उत्त्वा मन्दन्तु सोमाः कृणुष्व राधो अद्रिवः । अव ब्रह्मद्विषो जहि ॥
uttvā mandantu somāḥ kṛṇuṣva rādho adrivaḥ । ava brahmadviṣo jahi ॥
गिर्वणः पाहि नः सुतं मधोर्धाराभिरज्यसे । इन्द्र त्वादातमिद्यशः ॥
girvaṇaḥ pāhi naḥ sutaṃ madhordhārābhirajyase । indra tvādātamidyaśaḥ ॥
सदा व इन्द्रश्चर्कृषदा उपो नु स सपर्यन् । न देवो वृतः शूर इन्द्रः ॥
sadā va indraścarkṛṣadā upo nu sa saparyan । na devo vṛtaḥ śūra indraḥ ॥
आ त्वा विशन्त्विन्दवः समुद्रमिव सिन्धवः । न त्वामिन्द्राति रिच्यते ॥
ā tvā viśantvindavaḥ samudramiva sindhavaḥ । na tvāmindrāti ricyate ॥
इन्द्रमिद्गाथिनो बृहदिन्द्रमर्केभिरर्किणः । इन्द्रं वाणीरनूषत ॥
indramidgāthino bṛhadindramarkebhirarkiṇaḥ । indraṃ vāṇīranūṣata ॥
इन्द्र इषे ददातु न ऋभुक्षणमृभुँ रयिम् । वाजी ददातु वाजिनम् ॥
indra iṣe dadātu na ṛbhukṣaṇamṛbhum̐ rayim । vājī dadātu vājinam ॥
इन्द्रो अङ्ग महद्भयमभी षदप चुच्यवत् । स हि स्थिरो विचर्षणिः ॥
indro aṅga mahadbhayamabhī ṣadapa cucyavat । sa hi sthiro vicarṣaṇiḥ ॥
इमा उ त्वा सुतेसुते नक्षन्ते गिर्वणो गिरः । गावो वत्सं न धेनवः ॥
imā u tvā sutesute nakṣante girvaṇo giraḥ । gāvo vatsaṃ na dhenavaḥ ॥
इन्द्रा नु पूषणा वयँ सख्याय स्वस्तये । हुवेम वाजसातये ॥
indrā nu pūṣaṇā vayam̐ sakhyāya svastaye । huvema vājasātaye ॥
न कि इन्द्र त्वदुत्तरं न ज्यायो अस्ति वृत्रहन् । न क्येवं यथा त्वम् ॥
na ki indra tvaduttaraṃ na jyāyo asti vṛtrahan । na kyevaṃ yathā tvam ॥
तरणिं वो जनानां त्रदं वाजस्य गोमतः । समानमु प्र शँसिषम् ॥
taraṇiṃ vo janānāṃ tradaṃ vājasya gomataḥ । samānamu pra śam̐siṣam ॥
असृग्रमिन्द्र ते गिरः प्रति त्वामुदहासत । सजोषा वृषभं पतिम् ॥
asṛgramindra te giraḥ prati tvāmudahāsata । sajoṣā vṛṣabhaṃ patim ॥
सुनीथो घा स मर्त्यो यं मरुतो यमर्यमा । मित्रास्पान्त्यद्रुहः ॥
sunītho ghā sa martyo yaṃ maruto yamaryamā । mitrāspāntyadruhaḥ ॥
यद्वीडाविन्द्र यत्स्थिरे यत्पर्शाने पराभृतम् । वसु स्पार्हं तदा भर ॥
yadvīḍāvindra yatsthire yatparśāne parābhṛtam । vasu spārhaṃ tadā bhara ॥
श्रुतं वो वृत्रहन्तमं प्र शर्धं चर्षणीनाम् । आशिषे राधसे महे ॥
śrutaṃ vo vṛtrahantamaṃ pra śardhaṃ carṣaṇīnām । āśiṣe rādhase mahe ॥
