सुतासो मधुमत्तमाः सोमा इन्द्राय मन्दिनः । पवित्रवन्तो अक्षरन्देवान्गच्छन्तु वो मदाः ॥
sutāso madhumattamāḥ somā indrāya mandinaḥ । pavitravanto akṣarandevāngacchantu vo madāḥ ॥
सोमाः पवन्त इन्दवोऽस्मभ्यं गातुवित्तमाः । मित्राः स्वाना अरेपसः स्वाध्यः स्वर्विदः ॥
somāḥ pavanta indavo'smabhyaṃ gātuvittamāḥ । mitrāḥ svānā arepasaḥ svādhyaḥ svarvidaḥ ॥
अभी नो वाजसातमँ रयिमर्ष शतस्पृहम् । इन्दो सहस्रभर्णसं तुविद्युम्नं विभासहम् ॥
abhī no vājasātamam̐ rayimarṣa śataspṛham । indo sahasrabharṇasaṃ tuvidyumnaṃ vibhāsaham ॥
अभी नवन्ते अद्रुहः प्रियमिन्द्रस्य काम्यम् । वत्सं न पूर्व आयुनि जातँ रिहन्ति मातरः ॥
abhī navante adruhaḥ priyamindrasya kāmyam । vatsaṃ na pūrva āyuni jātam̐ rihanti mātaraḥ ॥
आ हर्यताय धृष्णवे धनुष्टन्वन्ति पौँस्यम् । शुक्रा वि यन्त्यसुराय निर्णिजे विपामग्रे महीयुवः ॥
ā haryatāya dhṛṣṇave dhanuṣṭanvanti paum̐syam । śukrā vi yantyasurāya nirṇije vipāmagre mahīyuvaḥ ॥
परि त्यँ हर्यतँ हरिं बभ्रुं पुनन्ति वारेण । यो देवान्विश्वाँ इत्परि मदेन सह गच्छति ॥
pari tyam̐ haryatam̐ hariṃ babhruṃ punanti vāreṇa । yo devānviśvām̐ itpari madena saha gacchati ॥
प्र सुन्वानास्यान्धसो मर्तो न वष्ट तद्वचः । अप श्वानमराधसँ हता मखं न भृगवः ॥
pra sunvānāsyāndhaso marto na vaṣṭa tadvacaḥ । apa śvānamarādhasam̐ hatā makhaṃ na bhṛgavaḥ ॥
अभि प्रियाणि पवते चनोहितो नामानि यह्वो अधि येषु वर्धते । आ सूर्यस्य बृहतो बृहन्नधि रथं विष्वञ्चमरुहद्विचक्षणः ॥
abhi priyāṇi pavate canohito nāmāni yahvo adhi yeṣu vardhate । ā sūryasya bṛhato bṛhannadhi rathaṃ viṣvañcamaruhadvicakṣaṇaḥ ॥
अचोदसो नो धन्वन्त्विन्दवः प्र स्वानासो बृहद्देवेषु हरयः । वि चिदश्नाना इषयो अरातयोऽर्यो नः सन्तु सनिषन्तु नो धियः ॥
acodaso no dhanvantvindavaḥ pra svānāso bṛhaddeveṣu harayaḥ । vi cidaśnānā iṣayo arātayo'ryo naḥ santu saniṣantu no dhiyaḥ ॥
एष प्र कोशे मधुमाँ अचिक्रददिन्द्रस्य वज्रो वपुषो वपुष्टमः । अभ्यॄ३तस्य सुदुघा घृतश्चुतो वाश्रा अर्षन्ति पयसा च घेनवः ॥
eṣa pra kośe madhumām̐ acikradadindrasya vajro vapuṣo vapuṣṭamaḥ । abhyṝ३tasya sudughā ghṛtaścuto vāśrā arṣanti payasā ca ghenavaḥ ॥
प्रो अयासीदिन्दुरिन्द्रस्य निष्कृतँ सखा सख्युर्न प्र मिनाति सङ्गिरम् । मर्य इव युवतिभिः समर्षति सोमः कलशे शतयामना पथा ॥
pro ayāsīdindurindrasya niṣkṛtam̐ sakhā sakhyurna pra mināti saṅgiram । marya iva yuvatibhiḥ samarṣati somaḥ kalaśe śatayāmanā pathā ॥
धर्ता दिवः पवते कृत्व्यो रसो दक्षो देवानामनुमाद्यो नृभिः । हरिः सृजानो अत्यो न सत्वभिर्वृथा पाजाँसि कृणुषे नदीष्वा ॥
dhartā divaḥ pavate kṛtvyo raso dakṣo devānāmanumādyo nṛbhiḥ । hariḥ sṛjāno atyo na satvabhirvṛthā pājām̐si kṛṇuṣe nadīṣvā ॥
वृषा मतीनां पवते विचक्षणः सोमो अह्नां प्रतरीतोषसां दिवः । प्राणा सिन्धूनां कलशाँ अचिक्रददिन्द्रस्य हार्द्याविशन्मनीषिभिः ॥
vṛṣā matīnāṃ pavate vicakṣaṇaḥ somo ahnāṃ pratarītoṣasāṃ divaḥ । prāṇā sindhūnāṃ kalaśām̐ acikradadindrasya hārdyāviśanmanīṣibhiḥ ॥
त्रिरस्मै सप्त धेनवो दुदुह्रिरे सत्यामाशिरं परमे व्योमनि । चत्वार्यन्या भुवनानि निर्णिजे चारूणि चक्रे यदृतैरवर्धत ॥
