उपो षु जातमप्तुरं गोभिर्भङ्गं परिष्कृतम् । इन्दुं देवा अयासिषुः ॥
upo ṣu jātamapturaṃ gobhirbhaṅgaṃ pariṣkṛtam । induṃ devā ayāsiṣuḥ ॥
पुनानो अक्रमीदभि विश्वा मृधो विचर्षणिः । शुम्भन्ति विप्रं धीतिभिः ॥
punāno akramīdabhi viśvā mṛdho vicarṣaṇiḥ । śumbhanti vipraṃ dhītibhiḥ ॥
आविशन्कलशँ सुतो विश्वा अर्षन्नभि श्रियः । इन्दुरिन्द्राय धीयते ॥
āviśankalaśam̐ suto viśvā arṣannabhi śriyaḥ । indurindrāya dhīyate ॥
असर्जि रथ्यो यथा पवित्रे चम्वोः सुतः । कार्ष्मन्वाजी न्यक्रमीत् ॥
asarji rathyo yathā pavitre camvoḥ sutaḥ । kārṣmanvājī nyakramīt ॥
प्र यद्गावो न भूर्णयस्त्वेषा अयासो अक्रमुः । घ्नन्तः कृष्णामप त्वचम् ॥
pra yadgāvo na bhūrṇayastveṣā ayāso akramuḥ । ghnantaḥ kṛṣṇāmapa tvacam ॥
अपघ्नन्पवसे मृधः क्रतुवित्सोम मत्सरः । नुदस्वादेवयुं जनम् ॥
apaghnanpavase mṛdhaḥ kratuvitsoma matsaraḥ । nudasvādevayuṃ janam ॥
अया पवस्व धारया यया सूर्यमरोचयः । हिन्वानो मानुषीरपः ॥
ayā pavasva dhārayā yayā sūryamarocayaḥ । hinvāno mānuṣīrapaḥ ॥
स पवस्व य आविथेन्द्रं वृत्राय हन्तवे । वव्रिवाँसं महीरपः ॥
sa pavasva ya āvithendraṃ vṛtrāya hantave । vavrivām̐saṃ mahīrapaḥ ॥
अया वीती परि स्रव यस्त इन्दो मदेष्वा । अवाहन्नवतीर्नव ॥
ayā vītī pari srava yasta indo madeṣvā । avāhannavatīrnava ॥
परि द्युक्षँ सनद्रायिं भरद्वाजं नो अन्धसा । स्वानो अर्ष पवित्र आ ॥
pari dyukṣam̐ sanadrāyiṃ bharadvājaṃ no andhasā । svāno arṣa pavitra ā ॥
अचिक्रदद्वृषा हरिर्महान्मित्रो न दर्शतः । सँ सूर्येण दिद्युते ॥
acikradadvṛṣā harirmahānmitro na darśataḥ । sam̐ sūryeṇa didyute ॥
आ ते दक्षं मयोभुवं वह्निमद्या वृणीमहे । पान्तमा पुरुस्पृहम् ॥
ā te dakṣaṃ mayobhuvaṃ vahnimadyā vṛṇīmahe । pāntamā puruspṛham ॥
अध्वर्यो अद्रिभिः सुतँ सोमं पवित्र आ नय । पुनीहीन्द्राय पातवे ॥
adhvaryo adribhiḥ sutam̐ somaṃ pavitra ā naya । punīhīndrāya pātave ॥
तरत्स मन्दी धावति धारा सुतस्यान्धसः । तरत्स मन्दी धावति ॥
taratsa mandī dhāvati dhārā sutasyāndhasaḥ । taratsa mandī dhāvati ॥
आ पवस्व सहस्रिणँ रयिँ सोम सुवीर्यम् । अस्मे श्रवाँसि धारय ॥
ā pavasva sahasriṇam̐ rayim̐ soma suvīryam । asme śravām̐si dhāraya ॥
अनु प्रत्नास आयवः पदं नवीयो अक्रमुः । रुचे जनन्त सूर्यम् ॥
anu pratnāsa āyavaḥ padaṃ navīyo akramuḥ । ruce jananta sūryam ॥
