्रियोर्वी पृथ्वी मधुदुघे सुपेशसा । द्यावापृथिवी वरुणस्य धर्मणा विष्कभिते अजरे भूरिरेतसा ॥
ghṛtavatī bhuvanānāmabhiśriyorvī pṛthvī madhudughe supeśasā । dyāvāpṛthivī varuṇasya dharmaṇā viṣkabhite ajare bhūriretasā ॥
उभे यदिन्द्र रोदसी आपप्राथोषा इव । महान्तं त्वा महीनाँ सम्राजं चर्षणीनाम् । देवी जनित्र्यजीजनद्भद्रा जनित्र्यजीजनत् ॥
ubhe yadindra rodasī āpaprāthoṣā iva । mahāntaṃ tvā mahīnām̐ samrājaṃ carṣaṇīnām । devī janitryajījanadbhadrā janitryajījanat ॥
प्र मन्दिने पितुमदर्चता वचो यः कृष्णगर्भा निरहन्नृजिश्वना । अवस्यवो वृषणं वज्रदक्षिणं मरुत्वन्तँ सख्याय हुवेमहि ॥
pra mandine pitumadarcatā vaco yaḥ kṛṣṇagarbhā nirahannṛjiśvanā । avasyavo vṛṣaṇaṃ vajradakṣiṇaṃ marutvantam̐ sakhyāya huvemahi ॥
इन्द्र सुतेषु सोमेषु क्रतुं पुनीष उक्थ्यम् । विदे वृधस्य दक्षस्य महाँ हि षः ॥
indra suteṣu someṣu kratuṃ punīṣa ukthyam । vide vṛdhasya dakṣasya mahām̐ hi ṣaḥ ॥
तमु अभि प्र गायत पुरुहूतं पुरुष्टुतम् । इन्द्रं गीर्भिस्तविषमा विवासत ॥
tamu abhi pra gāyata puruhūtaṃ puruṣṭutam । indraṃ gīrbhistaviṣamā vivāsata ॥
