इम इन्द्राय सुन्विरे सोमासो दध्याशिरः । ताँ आ मदाय वज्रहस्त पीतये हरिभ्यां याह्योक आ ॥
ima indrāya sunvire somāso dadhyāśiraḥ । tām̐ ā madāya vajrahasta pītaye haribhyāṃ yāhyoka ā ॥
इम इन्द्र मदाय ते सोमाश्चिकित्र उकिथनः । मधोः पपान उप नो गिरः शृणु रास्व स्तोत्राय गिर्वणः ॥
ima indra madāya te somāścikitra ukithanaḥ । madhoḥ papāna upa no giraḥ śaṛṇu rāsva stotrāya girvaṇaḥ ॥
आ त्वा३द्य सबर्दुघाँ हुवे गायत्रवेपसम् । इन्द्रं धेनुँ सुदुघामन्यामिषमुरुधारामरङ्कृतम् ॥
ā tvā३dya sabardughām̐ huve gāyatravepasam । indraṃ dhenum̐ sudughāmanyāmiṣamurudhārāmaraṅkṛtam ॥
न त्वा बृहन्तो अद्रयो वरन्त इन्द्र वीडवः । यच्छिक्षसि स्तुवते मावते वसु न किष्टदा मिनाति ते ॥
na tvā bṛhanto adrayo varanta indra vīḍavaḥ । yacchikṣasi stuvate māvate vasu na kiṣṭadā mināti te ॥
क ईं वेद सुते सचा पिबन्तं कद्वयो दधे । अयं यः पुरो विभिनत्योजसा मन्दानः शिप्र्यन्धसः ॥
ka īṃ veda sute sacā pibantaṃ kadvayo dadhe । ayaṃ yaḥ puro vibhinatyojasā mandānaḥ śipryandhasaḥ ॥
यदिन्द्र शासो अव्रतं च्यावया सदसस्परि । अस्माकमँशुं मघवन्पुरुस्पृहं वसव्ये अधि बर्हय ॥
yadindra śāso avrataṃ cyāvayā sadasaspari । asmākamam̐śuṃ maghavanpuruspṛhaṃ vasavye adhi barhaya ॥
त्वष्टा नो दैव्यं वचः पर्जन्यो ब्रह्मणस्पतिः । पुत्रैर्भ्रातृभिरदितिर्नु पातु नो दुष्टरं त्रामणं वचः ॥
tvaṣṭā no daivyaṃ vacaḥ parjanyo brahmaṇaspatiḥ । putrairbhrātṛbhiraditirnu pātu no duṣṭaraṃ trāmaṇaṃ vacaḥ ॥
कदा च न स्तरीरसि नेन्द्र सश्चसि दाशुषे । उपोपेन्नु मघवन्भूय इन्नु ते दानं देवस्य पृच्यते ॥
kadā ca na starīrasi nendra saścasi dāśuṣe । upopennu maghavanbhūya innu te dānaṃ devasya pṛcyate ॥
युङ्क्ष्वा हि वृत्रहन्तम हरी इन्द्र परावतः । अर्वाचीनो मघवन्त्सोमपीतय उग्र ऋष्वेभिरा गहि ॥
yuṅkṣvā hi vṛtrahantama harī indra parāvataḥ । arvācīno maghavantsomapītaya ugra ṛṣvebhirā gahi ॥
त्वामिदा ह्यो नरोऽपीप्यन्वज्रिन्भूर्णयः । स इन्द्र स्तोमवाहस इह श्रुध्युप स्वसरमा गहि ॥
tvāmidā hyo naro'pīpyanvajrinbhūrṇayaḥ । sa indra stomavāhasa iha śrudhyupa svasaramā gahi ॥
प्रत्यु अदर्श्यायत्यू३च्छन्ती दुहिता दिवः । अपो मही वृणुते चक्षुषा तमो ज्योतिष्कृणोति सूनरि ॥
