Canonical Ref: RV 14.45
Metrical Form: उपजातिः
Sanskrit (Devanāgarī)
प्रजावती दोहदशंसिनी ते तपोवनेषु स्पृहयालुरेव । स त्वं रथी तद्व्यपदेशनेयां प्रापय्य वाल्मीकिपदं त्यजैनाम् ॥
व्याख्या / Traditional Commentary & Notes
Classical Exegesis
सञ्जीविनीटीका (मल्लिनाथः):
प्रजावतीति॥ दोहृदो गर्भिणीमनोरथः। तच्छंसिनी ते प्रजावती भ्रातृजाया। `प्रजावती भ्रातृजाया` इत्यमरः (अ.को.2|6|30)। तपोवनेषु स्पृहयालुरेव सस्पृहेव। `स्पृहिगृहि-` (पा.3।2।158) इत्यादिनालुच्प्रत्ययः। स त्वं रथी सन्। तद्व्यपदेशेन दोहदमिषेण नेयां नेतव्यामेनां सीतां वाल्मीकेः पदं स्थानं प्रापय्य गमयित्वा। `विभाषापः` (पा.6।4।57) इत्ययादेशः। त्यज॥
Canonical CTS URN Reference
Raghuvaṁśam, RV 14.45. Poorvam Open Research Engine (PORE) Corpus.