इन्द्र ज्येष्ठं न आ भर ओजिष्ठं पुपुरि श्रवः । यद्दिधृक्षेम वज्रहस्त रोदसी ओभे सुशिप्र पप्राः ॥
indra jyeṣṭhaṃ na ā bhara ojiṣṭhaṃ pupuri śravaḥ । yaddidhṛkṣema vajrahasta rodasī obhe suśipra paprāḥ ॥
इन्द्रो राजा जगतश्चर्षणीनामधिक्षमा विश्वरूपं यदस्य । ततो ददाति दाशुषे वसूनि चोदद्राध उपस्तुतं चिदर्वाक् ॥
indro rājā jagataścarṣaṇīnāmadhikṣamā viśvarūpaṃ yadasya । tato dadāti dāśuṣe vasūni codadrādha upastutaṃ cidarvāk ॥
यस्येदमा रजोयुजस्तुजे जने वनँ स्वः । इन्द्रस्य रन्त्यं बृहत् ॥
yasyedamā rajoyujastuje jane vanam̐ svaḥ । indrasya rantyaṃ bṛhat ॥
उदुत्तमं वरुण पाशमस्मदवाधमं वि मध्यमँ श्रथाय । अथादित्य व्रते वयं तवानागसो अदितये स्याम ॥
uduttamaṃ varuṇa pāśamasmadavādhamaṃ vi madhyamam̐ śrathāya । athāditya vrate vayaṃ tavānāgaso aditaye syāma ॥
त्वया वयं पवमानेन सोम भरे कृतं वि चिनुयाम शश्वत् । तन्नो मित्रो वरुणो मामहन्तामदितिः सिन्धुः पृथिवी उत द्यौः ॥
tvayā vayaṃ pavamānena soma bhare kṛtaṃ vi cinuyāma śaśvat । tanno mitro varuṇo māmahantāmaditiḥ sindhuḥ pṛthivī uta dyauḥ ॥
इमं वृषणं कृणुतैकमिन्माम् ॥
imaṃ vṛṣaṇaṃ kṛṇutaikaminmām ॥
स न इन्द्राय यज्यवे वरुणाय मरुद्भ्यः । वरिवोवित्परिस्रव ॥
sa na indrāya yajyave varuṇāya marudbhyaḥ । varivovitparisrava ॥
एना विश्वान्यर्य आ द्युम्नानि मानुषाणाम् । सिषासन्तो वनामहे ॥
enā viśvānyarya ā dyumnāni mānuṣāṇām । siṣāsanto vanāmahe ॥
अहमस्मि प्रथमजा ऋतस्य पूर्वं देवेभ्यो अमृतस्य नाम । यो मा ददाति स इदेवमावदहमन्नमन्नमदन्तमद्मि ॥
ahamasmi prathamajā ṛtasya pūrvaṃ devebhyo amṛtasya nāma । yo mā dadāti sa idevamāvadahamannamannamadantamadmi ॥
त्वमेतदधारयः कृष्णासु रोहिणीषु च । परुष्णीषु रुशत्पयः ॥
tvametadadhārayaḥ kṛṣṇāsu rohiṇīṣu ca । paruṣṇīṣu ruśatpayaḥ ॥
अरूरुचदुषसः पृश्निरग्रिय उक्षा मिमेति भुवनेषु वाजयुः । मायाविनो ममिरे अस्य मायया नृचक्षसः पितरो गर्भमादधुः ॥
arūrucaduṣasaḥ pṛśniragriya ukṣā mimeti bhuvaneṣu vājayuḥ । māyāvino mamire asya māyayā nṛcakṣasaḥ pitaro garbhamādadhuḥ ॥
इन्द्र इद्धर्योः सचा सम्मिश्ल आ वचोयुजा । इन्द्रो वज्री हिरण्ययः ॥
indra iddharyoḥ sacā sammiśla ā vacoyujā । indro vajrī hiraṇyayaḥ ॥
इन्द्र वाजेषु नोऽव सहस्रप्रधनेषु च । उग्र उग्राभिरूतिभिः ॥
indra vājeṣu no'va sahasrapradhaneṣu ca । ugra ugrābhirūtibhiḥ ॥
प्रथश्च यस्य सप्रथश्च नामानुष्टुभस्य हविषो हविर्यत् । धातुर्द्युतानात्सवितुश्च विष्णो रथन्तरमा जभारा वसिष्ठः ॥
prathaśca yasya saprathaśca nāmānuṣṭubhasya haviṣo haviryat । dhāturdyutānātsavituśca viṣṇo rathantaramā jabhārā vasiṣṭhaḥ ॥
नियुत्वान्वायवा गह्ययँ शुक्रो अयामि ते । गन्तासि सुन्वतो गृहम् ॥
niyutvānvāyavā gahyayam̐ śukro ayāmi te । gantāsi sunvato gṛham ॥
यज्जायथा अपूर्व्य मघवन्वृत्रहत्याय । तत्पृथिवीमप्रथयस्तदस्तभ्ना उतो दिवम् ॥
yajjāyathā apūrvya maghavanvṛtrahatyāya । tatpṛthivīmaprathayastadastabhnā uto divam ॥
मयि वर्चो अथो यशोऽथो यज्ञस्य यत्पयः । परमेष्ठी प्रजापतिर्दिवि द्यामिव दृँहतु ॥
mayi varco atho yaśo'tho yajñasya yatpayaḥ । parameṣṭhī prajāpatirdivi dyāmiva dṛm̐hatu ॥
