Canonical Ref: RV 14.15
Metrical Form: इन्द्रवज्रा
Sanskrit (Devanāgarī)
वेश्मानि रामः परिबर्हवन्ति विश्राण्य सौहार्दनिधिः सुहृद्भ्यः । बाष्पायमाणो बलिमन्निकेतमालेख्यशेषस्य पितुर्विवेश ॥
व्याख्या / Traditional Commentary & Notes
Classical Exegesis
सञ्जीविनीटीका (मल्लिनाथः):
वेश्मानीति॥ सुहृदो भावः सौहार्दं सौजन्यम्। `हृद्भगसिन्ध्वन्ते पूर्वपदस्य-` (पा.7।3।19) इत्युभयपदवृद्धिः। सौहार्दनिधी रामः सुहृद्भ्यः सुग्रीवादिभ्यः परिबर्हवन्त्युपकरणवन्ति वेश्मानि विश्राण्य दत्त्वा। आलेख्यशेषस्य चित्रमात्रशेषस्य पितुर्बलिमत्पूजायुक्तं निकेतं गृहं बाष्पायमाणो बाष्पमुद्वमन्विवेश। `बाष्पोष्मभ्यामुद्वमने` (पा.3।1।16) इति क्यङ्प्रत्ययः ॥
Canonical CTS URN Reference
Raghuvaṁśam, RV 14.15. Poorvam Open Research Engine (PORE) Corpus.