Kāṇḍa 1 Sūkta 23

AV 1.23.1

Cite Detail

शत्रुनिवारणम्।
१-४ अथर्वा। वनस्पतिः(असिक्निः)। अनुष्टुप्।
न॒क्तं॒जा॒तास्यो॑षधे॒ रामे॒ कृष्णे॒ असि॑क्नि च ।
इ॒दं र॑जनि रजय कि॒लासं॑ पलि॒तं च॒ यत्

AV 1.23.2

Cite Detail

कि॒लासं॑ च पलि॒तं च॒ निरि॒तो ना॑शया॒ पृष॑त्।
आ त्वा॒ स्वो वि॑शतां॒ वर्णः॒ परा॑ शु॒क्लानि॑ पातय

AV 1.23.3

Cite Detail

असि॑तं ते प्र॒लय॑नमा॒स्थान॒मसि॑तं॒ तव॑ ।
असि॑क्न्यस्योषधे॒ निरि॒तो ना॑शया॒ पृष॑त्

AV 1.23.4

Cite Detail

अ॒स्थि॒जस्य॑ कि॒लास॑स्य तनू॒जस्य॑ च॒ यत् त्व॒चि।
दूष्या॑ कृ॒तस्य॒ ब्रह्म॑णा॒ लक्ष्म॑ श्वे॒तम॑नीनशम्

← Previous (Ch. 22) Full Table of Contents Next (Ch. 24) →