उदु त्यं जातवेदसं देवं वहन्ति केतवः । दृशे विश्वाय सूर्यम् ॥
udu tyaṃ jātavedasaṃ devaṃ vahanti ketavaḥ । dṛśe viśvāya sūryam ॥
कविमग्निमुप स्तुहि सत्यधर्माणमध्वरे । देवममीवचातनम् ॥
kavimagnimupa stuhi satyadharmāṇamadhvare । devamamīvacātanam ॥
शं नो देवीरभिष्टये शं नो भवन्तु पीतये । शं योरभि स्रवन्तु नः ॥
śaṃ no devīrabhiṣṭaye śaṃ no bhavantu pītaye । śaṃ yorabhi sravantu naḥ ॥
कस्य नूनं परीणसि धियो जिन्वसि सत्पते । जोषाता यस्य ते गिरः ॥
kasya nūnaṃ parīṇasi dhiyo jinvasi satpate । joṣātā yasya te giraḥ ॥
यज्ञायज्ञा वो अग्नये गिरागिरा च दक्षसे । प्रप्र वयममृतं जातवेदसं प्रियं मित्रं न शँसिषम् ॥
yajñāyajñā vo agnaye girāgirā ca dakṣase । prapra vayamamṛtaṃ jātavedasaṃ priyaṃ mitraṃ na śam̐siṣam ॥
पाहि नो अग्न एकया पाह्यू३त द्वितीयया । पाहि गीर्भिस्तिसृभिरूर्जां पते पाहि चतसृभिर्वसो ॥
pāhi no agna ekayā pāhyū३ta dvitīyayā । pāhi gīrbhistisṛbhirūrjāṃ pate pāhi catasṛbhirvaso ॥
बृहद्भिरग्ने अर्चिभिः शुक्रेण देव शोचिषा । भरद्वाजे समिधानो यविष्ठ्य रेवत्पावक दीदिहि ॥
bṛhadbhiragne arcibhiḥ śukreṇa deva śociṣā । bharadvāje samidhāno yaviṣṭhya revatpāvaka dīdihi ॥
त्वे अग्ने स्वाहुत प्रियासः सन्तु सूरयः । यन्तारो ये मघवानो जनानामूर्वं दयन्त गोनाम् ॥
tve agne svāhuta priyāsaḥ santu sūrayaḥ । yantāro ye maghavāno janānāmūrvaṃ dayanta gonām ॥
अग्ने जरितर्विश्पतिस्तपानो देव रक्षसः । अप्रोषिवान्गृहपते महाँ असि दिवस्पायुर्दुरोणयुः ॥
agne jaritarviśpatistapāno deva rakṣasaḥ । aproṣivāngṛhapate mahām̐ asi divaspāyurduroṇayuḥ ॥
अग्ने विवस्वदुषसश्चित्रँ राधो अमर्त्य । आ दाशुषे जातवेदो वहा त्वमद्या देवाँ उषर्बुधः ॥
agne vivasvaduṣasaścitram̐ rādho amartya । ā dāśuṣe jātavedo vahā tvamadyā devām̐ uṣarbudhaḥ ॥
त्वं नश्चित्र ऊत्या वसो राधाँसि चोदय । अस्य रायस्त्वमग्ने रथीरसि विदा गाधं तुचे तु नः ॥
tvaṃ naścitra ūtyā vaso rādhām̐si codaya । asya rāyastvamagne rathīrasi vidā gādhaṃ tuce tu naḥ ॥
त्वमित्सप्रथा अस्यग्ने त्रातरृतः कविः । त्वां विप्रासः समिधान दीदिव आ विवासन्ति वेधसः ॥
tvamitsaprathā asyagne trātarṛtaḥ kaviḥ । tvāṃ viprāsaḥ samidhāna dīdiva ā vivāsanti vedhasaḥ ॥
आ नो अग्ने वयोवृधँ रयिं पावक शँस्यम् । रास्वा च न उपमाते पुरुस्पृहँ सुनीती सुयशस्तरम् ॥
ā no agne vayovṛdham̐ rayiṃ pāvaka śam̐syam । rāsvā ca na upamāte puruspṛham̐ sunītī suyaśastaram ॥
यो विश्वा दयते वसु होता मन्द्रो जनानाम् । मधोर्न पात्रा प्रथमान्यस्मै प्र स्तोमा यन्त्वग्नये ॥
yo viśvā dayate vasu hotā mandro janānām । madhorna pātrā prathamānyasmai pra stomā yantvagnaye ॥
एना वो अग्निं नमसोर्जो नपातमा हुवे । प्रियं चेतिष्ठमरतिँ स्वाध्वरं विश्वस्य दूतममृतम् ॥
enā vo agniṃ namasorjo napātamā huve । priyaṃ cetiṣṭhamaratim̐ svādhvaraṃ viśvasya dūtamamṛtam ॥
शेषे वनेषु मातृषु सं त्वा मर्तास इन्धते । अतन्द्रो हव्यं वहसि हविष्कृत आदिद्देवेषु राजसि ॥
śeṣe vaneṣu mātṛṣu saṃ tvā martāsa indhate । atandro havyaṃ vahasi haviṣkṛta ādiddeveṣu rājasi ॥