सं ते पयाँसि समु यन्तु वाजाः सं वृष्ण्यान्यभिमातिषाहः । आप्यायमानो अमृताय सोम दिवि श्रवाँस्युत्तमानि धिष्व ॥
saṃ te payām̐si samu yantu vājāḥ saṃ vṛṣṇyānyabhimātiṣāhaḥ । āpyāyamāno amṛtāya soma divi śravām̐syuttamāni dhiṣva ॥
त्वमिमा ओषधीः सोम विश्वास्त्वमपो अजनयस्त्वं गाः । त्वमातनोरुर्वा३न्तरिक्षं त्वं ज्योतिषा वि तमो ववर्थ ॥
tvamimā oṣadhīḥ soma viśvāstvamapo ajanayastvaṃ gāḥ । tvamātanorurvā३ntarikṣaṃ tvaṃ jyotiṣā vi tamo vavartha ॥
अग्निमीडे पुरोहितं यज्ञस्य देवमृत्विजम् । होतारं रत्नधातमम् ॥
agnimīḍe purohitaṃ yajñasya devamṛtvijam । hotāraṃ ratnadhātamam ॥
ते मन्वत प्रथमं नाम गोनां त्रिः सप्त परमं नाम जनान् । ता जानतीरभ्यनूषत क्षा आविर्भुवन्नरुणीर्यशसा गावः ॥
te manvata prathamaṃ nāma gonāṃ triḥ sapta paramaṃ nāma janān । tā jānatīrabhyanūṣata kṣā āvirbhuvannaruṇīryaśasā gāvaḥ ॥
समन्या यन्त्युपयन्त्यन्याः समानमूर्वं नद्यस्पृणन्ति । तमू शुचिँ शुचयो दीदिवाँसमपान्नपातमुप यन्त्यापः ॥
samanyā yantyupayantyanyāḥ samānamūrvaṃ nadyaspṛṇanti । tamū śucim̐ śucayo dīdivām̐samapānnapātamupa yantyāpaḥ ॥
आ प्रागाद्भद्रा युवतिरह्नः केतून्त्समीर्त्सति । अभूद्भद्रा निवेशनी विश्वस्य जगतो रात्री ॥
ā prāgādbhadrā yuvatirahnaḥ ketūntsamīrtsati । abhūdbhadrā niveśanī viśvasya jagato rātrī ॥
प्रक्षस्य वृष्णो अरुषस्य नू महः प्र नो वचो विदथा जातवेदसे । वैश्वानराय मतिर्नव्यसे शुचिः सोम इव पवते चारुरग्नये ॥
prakṣasya vṛṣṇo aruṣasya nū mahaḥ pra no vaco vidathā jātavedase । vaiśvānarāya matirnavyase śuciḥ soma iva pavate cāruragnaye ॥
विश्वे देवा मम शृण्वन्तु यज्ञमुभे रोदसी अपां नपाच्च मन्म । मा वो वचाँसि परिचक्ष्याणि वोचँ सुम्नेष्विद्वो अन्तमा मदेम ॥
viśve devā mama śaṛṇvantu yajñamubhe rodasī apāṃ napācca manma । mā vo vacām̐si paricakṣyāṇi vocam̐ sumneṣvidvo antamā madema ॥
यशो मा द्यावापृथिवी यशो मेन्द्रबृहस्पती । यशो भगस्य विन्दतु यशो मा प्रतिमुच्यताम् । यशस्व्या३स्याः सँ सदोऽहं प्रवदिता स्याम् ॥
yaśo mā dyāvāpṛthivī yaśo mendrabṛhaspatī । yaśo bhagasya vindatu yaśo mā pratimucyatām । yaśasvyā३syāḥ sam̐ sado'haṃ pravaditā syām ॥
इन्द्रस्य नु वीर्याणि प्रवोचं यानि चकार प्रथमानि वज्री । अहन्नहिमन्वपस्ततर्द प्र वक्षणा अभिनत्पर्वतानाम् ॥
indrasya nu vīryāṇi pravocaṃ yāni cakāra prathamāni vajrī । ahannahimanvapastatarda pra vakṣaṇā abhinatparvatānām ॥
अग्निरस्मि जन्मना जातवेदा घृतं मे चक्षुरमृतं म आसन् । त्रिधातुरर्को रजसो विमानोऽजस्रं ज्योतिर्हविरस्मि सर्वम् ॥
agnirasmi janmanā jātavedā ghṛtaṃ me cakṣuramṛtaṃ ma āsan । tridhāturarko rajaso vimāno'jasraṃ jyotirhavirasmi sarvam ॥
पात्यग्निर्विपो अग्रं पदं वेः पाति यह्वश्चरणँ सूर्यस्य । पाति नाभा सप्तशीर्षाणमग्निः ॥
pātyagnirvipo agraṃ padaṃ veḥ pāti yahvaścaraṇam̐ sūryasya । pāti nābhā saptaśīrṣāṇamagniḥ ॥
भ्राजन्त्यग्ने समिधान दीदिवो जिह्वा चरत्यन्तरासनि । स त्वं नो अग्ने पयसा वसुविद्रयिं वर्चो दृशेऽदाः ॥
bhrājantyagne samidhāna dīdivo jihvā caratyantarāsani । sa tvaṃ no agne payasā vasuvidrayiṃ varco dṛśe'dāḥ ॥