pratyu adarśyāyatyū३cchantī duhitā divaḥ । apo mahī vṛṇute cakṣuṣā tamo jyotiṣkṛṇoti sūnari ॥
इमा उ वां दिविष्टय उस्रा हवन्ते अश्विना । अयं वामह्वेऽवसे शचीवसू विशंविशँ हि गच्छथः ॥
imā u vāṃ diviṣṭaya usrā havante aśvinā । ayaṃ vāmahve'vase śacīvasū viśaṃviśam̐ hi gacchathaḥ ॥
कु ष्ठः को वामश्विना तपानो देवा मर्त्यः । घ्नता वामश्मया क्षपमाणोँशुनेत्थमु आदुन्यथा ॥
ku ṣṭhaḥ ko vāmaśvinā tapāno devā martyaḥ । ghnatā vāmaśmayā kṣapamāṇom̐śunetthamu ādunyathā ॥
अयं वां मधुमत्तमः सुतः सोमो दिविष्टिषु । तमश्विना पिबतं तिरो अह्न्यं धत्तँ रत्नानि दाशुषे ॥
ayaṃ vāṃ madhumattamaḥ sutaḥ somo diviṣṭiṣu । tamaśvinā pibataṃ tiro ahnyaṃ dhattam̐ ratnāni dāśuṣe ॥
आ त्वा सोमस्य गल्दया सदा याचन्नहं ज्या । भूर्णिं मृगं न सवनेषु चुक्रुधं क ईशानं न याचिषत् ॥
ā tvā somasya galdayā sadā yācannahaṃ jyā । bhūrṇiṃ mṛgaṃ na savaneṣu cukrudhaṃ ka īśānaṃ na yāciṣat ॥
अध्वर्यो द्रावया त्वँ सोममिन्द्रः पिपासति । उपो नूनं युयुजे वृष्णा हरी आ च जगाम वृत्रहा ॥
adhvaryo drāvayā tvam̐ somamindraḥ pipāsati । upo nūnaṃ yuyuje vṛṣṇā harī ā ca jagāma vṛtrahā ॥
अभी षतस्तदा भरेन्द्र ज्यायः कनीयसः । पुरूवसुर्हि मघवन्बभूविथ भरेभरे च हव्यः ॥
abhī ṣatastadā bharendra jyāyaḥ kanīyasaḥ । purūvasurhi maghavanbabhūvitha bharebhare ca havyaḥ ॥
यदिन्द्र यावतस्त्वमेतावदहमीशीय । स्तोतारमिद्दधिषे रदावसो न पापत्वाय रँसिषम् ॥
yadindra yāvatastvametāvadahamīśīya । stotāramiddadhiṣe radāvaso na pāpatvāya ram̐siṣam ॥
त्वमिन्द्र प्रतूर्तिष्वभि विश्वा असि स्पृधः । अशस्तिहा जनिता वृत्रतूरसि त्वं तूर्य तरुष्यतः ॥
tvamindra pratūrtiṣvabhi viśvā asi spṛdhaḥ । aśastihā janitā vṛtratūrasi tvaṃ tūrya taruṣyataḥ ॥
प्र यो रिरिक्ष ओजसा दिवः सदोभ्यस्परि । न त्वा विव्याच रज इन्द्र पार्थिवमति विश्वं ववक्षिथ ॥
pra yo ririkṣa ojasā divaḥ sadobhyaspari । na tvā vivyāca raja indra pārthivamati viśvaṃ vavakṣitha ॥
असावि देवं गोऋजीकमन्धो न्यस्मिन्निन्द्रो जनुषेमुवोच । बोधामसि त्वा हर्यश्व यज्ञैर्बोधा न स्तोममन्धसो मदेषु ॥
asāvi devaṃ goṛjīkamandho nyasminnindro januṣemuvoca । bodhāmasi tvā haryaśva yajñairbodhā na stomamandhaso madeṣu ॥
योनिष्ट इन्द्र सदने अकारि तमा नृभिः पुरूहूत प्र याहि । असो यथा नोऽविता वृधश्चिद्ददो वसूनि ममदश्च सोमैः ॥