अदर्शि गातुवित्तमो यस्मिन्व्रतान्यादधुः । उपो षु जातमार्यस्य वर्धनमग्निं नक्षन्तु नो गिरः ॥
adarśi gātuvittamo yasminvratānyādadhuḥ । upo ṣu jātamāryasya vardhanamagniṃ nakṣantu no giraḥ ॥
अग्निरुक्थे पुरोहितो ग्रावाणो बर्हिरध्वरे । ऋचा यामि मरुतो ब्रह्मणस्पते देवा अवो वरेण्यम् ॥
agnirukthe purohito grāvāṇo barhiradhvare । ṛcā yāmi maruto brahmaṇaspate devā avo vareṇyam ॥
अग्निमीडिष्वावसे गाथाभिः शीरशोचिषम् । अग्निँ राये पुरुमीढ श्रुतं नरोऽग्निः सुदीतये छर्दिः ॥
agnimīḍiṣvāvase gāthābhiḥ śīraśociṣam । agnim̐ rāye purumīḍha śrutaṃ naro'gniḥ sudītaye chardiḥ ॥
श्रुधि श्रुत्कर्ण वह्निभिर्देवैरग्ने सयावभिः । आ सीदतु बर्हिषि मित्रो अर्यमा प्रातर्यावभिरध्वरे ॥
śrudhi śrutkarṇa vahnibhirdevairagne sayāvabhiḥ । ā sīdatu barhiṣi mitro aryamā prātaryāvabhiradhvare ॥
प्र दैवोदासो अग्निर्देव इन्द्रो न मज्मना । अनु मातरं पृथिवीं वि वावृते तस्थौ नाकस्य शर्मणि ॥
pra daivodāso agnirdeva indro na majmanā । anu mātaraṃ pṛthivīṃ vi vāvṛte tasthau nākasya śarmaṇi ॥
अध ज्मो अध वा दिवो बृहतो रोचनादधि । अया वर्धस्व तन्वा गिरा ममा जाता सुक्रतो पृण ॥
adha jmo adha vā divo bṛhato rocanādadhi । ayā vardhasva tanvā girā mamā jātā sukrato pṛṇa ॥
कायमानो वना त्वं यन्मातॄरजगन्नपः । न तत्ते अग्ने प्रमृषे निवर्तनं यद्दूरे सन्निहाभुवः ॥
kāyamāno vanā tvaṃ yanmātṝrajagannapaḥ । na tatte agne pramṛṣe nivartanaṃ yaddūre sannihābhuvaḥ ॥
नि त्वामग्ने मनुर्दधे ज्योतिर्जनाय शश्वते । दीदेथ कण्व ऋतजात उक्षितो यं नमस्यन्ति कृष्टयः ॥
ni tvāmagne manurdadhe jyotirjanāya śaśvate । dīdetha kaṇva ṛtajāta ukṣito yaṃ namasyanti kṛṣṭayaḥ ॥
देवो वो द्रविणोदाः पूर्णां विवष्ट्वासिचम् । उद्वा सिञ्जध्वमुप वा पृणध्वमादिद्वो देव ओहते ॥
devo vo draviṇodāḥ pūrṇāṃ vivaṣṭvāsicam । udvā siñjadhvamupa vā pṛṇadhvamādidvo deva ohate ॥
प्रैतु ब्रह्मणस्पतिः प्र देव्येतु सूनृता । अच्छा वीरं नर्यं पङ्क्तिराधसं देवा यज्ञं नयन्तु नः ॥
praitu brahmaṇaspatiḥ pra devyetu sūnṛtā । acchā vīraṃ naryaṃ paṅktirādhasaṃ devā yajñaṃ nayantu naḥ ॥
ऊर्ध्व ऊ षु ण ऊतये तिष्ठा देवो न सविता । ऊर्ध्वो वाजस्य सनिता यदञ्जिभिर्वाघद्भिर्विह्वयामहे ॥
ūrdhva ū ṣu ṇa ūtaye tiṣṭhā devo na savitā । ūrdhvo vājasya sanitā yadañjibhirvāghadbhirvihvayāmahe ॥
प्र यो राये निनीषति मर्तो यस्ते वसो दाशत् । स वीरं धत्ते अग्न उक्थशँसिनं त्मना सहस्रपोषिणम् ॥
pra yo rāye ninīṣati marto yaste vaso dāśat । sa vīraṃ dhatte agna ukthaśam̐sinaṃ tmanā sahasrapoṣiṇam ॥
प्र वो यह्वं पुरूणां विशां देवयतीनाम् । अग्निँ सूक्तेभिर्वचोभिर्वृणीमहे यँसमिदन्य इन्धते ॥
pra vo yahvaṃ purūṇāṃ viśāṃ devayatīnām । agnim̐ sūktebhirvacobhirvṛṇīmahe yam̐samidanya indhate ॥
अयमग्निः सुवीर्यस्येशे हि सौभगस्य । राय ईशे स्वपत्यस्य गोमत ईशे वृत्रहथानाम् ॥
ayamagniḥ suvīryasyeśe hi saubhagasya । rāya īśe svapatyasya gomata īśe vṛtrahathānām ॥