trirasmai sapta dhenavo duduhrire satyāmāśiraṃ parame vyomani । catvāryanyā bhuvanāni nirṇije cārūṇi cakre yadṛtairavardhata ॥
इन्द्राय सोम सुषुतः परि स्रवापामीवा भवतु रक्षसा सह । मा ते रसस्य मत्सत द्वयाविनो द्रविणस्वन्त इह सन्त्विन्दवः ॥
indrāya soma suṣutaḥ pari sravāpāmīvā bhavatu rakṣasā saha । mā te rasasya matsata dvayāvino draviṇasvanta iha santvindavaḥ ॥
असावि सोमो अरुषो वृषा हरी राजेव दस्मो अभि गा अचिक्रदत् । पुनानो वारमत्येष्यव्ययँ श्येनो न योनिं घृतवन्तमासदत् ॥
asāvi somo aruṣo vṛṣā harī rājeva dasmo abhi gā acikradat । punāno vāramatyeṣyavyayam̐ śyeno na yoniṃ ghṛtavantamāsadat ॥
प्र देवमच्छा मधुमन्त इन्दवोऽसिष्यदन्त गाव आ न धेनवः । बर्हिषदो वचनावन्त ऊधभिः परिस्रुतमुस्रिया निर्णिजं धिरे ॥
pra devamacchā madhumanta indavo'siṣyadanta gāva ā na dhenavaḥ । barhiṣado vacanāvanta ūdhabhiḥ parisrutamusriyā nirṇijaṃ dhire ॥
अञ्जते व्यञ्जते समञ्जते क्रतुँ रिहन्ति मघ्वाभ्यञ्जते । सिन्धोरुऽच्छ्वासे पतयन्तमुक्षणँ हिरण्यपावाः पशुमप्सु गृभ्णते ॥
añjate vyañjate samañjate kratum̐ rihanti maghvābhyañjate । sindhoru'cchvāse patayantamukṣaṇam̐ hiraṇyapāvāḥ paśumapsu gṛbhṇate ॥
पवित्रं ते विततं ब्रह्मणस्पते प्रभुर्गात्राणि पर्येषि विश्वतः । अतप्ततनूर्न तदामो अश्नुते शृतास इद्वहन्तः सं तदाशत ॥
pavitraṃ te vitataṃ brahmaṇaspate prabhurgātrāṇi paryeṣi viśvataḥ । ataptatanūrna tadāmo aśnute śaṛtāsa idvahantaḥ saṃ tadāśata ॥
इन्द्रमच्छ सुता इमे वृषणं यन्तु हरयः । श्रुष्टे जातास इन्दवः स्वर्विदः ॥
indramaccha sutā ime vṛṣaṇaṃ yantu harayaḥ । śruṣṭe jātāsa indavaḥ svarvidaḥ ॥
प्र धन्वा सोम जागृविरिन्द्रायेन्दो परि स्रव । द्युमन्तँ शुष्ममा भर स्वर्विदम् ॥
pra dhanvā soma jāgṛvirindrāyendo pari srava । dyumantam̐ śuṣmamā bhara svarvidam ॥
सखाय आ नि षीदत पुनानाय प्र गायत । शिशुं न यज्ञैः परि भूषत श्रिये ॥
sakhāya ā ni ṣīdata punānāya pra gāyata । śiśuṃ na yajñaiḥ pari bhūṣata śriye ॥
तं वः सखायो मदाय पुनानमभि गायत । शिशुं न हव्यैः स्वदयन्त गूर्तिभिः ॥
taṃ vaḥ sakhāyo madāya punānamabhi gāyata । śiśuṃ na havyaiḥ svadayanta gūrtibhiḥ ॥
प्राणा शिशुर्महीनाँ हिन्वन्नृतस्य दीधितिम् । विश्वा परि प्रिया भुवदध द्विता ॥
prāṇā śiśurmahīnām̐ hinvannṛtasya dīdhitim । viśvā pari priyā bhuvadadha dvitā ॥
पवस्व देववीतय इन्दो धाराभिरोजसा । आ कलशं मधुमान्त्सोम नः सदः ॥
pavasva devavītaya indo dhārābhirojasā । ā kalaśaṃ madhumāntsoma naḥ sadaḥ ॥
सोमः पुनान ऊर्मिणाव्यं वारं वि धावति । अग्रे वाचः पवमानः कनिक्रदत् ॥
somaḥ punāna ūrmiṇāvyaṃ vāraṃ vi dhāvati । agre vācaḥ pavamānaḥ kanikradat ॥
प्र पुनानाय वेधसे सोमाय वच उच्यते । भृतिं न भरा मतिभिर्जुजोषते ॥
pra punānāya vedhase somāya vaca ucyate । bhṛtiṃ na bharā matibhirjujoṣate ॥
गोमन्न इन्दो अश्ववत्सुतः सुदक्ष धनिव । शुचिं च वर्णमधि गोषु धार्य ॥
gomanna indo aśvavatsutaḥ sudakṣa dhaniva । śuciṃ ca varṇamadhi goṣu dhārya ॥
अस्मभ्यं त्वा वसुविदमभि वाणीरनूषत । गोभिष्टे वर्णमभि वासयामसि ॥
asmabhyaṃ tvā vasuvidamabhi vāṇīranūṣata । gobhiṣṭe varṇamabhi vāsayāmasi ॥
पवते हर्यतो हरिरति ह्वराँसि रँह्या । अभ्यर्ष स्तोतृभ्यो वीरवद्यशः ॥
pavate haryato harirati hvarām̐si ram̐hyā । abhyarṣa stotṛbhyo vīravadyaśaḥ ॥