yoniṣṭa indra sadane akāri tamā nṛbhiḥ purūhūta pra yāhi । aso yathā no'vitā vṛdhaściddado vasūni mamadaśca somaiḥ ॥
अदर्दरुत्समसृजो वि खानि त्वमर्णवान्बद्बधानाँ अरम्णाः । महान्तमिन्द्र पर्वतं वि यद्वः सृजद्धारा अव यद्दानवान्हन् ॥
adardarutsamasṛjo vi khāni tvamarṇavānbadbadhānām̐ aramṇāḥ । mahāntamindra parvataṃ vi yadvaḥ sṛjaddhārā ava yaddānavānhan ॥
सुष्वाणास इन्द्र स्तुमसि त्वा सनिष्यन्तश्चित्तुविनृम्ण वाजम् । आ नो भर सुवितं यस्य कोना तना त्मना सह्यामा त्वोताः ॥
suṣvāṇāsa indra stumasi tvā saniṣyantaścittuvinṛmṇa vājam । ā no bhara suvitaṃ yasya konā tanā tmanā sahyāmā tvotāḥ ॥
जगृह्मा ते दक्षिणमिन्द्र हस्तं वसूयवो वसुपते वसूनाम् । विद्मा हि त्वा गोपतिँ शूर गोनामस्मभ्यं चित्रं वृषणँ रयिन्दाः ॥
jagṛhmā te dakṣiṇamindra hastaṃ vasūyavo vasupate vasūnām । vidmā hi tvā gopatim̐ śūra gonāmasmabhyaṃ citraṃ vṛṣaṇam̐ rayindāḥ ॥
इन्द्रं नरो नेमधिता हवन्ति यत्पार्या युनजते धियस्ताः । शूरो नृषाता श्रवसश्च काम आ गोमति व्रजे भजा त्वं नः ॥
indraṃ naro nemadhitā havanti yatpāryā yunajate dhiyastāḥ । śūro nṛṣātā śravasaśca kāma ā gomati vraje bhajā tvaṃ naḥ ॥
वयः सुपर्णा उप सेदुरिन्द्रं प्रियमेधा ऋषयो नाधमानाः । अप ध्वान्तमूर्णुहि पूर्धि चक्षुर्मुमुग्ध्या३स्मान्निधयेव बद्धान् ॥
vayaḥ suparṇā upa sedurindraṃ priyamedhā ṛṣayo nādhamānāḥ । apa dhvāntamūrṇuhi pūrdhi cakṣurmumugdhyā३smānnidhayeva baddhān ॥
नाके सुपर्णमुप यत्पतन्तँ हृदा वेनन्तो अभ्यचक्षत त्वा । हिरण्यपक्षं वरुणस्य दूतं यमस्य योनौ शकुनं भुरण्युम् ॥
nāke suparṇamupa yatpatantam̐ hṛdā venanto abhyacakṣata tvā । hiraṇyapakṣaṃ varuṇasya dūtaṃ yamasya yonau śakunaṃ bhuraṇyum ॥
ब्रह्म जज्ञानं प्रथमं पुरस्ताद्वि सीमतः सुरुचो वेन आवः । स बुध्न्या उपमा अस्य विष्ठाः सतश्च योनिमसतश्च विवः ॥
brahma jajñānaṃ prathamaṃ purastādvi sīmataḥ suruco vena āvaḥ । sa budhnyā upamā asya viṣṭhāḥ sataśca yonimasataśca vivaḥ ॥
अपूर्व्या पुरुतमान्यस्मै महे वीराय तवसे तुराय । विरप्शिने वज्रिणे शन्तमानि वचाँस्यास्मै स्थविराय तक्षुः ॥
apūrvyā purutamānyasmai mahe vīrāya tavase turāya । virapśine vajriṇe śantamāni vacām̐syāsmai sthavirāya takṣuḥ ॥
