KD 236

अथ कयूरकः — ‘ देवि, देवस्य चन्द्रापीडस्य प्रसादभूमिरेषा पत्रलेखा नाम ताम्बूलकरङ्कवाहिनी ’ इत्यभिधाय पत्रलेखामदर्शयत् । अथ कादम्बरी दृष्टा ताम्, ‘ अहो मानुषीषु पक्षपातः प्रजापतेः ’ इति चिन्तयांबभूव । कृतप्रणामां च तां सादरम् ‘ एह्येहि ’ इत्यभिधाय आत्मनः समीपे सकुतूहलं परिजनेन दृश्यमानां पृष्ठतः समुपावेशयत् । दर्शनादेवोपारुढप्रीत्यतिशया च मुहुर्मुहुरेनां सोपग्रहं करकिसलयेन पस्पर्श ॥