अरं त इन्द्र श्रवसे गमेम शूर त्वावतः । अरँ शक्र परेमणि ॥
araṃ ta indra śravase gamema śūra tvāvataḥ । aram̐ śakra paremaṇi ॥
धानावन्तं करम्भिणमपूपवन्तमुक्थिनम् । इन्द्र प्रातर्जुषस्व नः ॥
dhānāvantaṃ karambhiṇamapūpavantamukthinam । indra prātarjuṣasva naḥ ॥
अपां फेनेन नमुचेः शिर इन्द्रोदवर्तयः । विश्वा यदजय स्पृधः ॥
apāṃ phenena namuceḥ śira indrodavartayaḥ । viśvā yadajaya spṛdhaḥ ॥
इमे त इन्द्र सोमाः सुतासो ये च सोत्वाः । तेषां मत्स्व प्रभूवसो ॥
ime ta indra somāḥ sutāso ye ca sotvāḥ । teṣāṃ matsva prabhūvaso ॥
तुभ्यँ सुतासः सोमाः स्तीर्णं बर्हिर्विभावसो । स्तोतृभ्य इन्द्र मृडय ॥
tubhyam̐ sutāsaḥ somāḥ stīrṇaṃ barhirvibhāvaso । stotṛbhya indra mṛḍaya ॥
आ व इन्द्र कृविं यथा वाजयन्तः शतक्रतुम् । मँहिष्ठँ सिञ्च इन्दुभिः ॥
ā va indra kṛviṃ yathā vājayantaḥ śatakratum । mam̐hiṣṭham̐ siñca indubhiḥ ॥
अतश्चिदिन्द्र न उपा याहि शतवाजया । इषा सहस्रवाजया ॥
ataścidindra na upā yāhi śatavājayā । iṣā sahasravājayā ॥
आ बुन्दं वृत्रहा ददे जातः पृच्छद्वि मातरम् । क उग्राः के ह शृण्विरे ॥
ā bundaṃ vṛtrahā dade jātaḥ pṛcchadvi mātaram । ka ugrāḥ ke ha śaṛṇvire ॥
बृबदुक्थँ हवामहे सृप्रकरस्नमूतये । साधः कृण्वन्तमवसे ॥
bṛbaduktham̐ havāmahe sṛprakarasnamūtaye । sādhaḥ kṛṇvantamavase ॥
ऋजुनीती नो वरुणो मित्रो नयति विद्वान् । अर्यमा देवैः सजोषाः ॥
ṛjunītī no varuṇo mitro nayati vidvān । aryamā devaiḥ sajoṣāḥ ॥
दूरादिहेव यत्सतोऽरुणप्सुरशिश्वितत् । वि भानुं विश्वथातनत् ॥
dūrādiheva yatsato'ruṇapsuraśiśvitat । vi bhānuṃ viśvathātanat ॥
आ नो मित्रावरुणा घृतैर्गव्यूतिमुक्षतम् । मध्वा रजाँसि सुक्रतू ॥
ā no mitrāvaruṇā ghṛtairgavyūtimukṣatam । madhvā rajām̐si sukratū ॥
उदु त्ये सूनवो गिरः काष्ठा यज्ञेष्वत्नत । वाश्रा अभिज्ञु यातवे ॥
udu tye sūnavo giraḥ kāṣṭhā yajñeṣvatnata । vāśrā abhijñu yātave ॥
इदं विष्णुर्वि चक्रमे त्रेधा नि दधे पदम् । समूढमस्य पाँसुले ॥
idaṃ viṣṇurvi cakrame tredhā ni dadhe padam । samūḍhamasya pām̐sule ॥
अतीहि मन्युषाविणँ सुषुवाँसमुपेरय । अस्य रातौ सुतं पिब ॥
atīhi manyuṣāviṇam̐ suṣuvām̐samuperaya । asya rātau sutaṃ piba ॥