अर्षा सोम द्युमत्तमोऽभि द्रोणानि रोरुवत् । सीदन्योनौ योनेष्वा ॥
arṣā soma dyumattamo'bhi droṇāni roruvat । sīdanyonau yoneṣvā ॥
वृषा सोम द्युमाँ असि वृषा देव वृषव्रतः । वृषा धर्माणि दध्रिषे ॥
vṛṣā soma dyumām̐ asi vṛṣā deva vṛṣavrataḥ । vṛṣā dharmāṇi dadhriṣe ॥
इषे पवस्व धारया मृज्यमानो मनीषिभिः । इन्दो रुचाभि गा इहि ॥
iṣe pavasva dhārayā mṛjyamāno manīṣibhiḥ । indo rucābhi gā ihi ॥
मन्द्रया सोम धारया वृषा पवस्व देवयुः । अव्यो वारेभिरस्मयुः ॥
mandrayā soma dhārayā vṛṣā pavasva devayuḥ । avyo vārebhirasmayuḥ ॥
अया सोम सुकृत्यपा महान्त्सन्नभ्यवर्धथाः । हिन्दान इद्वृषायसे ॥
ayā soma sukṛtyapā mahāntsannabhyavardhathāḥ । hindāna idvṛṣāyase ॥
अयं विचर्षणिर्हितः पवमानः स चेतति । हिन्वान आप्यं बृहत् ॥
ayaṃ vicarṣaṇirhitaḥ pavamānaḥ sa cetati । hinvāna āpyaṃ bṛhat ॥
प्र ण इन्दो महे तु न ऊर्मिं न बिभ्रदर्षसि । अभि देवाँ अयास्यः ॥
pra ṇa indo mahe tu na ūrmiṃ na bibhradarṣasi । abhi devām̐ ayāsyaḥ ॥
अपघ्नन्पवते मृधोऽप सोमो अराव्णः । गच्छन्निन्द्रस्य निष्कृतम् ॥
apaghnanpavate mṛdho'pa somo arāvṇaḥ । gacchannindrasya niṣkṛtam ॥
पुनानः सोम धारयापो वसानो अर्षसि । आ रत्नधा योनिमृतस्य सीदस्युत्सो देवो हिरण्ययः ॥
punānaḥ soma dhārayāpo vasāno arṣasi । ā ratnadhā yonimṛtasya sīdasyutso devo hiraṇyayaḥ ॥
परीतो षिञ्चता सुतँ सोमो य उत्तमँ हविः । दधन्वाँ यो नर्यो अप्स्वा३न्तरा सुषाव सोममद्रिभिः ॥
parīto ṣiñcatā sutam̐ somo ya uttamam̐ haviḥ । dadhanvām̐ yo naryo apsvā३ntarā suṣāva somamadribhiḥ ॥
आ सोम स्वानो अद्रिभिस्तिरो वाराण्यव्यया । जनो न पुरि चम्वोर्विशद्धरिः सदो वनेषु दध्रिषे ॥
ā soma svāno adribhistiro vārāṇyavyayā । jano na puri camvorviśaddhariḥ sado vaneṣu dadhriṣe ॥
प्र सोम देववीतये सिन्धुर्न पिप्ये अर्णसा । अँशोः पयसा मदिरो न जागृविरच्छा कोशं मधुश्चुतम् ॥
pra soma devavītaye sindhurna pipye arṇasā । am̐śoḥ payasā madiro na jāgṛviracchā kośaṃ madhuścutam ॥
सोम उ ष्वाणः सोतृभिरधि ष्णुभिरवीनाम् । अश्वयेव हरिता याति धारया मन्द्रया याति धारया ॥
soma u ṣvāṇaḥ sotṛbhiradhi ṣṇubhiravīnām । aśvayeva haritā yāti dhārayā mandrayā yāti dhārayā ॥
तवाहँ सोम रारण सख्य इन्दो दिवेदिवे । पुरूणि बभ्रो नि चरन्ति मामव परिधीँरति ताँ इहि ॥
tavāham̐ soma rāraṇa sakhya indo divedive । purūṇi babhro ni caranti māmava paridhīm̐rati tām̐ ihi ॥
